ޔުއެފާ ޗެމްޕިއަންސް ލީގުގައި މޮނާކޯއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ތާވަލްގެ ތިން ވަނަ އަށް ޖެހިލައިފި އެވެ.

އާސެނަލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. ގަބްރިއެލް ޖީސޫސް ތަނަވަސްކޮށްދިން ފުރުސަތެއްގައި އާސެނަލަށް އެ ލަނޑު ޖަހައިދިނީ ބުކަޔޯ ސަކާ އެވެ. އޭގެ ފަހުން މެޗުގެ 78 ވަނަ މިނެޓުގައި ސަކާ ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ކައި ހަވާޓްޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި އާސެނަލްގެ ފަހު ލަނޑު 88 ވަނަ މިނެޓުގައި ހަވާޓްޒް ޖެހީ ސަކާ ތަނަވަސްކޮށްދިން ފުރުސަތެއްގަ އެވެ.

މޮޅާއެކު އާސެނަލް ތިން ވަަނައިގައި އޮތީ މިހާތަނަށް އެ ޓީމު ކުޅެފައިވާ ހަ މެޗުން 13 ޕޮއިންޓާ އެކު އެވެ. ހަތަރު މެޗުން އާސެނަލް މޮޅުވެފައިވާއިރު، އެއް މެޗުން ބަލިވެ، އަނެއް މެޗުން ވަނީ އެއްވަރުވެފަ އެވެ. ދެ ވަނައިގައި ބާސެލޯނާ އޮތްއިރު، އެއް ވަަނައިގައި އޮތީ ލިވަޕޫލް އެވެ.