ހައުސިން މިނިސްޓްރީ ހިންގާ އިމާރާތުގައި އަލިފާން ރޯވެއްޖެ

ހައުސިން މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެއްޖެ އެވެ.

ބޮޑުތަކުރުފާނު މަގާއި، އަމީނީމަގަށް ވާ ގޮތަށް ހުންނަ ހައުސިން މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެފައިވާއިރު، އަލިފާން ނިއްވުމަށްޓަކައި ފުލުހުން އަންނަނީ އެ ސަރަހައްދުގައި ޙަރަކާތްތެރި ވަމުންނެވެ. އަލިފާން ރޯވެ މުޅި އެ ސަރަހައްްދުގައި ދުން ބޯވެފައިވާއިރު، އެ އިމާރާތުގައި ކޮންސްޓްރަކްޝަން މިނިސްޓްރީ ވެސް ހިންގަ އެވެ.

ފުލުހުން ބުނީ މި އަލިފާނުގެ ހާދިސާއާއި ގުޅިގެން އެ ސަރަހައްދުގެ ގެ ތަކުން މީހުން ނެރުމުގެ މަސައްކަތް ފުލުހުން ދަނީ ކުރަމުން ކަމަށާއި، އެހެންކަމުން އެ ސަރަހައްދު ވަނީ އާއްމު ޓްރެފިކް އަށް ބަންދު ކުރެވިފައި ކަމަށެވެ.

މާލޭ ސިޓީ ކައުންސިލްގެ ލޭންޑު އަދި އާބާދީއާ ގުޅުން ހުރި މަސައްކަތް ކުރާ އިމާރާތުން ސާމާނު ހުސް ކުރުމުގެ މަސައްކަތް ދަނީ ކުރަމުންނެވެ.

ހައުސިން މިނިސްޓްރީގެ ހަތަރު ފްލޯއެއްގައި އަލިފާން ރޯވެފައިވާއިރު، އިމާރާތުގައި ހުންނަނީ ވެސް ހަތަރު ފްލޯ އެވެ.

މިނިސްޓްރީގެ ބައެއް ސާމާނުތައް ވެސް މިވަގުތު ވަނީ ބޭރަށް ނެރެވިފައެވެ. އޭގެ ތެރޭގައި ބައެއް ކޮމްޕިއުޓަރު ސިސްޓަމް އަދި ޕްރިންޓަރުތައް ހިމެނެއެވެ. މިއީ މިނިސްޓްރީގެ ދެ ވަނަ ފްލޯ އަދި ކުރީގެ އެމްއެލްއެސްއޭ ބިލްޑިން (މިހާރު ހައުސިން މިނިސްޓްރީގެ ކޯޕަރޭޓް ޑިޕާޓްމަންޓު) ގައި ހުރި ބައެއް ސާމާނެވެ.

މިވަގުތު އަލިފާންގަނޑު ބޭރަށް ފެންނަން ހުރީ އެމްވަޔަރަމަންޓް މިނިސްޓްރީ ހުންނަ ފަޅިން ކަމަށްވާއިރު، މިނިސްޓްރީގެ އިމާރާތުގެ ބޮޑު ބައެއްް ވަނީ އެއްކޮށް ވެއްޓިފައެވެ.

މި އިމާރާތަކީ ބޭރުގައި ޓިނު ޖަހައިގެން ހަދާފައި ހުރި އިމާރާތެކެވެ.

މައުލޫމާތު ލިބިފައިވާގޮތުގައި، ހައުސިންގ މިނިސްޓްރީގެ އިމާރާތް އެއްކޮށް ވަނީ ވެއްޓިފައެވެ. އިމާރާތުން ދުންއަރަމުންދާއިރު، ފެންޖަހަމުންދާ ކަން ފާހަގަކުރެވެއެވެ. މީގެ އިތުރުން އެންވަޔަރަންމެންޓް މިނިސްޓްރީގެ އިމާރާތުގައި ވެސް އަލިފާން ރޯވެފައިވާ ކަމަށް މައުލޫމާތު ލިބެއެވެ. އިމާރާތުގެ ތެރެއިން ބައެއް ސާމާނު ގޮވާ އަޑާއި ބުރައިގެންދާ މަންޒަރު ފެންނަކަމަށް އެ ސަރަހައްދުގައި ހަރަކާތްތެރިވާ ރާއްޖެޓީވީގެ ރިޕޯޓަރު މައުލޫމާތު ދެއެވެ.

އަލިފާން ރޯވެގެން އުޅޭ ސަރަހައްދަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވަނީ ވަޑައިގެންފައެވެ.