އެމްޑީޕީ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމުގެ ދަށުން ފްލެޓް ލިބޭނެ ކަމަށް ކަނޑައެޅި ބައެއް ފަރާތްތަކަށް ލިބުނު ފުލެޓު އަތުލުމަށް ފަހު، ކުރިން ކަނޑައަޅާ އިއުލާނު ކޮށްފައިވާ އުސޫލާ ޚިލާފަށް ބަޔަކަށް ފްލެޓް ދޫކުރަން ގުރުއަތު ނެގުން ބާއްވައިފިއެވެ.

ގެދޮރުވެރިޔާ ސްކީމުގެ ދަށުން ޝަރުތު ހަމަވާ މިންވަރަށް ވުރެ މަތިން މާކްްސް ލިބިފައިވާ ފަރާތްތަކެއް ގުރުއަތުގައި ބައިވެރި ނުކޮށް ހުރިކަން ފާހަގަ ކުރެވޭ ކަމަށް ބުނެ ރައީސް މުއިއްޒުގެ ސަރުކާރުން ގެންދަނީ ކުރިން ކަނޑައަޅާފައިވާ އުސޫލާ މުޅިން ޚިލާފަށް ބަޔަކަށް ފުލެޓް ދިނުމަށް މަސައްކަތް ކުރަމުންނެވެ.

އެމްޑީޕީ އިން މި މައްސަލައިގައި ކަން ހިނގާފައިވާ ގޮތް ސާފު ކޮށްދިނުމަށް ނެރުނު ބަޔާނެއްގައި ބުނެފައިވަނީ، އެކަން އެ ގޮތައް ކުރަނީ "ރައްޔިތުންނަށް އޮޅޭ ގޮތައް މައުލޫމާތު ފަތުރައި، ފުލެޓް ލިބުނު ފަރާތްތަކުގެ ހައްގުތައް ނިގުޅައިގަތުމަށް،" ކަމުގައެވެ.

އެމްޑީޕީ އިން ނެރުނު ނޫސްބަޔާނެއްގައި ސާފު ކޮށްދީފައިވާ ގޮތުގައި، މި ސްކީމަށް ދެމަފިރިން ވަކިން ފޯމު ހުށަހަޅައިގެން ޝަރުތު ހަމަވެ، ދެމަރިންނަށް ވެސް ފުލެޓް ލިބޭވަރަށް މާކްސް ލިބިފައިވާނަމަ ފުލެޓް ލިބޭނީ ދެމަފިރިންގެ ތެރެއިން ކަނޑައަޅާ އެއް ފަރާތަކަށް އެއް ފްލެޓް ކަމަށް 15 ނޮވެމްބަރު 2023 ގައި ކޮށްފައިވާ މިނިސްޓްރީ އޮފް ނޭޝަނަލް ޕްލޭނިންގ، އެންޑް އިންފްރާސްޓްރަކްޗަރ އިން ހާމަކޮށްފައިވާ ކަމުގައެވެ.

އެމްޑީޕީ އިން ބުނެފައި ވަނީ އެ އުސޫލުގެ މަތިން، ދެމަފިރިންނަށް އެއް ފުލެޓް ދިނުމަށްޓަކައި އެ ފަރާތުން ފުލެޓް ލިބޭ ފަރާތެއް ކަނޑައެޅުމަށް ޓަކައި ދެ ކޮޓަރީގެ ފުލެޓާއި ތިން ކޮޓަރީގެ ފްލެޓް ވާނީ ރިޒާވް ކޮށްފައި ކަމަށެވެ.

އޭގެ އިތުރުން އެމްޑީޕީ އިން ބުނެފައިވަނީ ދެމަފިރިން ވެސް 3 ކޮޓަރީގެ ފްލެޓަށް ނުވަތަ 2 ކޮޓަރީގެ ފްލެޓަށް ވަކިން ފޯމު ހުށަހަޅައިގެން ޝަރުތު ހަމަވެ ފްލެޓް ލިބުމަށް ހޮވިފައިވާ ނަމަ އެ ދެމަފިރިންނަށް އެއް ފްލެޓް ނުވަތަ ދެމަރިންގެ ތެރެއިން ކަނޑައަޅާ ފަރާތަކަށް އެއް ފްލެޓް ދިނުމަށްޓަކައި ގުރުއަތު ނެގި އިރު ދެމަފިރިންގެ ތެރެއިން ފޯމު ތަރުތީބުން އެއް ފަރާތް ހިމަނައި، އެ ދެފަރާތައް ލިބޭނެ ފްލެޓް ކަނޑައަޅާފައިވާނެ ކަމަށެވެ. އެއީ ދެ ފަރާތައް ނުވަތަ ދެ ފަރާތުން ކަނޑައަޅާ އެއް ފަރާތާ އެކު އެއްބަސްވުން ހެދުމަށް ކަނޑައަޅާފައިވާ ފްލެޓް ކަމަށް ވެސް އެމްޑީޕީ އިން ވަނީ ބުނެފައެވެ.

އެހެން ނަމަވެސް މި ސަރުކާރުން ގެންދަނީ، މި އުސޫލާ ޚިލާފަށް، ފްލެޓް ދިނުމުގެ ގުރުއަތު ލުމުގެ ކަަންކަން ކުރިއަށް ގެންގޮސްފައެވެ.

އެމްޑީޕީ އިން ބުނެފައިވަނީ، ދެމަފިރިންގެ ތެރެއިން ޕޯޓަލް ގައި ފްލެޓް އެސައިން ވެފައި ނުވާ ފަރާތަކީ ގުރުއަތުގައި ބައިވެރިކޮށްފައި ނުވާ، އަދި ފްލެޓުން މަހުރޫމު ކޮށްފައިވާ ފަރާތްތައް ކަމަށް ބުނެ އަލުން އެމީހުންނަށް ފްލެޓް ދިނުމަށްޓަކައި ގުރުއަތުލުން ކުރި އަށް ގެންދިއުމަކީ ނޭނގި ނަމަވެސް ގެދޮރުވެރިޔާ ސްކީމުން ދެމަފިރިންނަށް ދެ ފްލެޓް ދިނުމަށް ކުރާ ކަމެއް ކަމަށެވެ.

މި ސަރުކާރުގެ ހައުސިންގ މިނިސްޓްރީން މި ފަރާތްތަކަށް ފްލެޓް ދިނުމަށް ގުރުއަތުލުން ވަނީ ބުދަ ދުވަހު އެ މިނިސްޓްރީގައި ކުރިއަށް ގެންގޮސްފައެވެ.

މިކަމާ ބެހޭ ގޮތުން މި ސަރުކާރުގެ ހައުސިންގ މިނިސްޓްރީން ކުރި އިއުލާނުގައި، މި ގުރުއަތުގައި ދެމަފިރިންނަށް ފްލެޓް ލިބޭ ހާލަތުގައި ދެމަރިފިންގެ ތެރެއިން އެއް ފަރާތުން ފްލެޓް ދޫކޮށްލުމަށް ފަހު ފްލެޓް ލިބޭ ފަރާތާއި ގުރުއަތު ނަގާފައި ނުވާ ފަރާތް ވެސް ހިމެނޭނެ ކަމަށް ސާފު ކޮށް ވަނީ ބުނެފައެވެ.

ހައުސިންގ މިނިސްޓްރީން ގުރުއަތު ނެގުން ކުރިއަށް ގެންގޮސްފައި ވަނީ 16 ނޮވެމްބަރު 2023 ގައި އޮތް ގުރުއަތު ނެގުމުގައި ފްލެޓް ލިބުމަށް ޝަރުތު ހަމަވާ ފަރާތްތަކުގެ ތެރެއިން 73 ން ފެށިގެން މަތިން މާކްސް ލިބި ދެ ކޮޓަރީގެ ފްލެޓް ކަނޑައެޅުމަށްޓަކައި ގުރުއަތު ނަގާފައި ނުވާ ފަރާތްތަކާއި 76ށް ވުރެ މަތިން މާކްސް ލިބިގެން 3 ކޮޓަރީގެ ފްލެޓް ކަނޑައެޅުމަށްޓަކައި ގުރުއަތު ނަގާފައި ނުވާ ފަރާތްތަކުގެ މެދުގައި ކަމަށް އެ މިނިސްޓްރީން މިކަމާ ބެހޭ ގޮތުން އާންމު ކުރި އިއުލާނުގައި ބުނެފައިވެއެވެ.