ގަމުގައި އަޅަން ނިންމި ކެންސަރު ހޮސްޕިޓަލްގެ ބަދަލުގައި މިހާރު އަޅަން ނިންމާފައިވަނީ މެންޓަލް ހޮސްޕިޓަލެއް: މިނިސްޓަރު

ލ.ގަމުގައި އަޅަން ނިންމި ކެންސަރު ހޮސްޕިޓަލްގެ ބަދަލުގައި މިހާރު އަޅަން ނިންމާފައިވަނީ މެންޓަލް ހޮސްޕިޓަލެއް ކަމަށް ހެލްތް މިނިސްޓަރު ޑރ. އަބްދުﷲ ހަލީލު ވިދާޅުވެއްޖެއެވެ.

ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި ގަމު ދާއިރާގެ މެންބަރު މުހައްމަދު ވިސާމް ދެންނެވި ސުވާލަށް ޖަވާބު ދެއްވަމުން މިނިސްޓަރު ހަލީލު ވިދާޅުވީ ގަމުގައި އަޅަން ނިންމާފައިވާ ކެންސަރު ހޮސްޕިޓަލް މާލެ ސަރަހައްދަށް ބަދަލެއް ނުކުރާ ކަމަށެވެ. ނަމަވެސް އެންމެ އެކަށީގެންވާ ގޮތުގައި އެތަނުގައި ޚިދުމަތް ދެވޭނެ ހޮސްޕިޓަލެއް އެޅުމަށް އެ ބަޖެޓުގައި މިހާރު އެރަށުގައި އެޅުމަށް ނިންމާފައިވަނީ މެންޓަލް ހޮސްޕިޓަލެއް ކަމަށް މިނިސްޓަރު ވިދާޅުވިއެވެ.

މާލޭގައި އިމާރާތް ކުރަން ނިންމާފައިވާ ކެންސަރު ހޮސްޕިޓަލަށް އިޝާރާތް ކުރައްވައި މިނިސްޓަރު ހަލީލު ވިދާޅުވީ އެ ހޮސްޕިޓަލް އަޅަނީ އައު ފަންޑަކުން ކަމަށެވެ. އެއީ ދުބާއީގެ ފަންޑެއްގެ ތެރެއިންނެވެ.

މީގެ އިތުރުން މިނިސްޓަރު ހަލީލު ވިދާޅުވީ ގަމު ހޮސްޕިޓަލް ޓާޝަރީ ހޮސްޕިޓަލަކަށް ބަދަލު ކުރުމަށް މިސަރުކާރުން ވަރަށް ބޮޑަށް އިސްކަން ދޭ ކަމަށެވެ. އެގޮތުން ޖާގަ އިތުރުކޮށް އަދި ޚިދުމަތް އިތުރުކުރުމަށް ހަދަންޖެހޭ ޕްލޭންތައް ހަދަމުންދާ ކަމަށް މިނިސްޓަރު ހަލީލު ވިދާޅުވިއެވެ. އަދި ވިދާޅުވީ މިއަހަރުގެ ތެރޭގައި ހޮސްޕިޓަލްގެ ޖާގަ އިތުރުކުރުމުގެ އަމަލީ މަސައްކަތް ފެށޭނެ ކަމަށެވެ.

ގަމުގައި މެންޓަލް ހޮސްޕިޓަލެއް އެޅުމަށް މިސަރުކާރުން ނިންމިއިރު، ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އިންޑިއާގެ ލައިން އޮފް ކްރެޑިޓްސްގެ ދަށުން ކެންސަރު ހޮސްޕިޓަލް އެޅުމަށް ދިރާސާކޮށް ވަނީ ނިންމާފައެވެ. އަދި ގަމުން 20،000 އަކަފޫޓުގެ ބޮޑު ބިމެއް ވެސް ވަނީ ހަމަޖައްސާފައެވެ. ނަމަވެސް މިސަރުކާރުގައި އެނިންމުން ބަދަލު ކޮށްފައިވާތީ އެރަށުގެ ކައުންސިލުން ކަންބޮޑުވުން ފާޅުކޮށްފައިވެއެވެ.

ކައުންސިލުން ބުނެފައިވަނީ އާބާދީ ތޮއްޖެހިފައިވާ މާލެފަދަ ސަރަހައްދަކަށް ކެންސަރު ހޮސްޕިޓަލް ބަދަލުކުރުމަކީ އެތަނުގައި ދިރިއުޅޭ ފަރާތްތަކަށްވެސް ހުރި ނުރައްކަލެއް ކަމަށެވެ. އަދި ކެންސަރަށް ދެވޭ ފަރުވާއަކީ ނުރައްކާތެރި ކެމިކަލް ހިމެނޭ ފަރުވާއަކަށްވާތީ އެފަދަ ކެމިކަލެއް ރައްކާތެރިކަމާއެކު ގެންގުޅޭވޭނެ ވަސީލަތް ގާއިމްކުރުމުގައި ވެސް ލ. ގަން ފަދަ ބިންބޮޑު ރަށެއްގެ މުހިންމުކަން ބޮޑުކަމަށް ބުނެފައިވެއެވެ.