ބަޔާން މޮޅުވީ ފަހަަތުން އަރައި ފަސް ލަނޑު ޖަހައިގެން

ޔުއެފާ ޗެމްޕިއަންސް ލީގުގައި ޝަޚްތަރް ޑޮނެސްކާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެއްޖެ އެވެ.

ޝަޚްތަރް ޑޮނެސްކުގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ބަޔާން އިން ކާމިޔާބު ކުރީ 5-1 އިންނެވެ. އެއީ މެޗުގައި ޝަޚްތަރް ޑޮނެސްކުން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ފަސް ލަނޑު ޖަހައިގެންނެވެ.

މެޗު ފަށައިގެން ފަސް ވަނަ މިނެޓުގައި ޝަޚްތަރް ޑޮނެސްކަށް ލީޑު ނަގައިދިނީ ކެވިން އެވެ. ނަމަވެސް އޭގެ ހަ މިނެޓު ފަހުން ކޮންރަޑް ލައިމާ ވަނީ ލަނޑު ޖަހައި ބަޔާނަށް ނަތީޖާ ހަމަހަމަ ކޮށްދީފަ އެވެ. ފުރަތަމަ ހާފު ނިމުމުގެ ކުރިން ބަޔާނަށް ލީޑު ނަގައިިދނީ ތޯމަސް މުލާ އެވެ. އެ ލަނޑު އޭނާ ޖެހީ ޖަމާލް މުސިއާލާ ތަނަވަސްކޮށްދިން ފުރުސަތެއްގަ އެވެ.

ދެ ވަނަ ހާފުގައި ބަޔާންގެ ތިން ވަނަ ލަނޑު މިކޭލް އޮލައިސޭ ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް މުސިއާލާ ވަނީ ބަޔާންގެ ހަތަރު ވަނަ ލަނޑު ޖަހައިފަ އެވެ. އަދި މެޗުގައި ބަޔާންގެ ފަހު ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ އޮލައިސޭ އެވެ.

މޮޅާއެކު ބަޔާން އޮތީ ތާވަލްގެ އަށް ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ހަ މެޗުން 12 ޕޮއިންޓު ހޯދައިގެންނެވެ. ހަތަރު މެޗުން ބަޔާން މޮޅުވެފައިވާއިރު، ދެ މެޗުން ވަނީ ބަލިވެފަ އެވެ.