ރައީސް މުއިއްޒު ވަނީ މަޖިލިސް މެންބަރު ހައިޖެކް ކޮށްފައި، އެކަން ބަދަލުކުރަން ރައްޔިތުން ނުކުންނަންޖެހޭ: ހަސަން ލަތީފް
ގާނޫނު އަސާސީ ކުރިން އޮތް ގޮތަށް ރައްޔިތުންނަށް ބާރު ލިބިދޭ ގޮތަށް ރުޖޫއަ ކުރަންޖެހޭ
ދަ ޑިމޮކްރެޓްސް ރައީސް ހަސަން ލަތީފް
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުން މަޖިލީހުގެ މެންބަރުން ހައިޖެކް ކޮށްފައިވާ ކަމަށާއި، އެކަން ބަދަލު ކުރުމަށް ރައްޔިތުން ނުކުންނަން ޖެހޭ ކަމަށް ދަ ޑިމޮކްރެޓްސް ރައީސް ހަސަން ލަތީފް ވިދާޅުވެއްޖެއެވެ.
"ގާނޫނުއަސާސީގެ" ދިފާއުގައި ނަމުގައި ރާއްޖެޓީވީން ގެނެސްދޭ ޚާއްސަ ޕްރޮގްރާމްގައި ހަސަން ލަތީފް ވިދާޅުވީ ގާނޫނުއަސާސީގެ ދިފާއުގައި މަސައްކަތް ކުރުމަކީ މުހިންމު މަސައްކަތެއް ކަމަށާއި، ގާނޫނުއަސާސީ ކުރިން އޮތް ގޮތަށް ބަދަލު ކުރަންޖެހޭ ކަމަށެވެ. އެމަސައްކަތް ކުރުމަކީ ހަމައެކަނި ސިޔާސީ ޕާޓީތަކުން އެކަނި ކުރަންޖެހޭ މަސައްކަތެއް ނޫން ކަމަށާއި، ގާނޫނުއަސާސީ ކުރިން އޮތް ގޮތަށް ރައްޔިތުންނަށް ބާރު ލިބިދޭ ގޮތަށް ރުޖޫއަ ކުރުމުގެ މަސައްކަތަށް ހުރިހާ ރައްޔިތުން ނުކުންނަންޖެހޭ ކަމަށް އޭނާ ވިދާޅުވިއެވެ.
ދަ ޑިމޮކްރެޓްސްއާއި އެމްޑީޕީއަކީ ވެސް ހިޔާލު ތަފާތުވާ ދެ ސިޔާސީ ޕާޓީކަން ފާހަގަކުރައްވައި ހަސަން ލަތީފް ވިދާޅުވީ ގާނޫނުއަސާސީގެ ދިފާއު ކުރުމަށް އެކުއެކީގައި މަސައްކަތް ކުރާނެ ކަމަށެވެ.
މީގެ އިތުރުން ހަސަން ލަތީފް ވިދާޅުވީ ރައީސް މުއިއްޒު މިހާރު ރައްޔިތުންގެ މަންދޫބުން، ރައްޔިތުންގެ މަޖިލިސް މެންބަރުން ހައިޖެކްކޮށްފައިވާ ކަމަށާއި، ރައްޔިތުންގެ ބާރު އެމަނިކުފާނު ނަންގަވާފައިވާ ކަމަށެވެ. އަދި އެގޮތަށް އެކަން ނުކުރެވޭނެކަން އަންގަންޖެހޭނީ ރައްޔިތުން ނުކުމެ ކަމަށާއި، ރައްޔިތުންގެ ބަސް ރައީސް މުއިއްޒަށް އިއްވަންޖެހޭ ކަމަށް އޭނާ ވިދާޅުވިއެވެ.
ހަސަން ލަތީފް ވިދާޅުވީ މިސަރުކާރުން ގާނޫނުއަސާސީއަށް މިގެނައި ބަދަލާއެކު އަޅާނުލައި ތިބެވެން ނެތް ކަމަށެވެ. އަދި މިމައްސަލާގައި އަޅާނުލައި ކުރިއަށްދާނަމަ އޭގެ މާނައަކީ މުޅި ދައުލަތް އޮތީ ގަނޑުބަޑުވެފައި ކަމަށް ހަސަން ލަތީފް ވިދާޅުވިއެވެ.
