ހައްގަކީ ހެޔޮ ހިތުން ތަބަކަށްލާފައި ދޭ އެއްޗެއް ނޫން، މިއަދު އަނެއްކާ ވެސް ހައްގުތައް ހޯދަން ރައްޔިތުން ނުކުންނަންޖެހޭ: ރައީސް ސާލިހު
މިހާރު އަމަލުކުރަމުންދާ ފެހި ގާނޫނު އަސާސީ ހޯދީ އެތައް ބައެއްގެ ބުރަ މަސައްކަތާއި ގުރުބާނީއަކާއެކު
'ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ކުރީގެ ރައީސް އިބްރާހިމް މުހައްމަދު ސާލިހު ވާހަކަފުޅު ދައްކަވަނީ
ހައްގަކީ ހެޔޮ ހިތުން ތަބަކަށްލާފައި ދޭ އެއްޗެއް ނޫން ކަމަށާއި، މިއަދު އަނެއްކާ ވެސް ހައްގުތައް ހޯދަން ރައްޔިތުން ނުކުންނަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ކުރިއަށް ގެންދާ ''ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ރައީސް ސާލިހު ވިދާޅުވީ މިހާރު އަމަލުކުރަމުންދާ ފެހި ގާނޫނު އަސާސީ ހޯދީ އެތައް ބައެއްގެ ބުރަ މަސައްކަތާއި ގުރުބާނީއަކާއެކު ކަމަށާއި، އެތައް ދައްޗަކާއި، އުދަނގުލެއް ހުރަސްކުރި ކަމަށެވެ.
ރައީސް ސާލިހު ވިދާޅުވީ ރައީސް ޑރ. މުހައްމަދު މުއިއްޒު ބޭނުންވެވަޑައިގަންނަވަނީ ހުދުމުހުތާރު ވެރިކަމެއް ގާއިމްކޮށް، ހުރިހާ ހައްގުތަކެއް ނިގުޅައިގަނެ، ރައްޔިތުންގެ ބާރުވެރިކަން ސަރުކާރުގެ އަތްދަށަށް ގެނައުމަށް ކަމަށެވެ. އަދި މިސަރުކާރުން އެމަސައްކަތް ފަށާފައިވާކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ރައީސް ސާލިހު ވިދާޅުވީ އެއްވެސް ހައްގަކީ ހެޔޮ ހިތުން ތަބަކަކަށްލާފައި ދޭނެ އެއްޗެއް ނޫން ކަމަށާއި، ހައްގުތައް ޖެހޭނީ ހޯދަން ކަމަށެވެ. މީގެ ކުރިން ވެސް ހައްގުތައް ހޯދިކަން ފާހަގަކުރައްވައި ރައީސް ސާލިހު ވިދާޅުވީ މިއަދު އެހައްގުތައް ކަށަވަރު ކުރުމަށް މަސައްކަތް ކުރަންޖެހޭ ކަމަށެވެ.
ރައީސް ސާލިހު ވިދާޅުވީ ބޭނުންވަނީ އަބަދުވެސް ރައްޔިތުންގެ ވެރިކަމެއް، ރައްޔިތުންގެ ބާރު ހިނގާ، ރައްޔިތުންގެ އަތްމަތީގައި ބާރު އޮންނަ ވެރިކަމެއް ގާއިމް ކުރަން ކަމަށެވެ. އަދި ރައްޔިތުންނަށް ލިބިދޭ މިނިވަންކަމާއި ހައްގުތައް ކަށަވަރުކޮށް، ރައްޔިތުންނަށް އަނިޔާވެރި ނުވާ ސަރުކާރެއް އެކުލަވާލަން އަބަދުވެސް މަސައްކަތް ކުރާ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި، މި ބާރުތައް ދެމި އޮންނާނީ ރައްޔިތުންގެ ކިބައިގައިކަން ގާނޫނުން ކަށަވަރު ކޮށްދޭ ކަމަށެވެ. ނަމަވެސް މިސަރުކާރުން މަސައްކަތް ކުރަނީ ރައްޔިތުންގެ ބާރު ކަނޑުވާލައި، ހައްގުތައް ނިގުޅައިގަތުމަށް ކަމަށް ރައީސް ސާލިހު ވިދާޅުވިއެވެ. އަދި އެކަމާ ދެކޮޅަށް މިއަދު ރައްޔިތުން ނުކުތުމަށް އެމަނިކުފާނު ގޮވާލެއްވިއެވެ.
