ބަޔާން މިއުނިކްގެ އެއް ނަންބަރު ގޯލު ކީޕަރު ޖަރުމަނުގެ މެނުއަލް ނޯޔާ އަށް ލިބުނު އަނިޔާއެއްގެ ސަބަބުން، މިއަހަރުގެ ތެރޭގައި އޭނާ އަށް ނުކުޅެވޭނެ ކަމަށް އެ ޓީމުގެ ކޯޗު ވިންސެންޓް ކޮމްޕެނީ ބުނެފި އެވެ.

ޔުއެފާ ޗެމްޕިއަންސް ލީގުގައި ބަޔާން މިއުނިކުން ޝަޚްތަރު ޑޮނެސްކާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުން ކޮމްޕެނީ ބުނީ، ނޯޔާގެ ރިބްސް އަށް އަނިޔާވެފައިވާ ކަމަށެވެ. އެ އަނިޔާގެ ސަބަބުން މިއަހަރުގެ ބާކީ އޮތް ތަނުގައި ނޯޔާ އަށް ނުކުޅެވޭނެ ކަމަށާއި، ނޯޔާ އަށް މިވަގުތު އެންމެ މުހިންމީ އަނިޔާ އިން ރަނގަޅުވުން ކަމަށް ވެސް ކޮމްޕެނީ ބުންޏެވެ. އަދި އޭނާ އަށް އުންމީދު ކުރެވެނީ ޖަނަވަރީ މަހުގެ ތެރޭގައި ނޯޔާ އަލުން އެނބުރި ކުޅުމުގެ ތެރެއަށް އާދެވުން ކަމަށް ވެސް ކޮމްޕެނީ ބުންޏެވެ.

ނޯޔާ އަށް އަނިޔާވެފައި ވަނީ ޖަރުމަނު ކަޕްގައި ބަޔާ ލެވަކޫސަންއާ ދެކޮޅަށް ކުޅުނު މެޗުގަ އެވެ. އެ މެޗުގައި ލެވަކޫސަންގެ ޖެރެމީ ފްރިމްޕޮން އަށް ފައުލް ކުރުމުގެ ތެރޭގައި ނޯޔާ އަށް އަނިޔާވެފައިވާ ކަމަށް ރިޕޯޓުތަކުގައި ވަނީ ފާހަގަކޮށްފަ އެވެ. އެ ފައުލާ ގުޅިގެން އެ މެޗުގައި ނޯޔާ އަށް ރަތް ކާޑު ދެއްކިއިރު، އެއީ އޭނާގެ ކެރިއަރުގައި ދެއްކި ފުރަތަމަ ރަތް ކާޑެވެ.

ބަޔާނަށް 540 މެޗުގައި ގޯލު ބަލަހައްޓައިދީފައިވާ ނޯޔާ އަށް ވަނީ މިފަހުން ގާތް ގާތުގައި އަނިޔާގެ މައްސަލަތަކާ ކުރިމަތިލާން ޖެހިފަ އެވެ. އަނިޔާގެ ފަހުން އަލުން ކުޅުމުގެ ތެރެއަށް ނިކުމެ އުޅެނިކޮށް، ފަރިތަކުރުމެއްގެ ތެރެއިން ވެސް ނޯޔާ އަށް ވަނީ އަނިޔާވެފަ އެވެ. އޭގެ ފަހުން ދެން އޭނާ ކުޅުމުގެ ތެރެއަށް އައިސްފައިވާއިރު، ޖަރުމަނާއެކު ނޯޔާ ވަނީ މިއަހަރުގެ ޔޫރޯ ފުޓުބޯޅަ މުބާރާތުގައި ވެސް ކުޅެފަ އެވެ.