60 އަހަރުގެ ތެރޭގައި އދ އަށް ވަޑައިގަންނަވާ ސީރިއާގެ ފުރަތަމަ ރައީސަކަށް އަލް ޝަރާ

އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި އޮންނަ، އދ ގެ ޖެނަރަލް އެސެމްބްލީގައި ބައިވެރިވެ ވަޑައިގަތުމަށް ސީރިއާގެ ރައީސް އަޙުމަދު އަލް ޝަރާ އެމެރިކާ އަށް ވަޑައިގެންފި އެވެ.

މިއީ ފާއިތުވި 60 އަހަރުގެ ތެރޭގައި އދ ގެ ޖެނަރަލް އެސެމްބްލީގައި ސީރިއާގެ ރައީސަކު ބައިވެރިވެ ވަޑައިގަންނަވާ ފުރަތަމަ ފަހަރެެވެ. އެހެންކަމުން މިއީ ސީރިއާ އަދި އަލް ޝަރާ އަށް ވެސް ޚާއްސަ ދަތުރުފުޅަކަށް ވާނެ އެވެ.

އެންމެ ފަހުން ސީރިއާގެ ރައީސަކު އދ ގެ ޖެނަރަލް އެސެމްބްލީގައި ބައިވެރިވެ ވަޑައިގެންފައި ވަނީ 1967 ވަަނަ އަހަރު އެވެ. އެއީ އަލް އަސަދު އާއިލާގެ 50 އަހަރުގެ ވެރިކަން ފެށުމުގެ ވެސް ކުރިންނެވެ. އެ ވެރިކަން ނިމުމަކަށް އައީ މިދިޔަ އަހަރުގެ ޑިސެމްބަރު މަހުގެ ތެރޭގައި ބަޝާރު އަލް އަސަދު ވެރިކަމުން ވައްޓާލުމާ ގުޅިގެންނެވެ. އެއާއެކު، 14 އަހަރުގެ ދިގު މުއްދަތަކަށް ދެމިގެން ދިޔަ ސީރިއާގެ ހަނގުރާމަ ވެސް ނިމުމަކަށް އައީ އެވެ.

ސީރިއާގެ ވެރިކަމަށް އަލް ޝަރާ ވަޑައިގެންނެވި ފަހުން، އެންމެ ފުރަތަމަ ވެސް މަސައްކަތް ކުރައްވަމުން ގެންދަވަނީ އަރަބި ޤައުމުތަކާއި، ހުޅަނގުގެ ޤައުމު ތަކާ އެކު ގުޅުން ބަދަހި ކުރުމަށެވެ. އަދި ސީރިއާގެ މެދު އަޤުލަބިއްޔަތު ރައްޔިތުންނަށް އިތުބާރު ހޯއްދެވުމަށް އޭނާ ގެންދަވަނީ ވަރަށް ބޮޑަށް މަސައްކަތް ކުރައްވަމުންނެވެ. ނަމަވެސް، ސީރިއާގެ މަޒްހަބީ ހަމަ ނުޖެހުންތަކާ ގުޅިގެން ޤައުމުގެ ނާޒުކު ޙާލަތު އިތުރަށް ގޯސްވެފައިވެ އެވެ.

އދ ގެ ޖެނަރަލް އެސެމްބްލީގައި ބައިވެރިވެ ވަޑައި ގަތުމަށް އަލް ޝަރާ ކުރައްވާ އެ ދަތުރުފުޅުގައި، ސީރިއާގެ މައްޗަށް އަޅާފައިވާ ބައެއް ފިޔަވަޅުތައް ލުއި ކުރެއްވުމަށް ވެސް މަސައްކަތް ކުރައްވާނެ އެވެ. އެގޮތުން އެމެރިކާގެ ރައީސް ޑޮނަލްޑް ޓްރަމްޕް ވަނީ، މިއަހަރުގެ މެއި މަހުގެ ތެރޭގައި ސައުދީ އަރަބިއްޔާގައި އަލް ޝަރާއާ ބައްދަލު ކުރައްވައި، އަލް އަސަދުގެ ވެރިކަމުގައި ސީރިއާގެ މައްޗަށް އަޅާފައިވާ ދަތި ކުރުމުގެ ފިޔަވަޅުތައް ލުއި ކުރުމަށް ނިންމަވައިފަ އެވެ.

މީގެ އިތުރުން، ސީރިއާ އާއި އިސްރާއީލްއާ ދެމެދު އޮތް ގުޅުމަށް ވެސް އެ ދަތުރުގައި އަލް ޝަރާ މަސައްކަތް ކުރައްވާނެ ކަމަށް ބެލެވެ އެވެ. ސީރިއާގެ ވެރިކަމުން އަލް އަސަދު ވެއްޓުނު ފަހުން، އަލް ޝަރާއުގެ ވެރިކަމާ މެދު އިސްރާއީލް އަށް ޝައްކު ކުރެވިފައިވާތީ، ސީރިއާގެ ސަރަހައްދު ތަކެއް ހިފައި، އަދި ސީރިއާގެ އަސްކަރީ މަރުކަޒު ތަަކަށް ވަނީ ހަމަލާތަކެއް ދީފަ އެވެ.

އަލް ޝަރާ ވެރިކަމާ ހަވާލުވުމަށް ފަހު، ސީރިއާގެ ފުރަތަމަ އާންމު އިންތިޚާބު އަންނަ އޮކްޓޫބަރު މަހުގެ ފަސް ވަނަ ދުވަހު ބޭއްވުމަށް ވަނީ ހަމަޖެހިފަ އެވެ. ނަމަވެސް، އެ އިންތިޚާބުގައި ރައްޔިތުން ސީދާ ވޯޓުލާ ގޮތް ނޫން އެހެން އުސޫލެއްގެ ދަށުން މެމްބަރުން އިންތިޚާބު ކުރުމަށް ވަނީ ނިންމައިފަ އެވެ. އެއީ 14 އަހަރުގެ ހަނގުރާމައިގައި ގިނަ ރައްޔިތުންގެ ރަސްމީ ލިޔެ ކިޔުންތައް ގެއްލި، އަދި ބޮޑު އާބާދީއެއް ޤައުމުން ބޭރުގައި ދިރިއުޅެމުން ދާތީ ކަމަށް ބުނެ އެވެ.