ސީރިއާގެ އައު ޤާނޫނު ހަދާ މަޖިލީހަށް މެމްބަރުން އިންތިޚާބު ކުރުމަށް އެ ޤައުމުގައި ވޯޓުލާން ފަށައިފި އެވެ.

އާދީއްތަ ދުވަހު ވޯޓުލާން ފަށާފައިވާއިރު، މިއީ ސީރިއާގެ ކުރީގެ ރައީސް ބަޝާރު އަލް އައްސަދުގެ ވެރިކަން ނިމުނު ފަހުން، އެންމެ ފުރަތަަމ ފަހަރަށް ސީރިއާގެ ޤާނޫނު ހަދާ މަޖިލީހުގެ އިންތިޚާބަށް ވޯޓުލާ ފަހަރެވެ. މިއީ ސީރިއާގެ މިހާރުގެ ވެރި ކަމުގެ ދަށުން ބޭއްވޭ އެންމެ މުހިންމު އިންތިޚާބެވެ.

ސީރިއާގެ ވެރިކަން ވައްޓާލާފައި ވަނީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ. އެއަށް ފަހު ސީރިއާގެ ރައީސް ކަމުގެ މަޤާމަށް ވަޑައިގެންނެވީ އަޙުމަދު އަލް ޝަރާ އެވެ. ޝަރާ އާއި އޭނާގެ ސަރުކާރުން މަސައްކަތް ކުރަމުން ދަނީ 14 އަހަރުގެ ހަނގުރާމައިގައި ބައިބައިވެފައިވާ ޤައުމު އެއްކޮށް، މައިނޯރިޓީ ޖަމާއަތްތަތކުގެ އިތުބާރު ހޯދުމަށެވެ.

ސީރިއާގައި ވޯޓުލުން ފަށާފައި ވަނީ ހެނދުނު ނުވައެއް ޖެހިއިރު އެވެ. އަދި ހަވީރު ވަންދެން އިންތިޚާބުގެ ވޯޓުލުން ކުރިއަށް ދާނެ އެވެ. މި އިންތިޚާބުގައި ޖުމުލަ 6000 މަންދޫބުން ބައިވެރިވެ، ސަރަހައްދު ތަކުގެ އިންތިޚާބީ ކޮލެޖު ތަކުގައި ވޯޓުލާނެ އެވެ.

ސީރިއާގެ ރައީސް އަލް ޝަރާ އައްޔަން ކޮށްފައިވާ ކޮމެޓީ އަކުން ވަނީ 1570 ކެންޑިޑޭޓުން އިންތިޚާބުގައި ވާދަ ކުރުމަށް ހުއްދަ ދީފަ އެވެ. މިދިޔަ ހަފުތާގެ ތެރޭގައި މި ކެންޑިޑޭޓުން ވަނީ އެ މީހުންގެ ސިޔާސަތުތައް ހާމަ ކުރުމަށް ބަހުސްތަކުގައި ވެސް ބައިވެރިވެފަ އެވެ.

ސީރިއާގެ ޤާނޫނު ހަދާ މަޖިލީހުގެ 210 ގޮނޑީގެ ތިން ބައި ކުޅަ ދެ ވައި މެމްބަރުން ހޮވުމަށް އެ ޤަައުމުގައި ވޯޓުލާއިރު، އާދިއްތަ ދުވަހުގެ ރޭގެ ވަގުތެއްގައި ނަތީޖާ އިއުލާން ކުރެވޭނެ ކަމަށް ވަނީ އަންދާޒާ ކޮށްފަ އެވެ. ނަމަވެސް، ޤާނޫނު ހަދާ މަޖިލިސް ރަސްމީކޮށް އެކުލަވާލެވޭނީ ބާކީ ތިން ބައި ކުޅަ އެއް ބައި މެމްބަރުން އަލް ޝަރާ އައްޔަން ކުރެއްވުމުންނެވެ.

ސީރިއާގެ އިންތިޚާބުގައި ވޯޓު ލަނީ އާންމު ހުރިހާ ރައްޔިތުންނެއް ނޫނެވެ. އޭގެ ބަދަލުގައި ވޯޓު ލާނީ ވަކި އުސޫލެއްގެ ދަށުން މަންދޫބުންނެވެ. އެއީ ހަނގުރާމައިގެ ސަބަބުން މިލިއަނެއްހާ ރައްޔިތުން ގެދޮރު ދޫކޮށް ދާން ޖެހިފައިވުމާއި، އާބާދީގެ ޞައްޙަ މައުލޫމާތު ނެތުމުގެ ސަބަބުންނެވެ.

ސަލާމަތީ އަދި ސިޔާސީ ސަބަބުތަކަށް ޓަކައި، މައިނޯރިޓީ ޖަމާއަތްތަކުގެ ބާރުގެ ދަށުގައިވާ ތިން ޕްރޮވިންސް ގައި ވޯޓުލުން ފަސް ކުރެވިފައިވާ އިރު، އެ ސަބަބާ ހުރެ ޤާނޫނު ހަދާ މަޖިލީހުގެ 19 ގޮނޑި ހުސް ވެފައި ހުންނާނެ އެވެ.