ގިނަ އަހަރު ތަކަކަށް ބަންދު ކޮށްފައި ހުރި ސީރިއާގެ އެމްބަސީ އިނގިރޭސިވިލާތުގައި ހުޅުވައިފި އެވެ.

އެމްބަސީ ހުޅުއްވައިދެއްވީ ސީރިއާގެ މިނިސްޓަރ އޮފް ފޮރިން އެފެއަރޒް އެންޑް އެކްސްޕަޓްރިއޭޓް އަސާދު އަލްޝައިބާނީ ކަމަށް ބުރާސްފަތި ދުވަހު ސީރިއާގެ ސަރުކާރުގެ ނޫސް އޭޖެންސީ ސާނާ އިން ރިޕޯޓުކޮށްފައިވެއެވެ.

އެމްބަސީ ހުޅުވުމުގެ ގޮތުން ބުރާސްފަތި ދުވަހު ލަންޑަނުގައި ހުންނަ ސީރިއާގެ އެމްބަސީ ގައި ގައުމީ ދިދަ ވަނީ ނަގާފަ އެވެ.

އަލްޝައިބާނީ ވިދާޅުވީ، އެމްބަސީ ހުޅުވިގެން ދިއުމާ އެކު އާ ޒަމާނެއް ފެށި، ބައިނަލް އަގްވާމީ ދުނިޔޭގައި ސީރިއާގެ ދައުރު އަލުން ޤާއިމުކުރުމުގައި އެހީތެރިވާނެ ކަމަށެވެ.

އިނގިރޭސި ވިލާތުން ސީރިއާގެ ރައީސް އަހްމަދު އަލްޝަރާ އާ ދެކޮޅަށް އަޅާފައިވާ ފިޔަވަޅުތައް ހުސްވި ހަފްތާ ގައި ވަނީ އުވާލާފަ އެވެ.