ގާނޫނު އަސާސީއަށް ގެނެސްފައިވަނީ އިސްލާހެއް ނޫން، އެއީ ގާނޫނު އަސާސީ ގަޑުބަޑު ކުރުން: ފައިސަލް
9 ޑިސެމްބަރު 2024 | ހޯމަ 02:17ރައްޔިތުން ބޭނުންވަނީ ތިން ބާރު ވަކިވެފައިވާ ނިޒާމެއް
ކުރީގެ ނައިބު ރައީސް ފައިސަލް ނަސީމް
ދިވެހިރާއްޖޭގެ ގާނޫނު އަސާސީއަށް ގެނެސްފައިވަނީ އިސްލާހެއް ނޫން ކަމަށާއި، އެއީ ގާނޫނު އަސާސީ ގަޑުބަޑު ކުރުން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ ގާނޫނުއަސާސީގެ ދިފާއުގައި - ވިލިމާލެގައި ބޭއްވި ޖަލްސާގައި ފައިސަލް ވިދާޅުވީ ފެހި ގާނޫނު އަސާސީ ހޯދާފައިވަނީ ވަރަށް ރަނގަޅު މަގުސަދެއްގައި ކަމަށާއި، އެގާނޫނު އަސާސީ ގެނައުމަށް މުޅި ރާއްޖޭގެ ރައްޔިތުން ބުރަ މަސައްކަތްތަކެއް ކުރި ކަމަށެވެ.
ފައިސަލް ވިދާޅުވީ ގާނޫނު އަސާސީން ރައްޔިތުން ބޭނުންވަނީ ތިން ބާރު ވަކިވެފައިވާ ނިޒާމެއް ކަމަށެވެ.
އެގޮތުން މިގައުމުގައި މިނިވަންކަމާއެކު މިނިވަން މުއައްސަސާތައް ފަންގްޝަން ވާންޖެހޭ ކަމަށާއި، ޖުޑިޝަރީ އިންސާފުވެރިވާންޖެހޭ ކަމަށެވެ. އަދި ވިދާޅުވީ މިކަންކަން ރައްޔިތުން އެދޭ ގޮތަށް ތަންފީޒު ވެގެންދިޔައީ ގާނޫނު އަސާސީން ކަމަށެވެ.
މީގެ އިތުރުން ފައިސަލް ވިދާޅުވީ 20 ވަނަ މަޖިލީހުގައި ސަރުކާރު ހިންގާ ޕާޓީ ޕީއެންސީގެ މެންބަރުން މެދުވެރިކޮށް ގާނޫނު އަސާސީއަށް ގެނެސްފައިވަނީ އިސްލާހެއް ނޫން ކަމަށާއި، އެއީ ގާނޫނު އަސާސީ ގަޑުބަޑު ކުރުން ކަމަށެވެ. ގައުމުގައި ރަނގަޅުކުރަންޖެހޭ ވަރަށް ގިނަކަންކަން އެބަހުރި ކަމަށާއި، ރައްޔިތުންނަށް ލިބެމުންދިޔަ ޚިދުމަތްތައް ކަމަށްވާ އާސަންދަ، އެންސްޕާ ފަދަ ޚިދުމަތްތައް ހަރުދަނާކޮށް، އެކަންކަން ރަނގަޅު ކުރުމަށް ފައިސަލް ގޮވާލެއްވިއެވެ.
ރައްޔިތުންގެ މަޖިލީހަށް އިޝާރާތް ކުރައްވައި ފައިސަލް ވިދާޅުވީ އެގޭގައި ތިބެނީ ރައްޔިތުން އިންތިޚާބު ކުރާ ރައްޔިތުންގެ ހައްގުގައި ވަކާލާތުކުރާ މެންބަރުން ކަމަށެވެ. އަދި ރައްޔިތުންނަށް ކަމެއްދިމާވާ ހާލަތުގައި ރައްޔިތުންގެ ވާހަކަދައްކަންޖެހޭ މެންބަރުން ކަމަށެވެ. ނަމަވެސް މިސަރުކާރުން ގާނޫނު އަސާސީއަށް މިގެނައި ބަދަލާއެކު މަޖިލިސް މެންބަރަކު ކިތަންމެ ބޮޑަށް ރައްޔިތުންގެ ހައްގުގައި ވާހަކަދައްކަވަން ބޭނުންވި ނަމަވެސް އެކަން ނުކުރެވޭނެ ކަމަށާއި، އެ ހައްގު ނިގުޅައިގަނެފައިވާ ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ ގާނޫނު އަސާސީން ރައްޔިތުންނަށް ލިބިފައިވާ ހައްގުތައް ގެއްލިގެންދާން އެއްވެސް ރައްޔިތެއް ބޭނުންނުވާނެ ކަމަށެވެ. ނަމަވެސް ފަހަރަކު ހައްގެއް ހަނިވެ، ގެއްލެމުންދާ ކަމަށެވެ. އެހެންކަމުން ގާނޫނު އަސާސީގެ ދިފާއުގައި ނުކުތުމަށް ފައިސަލް ވަނީ ގޮވާލައްވާފައެވެ.
