ރައީސް މުއިއްޒުގެ ވެރިކަން ފެށުނީ ދޮގަކުން، ދޮގު ނުހަދާނެ ކަމަށް އުންމީދު ކޮށްގެން ނުވާނެ
ގާނޫނު އަސާސީގެ ދިފާއުގެ ޕްރޮގްރާމްގައި މަޝްހޫރު ގާނޫނީ ވަކީލު އާދަމް އާސިފް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ އެންމެ ގާތް މީހުންނަށް ވެސް އަނިޔާވެރިވެފައިވާ ބޭފުޅެއް ކަމަށާއި، ރައްޔިތުންނަށް އަނިޔާވެރިނުވާނެ ކަމަށް ވިސްނައިގެން ނުވާނެ ކަމަށް މަޝްހޫރު ގާނޫނީ ވަކީލު އާދަމް އާސިފް ވިދާޅުވެއްޖެއެވެ.
ގާނޫނު އަސާސީން ލިބިދޭ ހައްގުތައް ފުނޑާލަމުންދާތީ އެކަމާއި ދެކޮޅަށް އަޑު އުފުލުމަށް 10 ޑިސެމްބަރު ވާ އަންގާރަ ދުވަހު ކާނިވާ ސަރަހައްދުގައި އެއްވުމެއް ބޭއްވުމަށް އެމްޑީޕީން ދަނީ މަސައްކަތްކުރަމުންނެވެ.
ރާއްޖެޓީވީގެ ގާނޫނު އަސާސީގެ ދިފާއުގައި ކަވަރޭޖްގައި ވަކީލު އާސިފް ވިދާޅުވީ ރައީސް މުއިއްޒަކީ އެންމެ ގާތް ބޭފުޅުންނަށް ވެސް އަނިޔާވެރިވެފައިވާ ބޭފުޅެއް ކަމަށާއި، ކުރީގެ ރައީސް އަބްދުﷲ ޔާމީންގެ ފޮޓޯފުޅާއި، ނަންފުޅު އަދި ހުސްގޮނޑިކޮޅު ދައްކައިގެން ވެރިކަމަށް ވަޑައިގަންނަވައި، ޔާމީނަށް ވެސް އަނިޔާވެރިވެފައިވާ ކަމަށެވެ.
ކުރެފައިވާ ތަޖުރިބާއަށް އިޝާރާތް ކުރައްވައި އާސިފް ވިދާޅުވީ ރައީސް މުއިއްޒު ރައްޔިތުންނަށް އަނިޔާވެރިނުވާނެ ކަމަށް އުންމީދުކޮށް، ވިސްނައިގެން ނުވާނެ ކަމަށާއި، އެމަނިކުފާނު އަނިޔާވެރިވާނެ ކަމަށެވެ. އަދި ވިދާޅުވީ ރައީސް މުއިއްޒުގެ ވެރިކަން ފެށުނީ ދޮގަކުން ކަމަށާއި، ދޮގު ނުހަދާނެ ކަމަށް އުންމީދު ކޮށްގެން ނުވާނެ ކަމަށެވެ. ރައީސް މުއިއްޒުގެ ދޮގުތައް މިހާރު ރައްޔިތުންނަށް ހާމަވަމުންދާ ކަމަށާއި، ރައީސް މުއިއްޒު ވައުދުފުޅު ފޮތަކީ ވެސް ދޮގު ފޮތެއް ކަމަށް އޭނާ ވިދާޅުވިއެވެ.
އާސިފް ވިދާޅުވީ ކުރިއަށް އޮތްތަނުގައި ރައީސް މުއިއްޒު ރައްޔިތުންގެ ހައްގުތައް ނިގުޅައި ގަންނާނެ ކަމަށާއި، ގާނޫނު އަސާސީން ހައްގުތައް ހަނިކުރާނެ ކަމަށެވެ. އަދި މިހާރު މިސަރުކާރުގެ ހުދުމުހުތާރުކަން ފެންނަމުންދާއިރު، އަމާޒު ހިފާފައިވަނީ ސީދާ ރަސްކަމާ ދިމާލަށް ދިއުމަށް ކަމަށް އޭނާ ވިދާޅުވިއެވެ.
