ރައްޔިތުން ނުކުމެ، ގާނޫނު އަސާސީ އިމުގެ ތެރެއިން ރައީސް މުއިއްޒުގެ ވެރިކަން ބަދަލުކުރަންޖެހޭ: ޔައުގޫބް
ރައީސް މުއިއްޒު ރައްޔިތުން ގާތުގައި ދޮގު ހެއްދެވުން ނޫން ކަމެއް ނުކުރައްވާ
ބުރާސްފަތި ދުވަހުގެ ރޭ ކުރިއަށް ގެންދިޔަ ގާނޫނުއަސާސީގެ ދިފާއުގައި - ބޮޑު ސައްލާގައި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވާހަކަދައްކަވަނީ
ދިވެހި ރައްޔިތުން ނުކުމެ، ގާނޫނު އަސާސީ އިމުގެ ތެރެއިން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަން ބަދަލުކުރަންޖެހޭ ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ ގާނޫނުއަސާސީގެ ދިފާއުގައި - ބޮޑު ސައްލާގައި ވާހަކަދައްކަވަމުން ޔައުގޫބް ވިދާޅުވީ ރައީސް މުއިއްޒަށް ދޮގު ހެއްދެވުމުގެ ބަލިޖެހިފައިވާ ކަމަށާއި، ދޮގު ހައްދަވަމުން ހައްދަވަމުން ގޮސް މިހާރު 2026 ވަނަ އަހަރުގެ ދެވަނަ ކުއާޓަރާ ހަމައަށް ދޮގު ހައްދަވާފައިވާ ކަަމަށެވެ. ވެރިކަމަށް ވަޑައިގެން ރައްޔިތުން ގާތުގައި ދޮގު ހެއްދެވުން ނޫން ކަމެއް އެމަނިކުފާނު ނުކުރައްވާ ކަމަށާއި، މިހާރު ރައްޔިތުންނަށް ވަރަށް ބޮޑަށް ދަތި ކުރަމުންދާ ކަމަށް ޔައުގޫބް ވިދާޅުވިއެވެ. އަދި ވިދާޅުވީ ރައްޔިތުންނަށް މީގެ ކުރިން އެއްވެސް އުދަނގޫ ކަމަކާނުލައި ލިބެމުންދިޔަ އާސަންދަ، އެންސްޕާގެ ޚިދުމަތްތައް ކަނޑާލައި، ރައްޔިތުންގެ ފައިސާއިން ވަގު ޓީވީއެއް ހުޅުވާފައިވާ ކަމަށެވެ.
މިސަރުކާރުގައި ވައްކަން ކުރުން އިންތިހާއަށް އޮތްކަން ފާހަގަކުރައްވައި ޔައުގޫބް ވިދާޅުވީ މިދިޔަ އެއް އަހަރުގެ ތެރޭގައި އަބަދުވެސް އަޑުއިވެގެން ދިޔައީ އެމްޑީޕީން އިސްވެ އޮވެ ރައްޔިތުން ގޮވައިގެން މިވެރިކަމާއި ދެކޮޅަށް ނުކުންނަންޖެހޭ ކަމުގެ އަޑުތައް ކަމަށެވެ. ވެރިކަން ކުރުމަށް 5 އަހަރުގެ ދައުރެއް ދޭންޖެހޭ ކަމަށް އޮތް ނަމަވެސް ދިވެހި ރައްޔިތުން މިހާރު މިވެރިކަން ބާއްވަން ބޭނުންނުވާ ކަމަށް ބުނަމުންދާ ކަމަށް އޭނާ ވިދާޅުވިއެވެ. އެހެންކަމުން މިވެރިކަން ގާނޫނީ އިމުގެ ތެރެއިން ބަދަލުކުރަންޖެހޭ ކަމަށާއި، ވެރިކަން ބަދަލު ކުރެވޭނީ ދިވެހި ރައްޔިތުންނަށް ކަމަށް ޔައުގޫބް ވިދާޅުވިއެވެ.
ޔައުގޫބް ވިދާޅުވީ 2023 ވަނަ އަހަރު ބޭއްވިގެން ދިޔަ ރިޔާސީ އިންތިޚާބުގެ ތެރޭގައި ވެސް ރައީސް މުއިއްޒާއި، ވެރިކަން ހަވާލުކޮށްފިނަމަ ވާނެ ގޮތްތައް ރައްޔިތުންނަށް ވިސްނައިދެމުން ދިޔަ ކަމަށެވެ. ނަމަވެސް ރައީސް މުއިއްޒު އިންތިޚާބު ކުރުމުން ފާއިތުވި އަހަރުގެ ތެރޭގައި ގައުމަށް ވެގެންދިޔަ ގޮތް މިހާރު ދިވެހި ހުރިހާ ރައްޔިތުންނަށް ސާފުވެފައިވާ ކަމަށް އޭނާ ވިދާޅުވިއެވެ. އަދި ރައީސް މުއިއްޒަކީ ވެރިކަން ކުރަން ހެޔޮވާވަރުގެ ބޭފުޅެއް ނޫންކަން މިއަދު ސާބިތުވެފައިވާ ކަމަށް ޔައުގޫބް ވިދާޅުވިއެވެ.
އެހެންކަމުން މިސަރުކާރާ ދެކޮޅަށް މިމަހުގެ 10 ވަނަ ދުވަހު ބާއްވާ އެއްވުމުގައި ހުރިހާ ރައްޔިތުން ބައިވެރިވުމަށް އޭނާ ވަނީ އެދިވަޑައިގެންފައެވެ.
