ޤާނޫނުއަސާސީ ފުނޑާލާތީ މަޖިލީހުގެ މެމްބަރުންނާއި، ކުރީގެ މެމްބަރުންގެ ކަންބޮޑުވުންތައް ބަންޑުންކޮށްލައިފިއެވެ.
އެ ބޭފުޅުން އެ ޝުއޫރުތައް ފާޅުކޮށްފައި ވަނީ "ޤާނޫނުއަސާސީގެ ދިފާއުގައި - ބޮޑު ސައްލާ" ނަމުގައި އެމްޑީޕީ ހަރުގޭގައި ކުރިއަށް ގެންދިޔަ ސައްލާގައެވެ.
ރައްޔިތުންގެ މަޖިލީހުގެ މެމްބަރުންނާއި ކުރީގެ މެމްބަރުން އަދި އެމްޑީޕީގެ ގައުމީ މަޖިލީހުގެ މެމްބަރުން ވަނީ ސަރުކާރާއި މެދު ހުރި ނުރުހުންތަކާއި ކަންބޮޑުވުންތައް ހާމަކުރުމަށް ޝުއޫރު ފާޅުކުރައްވާފައެވެ.
އެގޮތުން އެ ސައްލާގައި ވާހަކަދައްކަވަމުން ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރ މުހައްމަދު ރާއީ ވިދާޅުވީ އިތުރު ދޮގު ފިޔަވާ އެއްވެސް ވައުދެއް ރައީސް މުއިއްޒު އަށް ނުފުއްދޭ ކަމަށެވެ. ހައްގުތައް ގެއްލިގެންދާ ކޮންމެ ދަނޑިވަޅެއްގައި ވެސް އެމްޑީޕީ އަކީ އަބަދުވެސް ހައްގުތަކަށްޓަކާ ތެދުވާ ބައެއް ކަމަށް ރާއި ވަނީ ވިދާޅުވެފައެވެ. އެގޮތުން ތެދާއި ހައްގު ގޮތުގެ ހައްގުގައި އަބަދުވެސް އެ ޕާޓީން ދެމި ތިބޭނެ ކަމަށް އޭނާ ވިދާޅުވިއެވެ. މީގެ އިތުރުން ރައީސް ޑރ.މުހައްމަދު މުއިއްޒު އަކީ އެކި ފަހަރު އެކި ސިފައިގައި ފެންނަ ބޭފުޅެއް ކަމަށް ސިފަކުރައްވާ ރާއީ ވަނީ ރައީސް އަކީ ބަހާއި އަމަލާއި ދިމާ ނުވާ ބޭފުޅެއްކަމަށް ވިދާޅުވެފައެވެ.
ރައީސް މުއިއްޒު ގެންދަވަނީ ވިޔަފާރިވެރިންނާއި މެދު އިހާނެތިކޮށް ހިތަމުން ކަމަށް ވެސް އޭނާ ވަނީ ވިދާޅުވެފައެވެ. ރައީސް މުއިއްޒުގެ ނުރަނގަޅު ވާހަކައަކީ ރެއާއި ދުވާލު ދެއްކިއަސް ކޮޅުން ނުލާވަރުގެ ދިގު ވާހަކަ އެއް ކަމަށް ރާއި ވިދާޅުވިއެވެ.
ރައީސް މުއިއްޒު އެކި ސިފަ ސިފައިގައި ފެނޭ. މިނިސްޓްރީގަވެސް އެބަ ފެނޭ. ޝިޔާމްގެ މޫނުފުޅު އަޅުއްވައިގެން ހުންނަވަނީ ރައީސް މުއިއްޒު. ފެންނާނެ މަސްވެރިންނަށް ހަދާ ގޮތް. ޓުއަރިޒަމް މިނިސްޓްރީ. އަނެއްކާ އެތަނުން ފެނޭ. ބަޖެޓް ފޮތް ނިމުނު އިރު އަސްތައުފިރުއްﷲ ފިނޭންސް މިނިސްޓްރީގައި ވެސް ހުންނެވީ ރައީސް މުއިއްޒު.ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރ މުހައްމަދު ރާއީ
އެ ސައްލާގައި ވާހަކަދައްކަވަމުން ދިއްގަރު ދާއިރާގެ ކުރީގެ މެމްބަރު އިކްރާމް ހަސަން ވަނީ މަސްވެރިންނާއި، ދަނޑުވެރިން އަދި އެހެނިހެން ދާއިރާތަކަށް ވެސް މި ސަރުކާރުން ދިނީ އިހާނެތިކަން ކަމަށް ވިދާޅުވެފައެވެ. މިހާ އަވަހަށް ރައްޔިތުން މިހާބޮޑަށް މާޔޫސްކޮށްލި ސަރުކާރެއް ނާންނަކަމަށް އިކްރާމް ވަނީ ވިދާޅުވެފައެވެ. ހަމައެހެންމެ އާއްމު ރައްޔިތުން މާޔޫސްވާ އިރު އެމްޑީޕީން ނުނިކުންނަކަމުގެ ޝަކުވާ އާއްމުން ކުރަމުންދާ ކަމަށާއި ޑިސެމްބަރ 10 ވަނަ ދުވަހު އެމްޑީޕީން ނުކުންނަނީ އެ އަޑު އަހައިގެން ކަމަށް އޭނާ ވިދާޅުވިއެވެ.
އަހަރެއްހާ ދުވަސް ވީ އިރު ސަރުކާރަށް އެއްވެސް ކަމެއްގައި ނަތީޖާ އެއް ނުދެއްކޭ ކަމަށް އިކްރާމް ވިދާޅުވިއެވެ. ޑިސެމްބަރ 10ގައި ޤާނޫނު އަސާސީގެ ހިމާޔަތުގައި އާއްމުން ނުކުންނަން ޖެހޭ ކަމަށާއި އާއްމުންގެ ފަރާތުން އެމްޑީޕީ އަށް ދޭންވީ ވަގުތަކީ މިއީ ކަމަށް އޭނާ ވިދާޅުވިއެވެ.
އެ ސައްލާގައި ވާހަކަދައްކަވަމުން ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވަނީ މި ސަރުކާރަށް ކުރެވޭ ހަމައެކަނި ކަމަކީ ދޮގާއި މަކަރު ހެދުން ކަމަށް ސިފަކުރައްވާފައެވެ. ރައްޔިތުން ނުކުމެ ސަރުކާރާއި ދެކޮޅަށް އަޑު އުފުލަން ޖެހޭ މައިގަނޑު ސަބަބަކީ އެއީ ކަމަށް އޭނާ ވިދާޅުވިއެވެ. ރާއްޖޭގެ ހުރިހާ ސިނާއަތެއްގެ މީހުން ތިބީ މާދަމާ ވާނެ ގޮތެއް ނޭނގި ކަމަށާއި ހުރިހާ ސިނާއަތެއް ވެސް ތިބީ ރުޅި އައިސްފައި ކަމަށް އޭނާ ވިދާޅުވިއެވެ. ރައީސް މުއިއްޒުގެ ކަމަކީ ރައްޔިތުންގެ ހައްގުތައް ނިގުޅައިގަނެ، ހައްގުތަކަށް އަރައިގަތުން ކަމަށް އޭނާ ވިދާޅުވިއެވެ. މީގެ އިތުރުން ތިނަދޫ ދެކުނު ދާއިރާގެ ކުރީގެ މެންބަރު ޢަބްދުﷲ ސަނީފް ވަނީ ރައީސް މުއިއްޒު ވަނީ މުޅިން ޤާނޫނުއަސާސީ އާއި ޚިލާފުވެފައި ކަމަށް ވިދާޅުވެފައެވެ. ވެރިކަން ފެށޭނީ ވެސް ނިމެނީވެސް ރައްޔިތުންގެ ކިބައިން ކަމަށް ވާއިރު އެކަން ރައީސް މުއިއްޒު ހަނދުމަފުޅު ނެތް ކަމަށް އޭނާ ވިދާޅުވިއެވެ. ރައީސް މުއިއްޒު ވަނީ މަޖިލިސް މެމްބަރުންގެ ކަރުގައި މަޅި ޖައްސާފައި ކަމަށް ސަނީފް ވަނީ ސިފަކުރައްވާފައެވެ. އަދި މިނިވަން މުއައްސަސާތަކަށް ވެސް އިންތިހާއަށް ބާރު ފޯރުވާފައިވާ ކަމަށް އޭނާ ވަނީ ވިދާޅުވެފައެވެ.
މިނިވަން މުއައްސަސާތައް މި ބޭފުޅާ މިހާ މައްސަލަ ގިނަ ބޭފުޅަކަށް ވީމަ ކަންނޭގެ، ބާރުތައް އެއްކޮށްލައިފި. އެހެންވީމަ އާއްމުން އެއްވާންވީ ވަގުތަކީ މިއީ.ތިނަދޫ ދެކުނު ދާއިރާގެ ކުރީގެ މެންބަރު ޢަބްދުﷲ ސަނީފް
އެ ސައްލާގައި ވާހަކަދައްކަވަމުން އާރްޑީސީގެ ކުރީގެ މެނޭޖިން ޑިރެކްޓަރ މޫސާ އަލި މަނިކް (މޫކޭ) ވަނީ މި ސަރުކާރުން ވަނީ އެންސްޕާ ދަވާލާފައި ކަމަށް ވިދާޅުވެފައެވެ. މި ސަރުކާރުގެ ކަމަކީ ކަންކަން ފަހަތަށް ގެންދިއުން ކަމަށާއި އެކަމުގެ ސަބަބުން ރައީސް މުއިއްޒު އާއްމުންނަށް ސިފަކުރެވެނީ ހުސް އުނބެއްގެ ގޮތުގައި ކަމަށް މޫކޭ ވަނީ ވިދާޅުވެފައެވެ. އާއްމުންގެ ދިރިއުޅުމަށް މި އެއްއަހަރު ވީ އުނދަނގޫތޯ ނުވަތަ ނޫންތޯ ވަޒަންކޮށް އެކަމާއި ދެކޮޅަށް އަޑު އުފުލަންވީ ވަގުތަކީ މިއީ ކަމަށް އޭނާ ވިދާޅުވިއެވެ. ރައްޔިތުން ނުކުތުމުން އެއަށް ވުރެ ބާރު ގަދަ އެހެން މީހެއް ނުހުންނާނެ ކަމަށް މޫކޭ ވަނީ ވިދާޅުވެފައެވެ.
އެމްޑީޕީގެ ޤައުމީ މަޖިލިސް މެމްބަރުން ވެސް ވަނީ އެ ސައްލާގައި މި ސަރުކާރަށް ވަރަށް ބޮޑަށް ފާޑުކިޔާފައެވެ. ކޮންމެ ދާއިރާއަކަށް ބަލާލިއަސް ފެންނަނީ އާއްމުން މާޔޫސްވެފައިވާ މަންޒަރުކަމަށް ޤައުމީ މަޖިލީހުގެ މެމްބަރުން ވަނީ ވިދާޅުވެފައެވެ. އެގޮތުން އަސާސީ ސަބްސިޑީތައް ކަނޑާލުމާއި އިޖްތިމާއީ ރައްކާތެރިކަން ގެއްލުވާލުމަކީ އެއީ މިއަދު ސަރުކާރާއި މެދު އާއްމުން އެންމެ ބޮޑަށް ނުރުހޭ އެއް ސަބަބު ކަމަށް އެ ބޭފުޅުން ވިދާޅުވިއެވެ.
