ޓެކްސީ ޑްރައިވަރުން ތަކަކަކާ 3 މެމްބަރުން މަޖިލީހުގައި ބައްދަލު ކޮށްފި
ޑިސެމްބަރު 10 ގެ ކުރިން ރައީސް މުއިއްޒު އާ ޑްރައިވަރުންނާ ބައްދަލު ކުރެވެނޭ ގޮތް ހަދަައިދޭނެ ކަމުގެ ޔަގީންަކަން ދިން
ޓެކްސީ ޑްރައިވަރުން މަޖިލިސް ކުރިމަތީގައި ހުއްޓިލައިގެން
ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ 3 މަޖިލިސް މެމްބަރަކު ޓެކްސީ ޑްރައިވަރުން ތަކަކާ ބުރާސްފަތި ދުވަހު މަޖިލިހުގައި ބައްދަލު ކޮށްފިއެވެ.
މަޖިލީހުގައި އާންމު ކޮށް މިފަދަ ކަންކަން ހިނގަނީ ކޮމިޓީގެ އިންތިޒާމު ތަކުގެ ތެރެއިން ކަމަށް ވިޔަސް މިއީ ކިހިނެއް އިންތިޒާމްވި ބައްދަލުވުމެއް ކަމެއް ސާފުވާ ގޮތް ވަނީ ނުވެފައެވެ.
އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ބައްދަލުވުމަށް ވަކިވަކިން ޓެކްސީ ޑްރައިވަރުންނާ ގުޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދުއެވެ.
ބުރާސްފަތި ދުވަހުގެ ބައްދަލުވުމަށް މަޖިލީހަށް ގެންދިޔަ ޑްރައިވަރުންނާ ބައްދަލު ކުރެއްވީ ޕީއެންސީގެ ޕާލިމެންޓަރީ ގްރޫޕްގެ ލީޑަރު އިނގުރައިދޫ ދާއިރާގެ މެމްބަރު އިބްރާހީމް ފަލާހް އާއި، ވިލިމާލެ ދާއިރާގެ މެމްބަރު މުހައްމަދު އިސްމާއީލް އާއި ހުޅުދޫ ދާއިރާގެ މެމްބަރު މުހައްމަދު ޝާހިދު އެވެ.
މީގެ ކުރިން މަޖިލީހުގެ ރަސްމީ ކޮމިޓީ ބައްދަލުވުމެއްގައި ޓެކްސީ ޑްރައިވަރުންގެ ކަންބޮޑުވުންތަކުގެ ވާހަކަ ވަރަށް ތަފްސީލު ކޮށް ހާމަކޮށްފައި ވަނިކޮށް ބުރާސްފަތި ދުވަހުގެ ބައްދަލުވުމުގައި ޑްރައިވަރުންގެ ކަންބޮޑުވުން ތަކަކީ ކޮބާތޯ މެމްބަރުން އެއްސެވި ކަމަށް ވެއެވެ.
ޓެކްސީ ޑްރައިވަރުން ބައްދަލުވުމުގައި ހުށަހެޅި ކަންތައްތަކުގެ ތެރޭގައި:
• ސަރުކާރުން ޓެކްސީ ފްލީޓް ވުޖޫދަށް ނުގެންނާނެ ކަމަށް ޕަބްލިކަށް އިޢުލާން ކުރުން؛
• ވޭން ޑްރައިވަރުންގެ އަގުތައް ކުރިން ހުރި އަގުތަކަށް ބަދަލު ކުރުން؛
• އެސްއެމްއީ ލޯނުތަކަށް ގެނެސްފައިވާ ކާރުތަކުގެ ރަޖިސްޓްރޭޝަން ޕްރޮސެސް އަވަސް ކޮށްދިނުން؛
• އެއަރޕޯޓް އަދި މާލޭގެ ޓްރެފިކް ފްލޯ ޓެކްސީ ޑްރައިވަރުންނަށް ފަސޭހަ ކަމާއެކު ދުއްވޭނެ ގޮތަކަށް ހަދައި ދިނުމާއި އަދި ފަސޭހައިން ދަތުރު ނެގޭނެ މާހައުލަކަށް ހަދައި ދިނުން؛
• ރައީސް މުއިއްޒު އާ ވީ އެންމެ އަވަހަކަށް ބައްދަލުވާނެ މަގު ފަހި ކޮށްދިނުން؛
• ޓެކްސީ ޑްރައިވަރުންގެ ދަފްތަރު އަލުން ހުޅުވާލުން؛ އަދި
• މާލޭގައި ވަގުތީ އަދި ދާއިމީ ޕާކް ކުރެވޭނެ ގޮތެއް ހަދައިދިނުމެވެ.
ޓެކްސީ ޑްރައިވަރުން މި ކަންކަން ހުށަހެޅުމުން މެމްބަރުން ދިން ޖަވާބަކީ "ތީގައި ތިއުޅެނީ ވަރަށް ކުދި ކުދި މައްސަލަތަކެއް،" ކަމަށެވެ. އަދި ވީ އެންމެ އަވަހަކަށް ރައީސްއާ ބައްދަލު ކުރެވޭނެ ގޮތެއް ހަދައި ދޭނެ ކަމަށް ވިދާޅުވިއެވެ.
މެމްބަރުން ޔަގީންކަން ދިން ގޮތުގައި ޑިސެމްބަރު 10 ގެ ކުރިން ރައީސް މުއިއްޒު އާ ޑްރައިވަރުންނާ ބައްދަލު ކުރެވޭނެ ގޮތެއް ހަދައިދެއްވާނެއެވެ.
"ހައްލު ނުކުރެވޭނެ އެއްވެސް ކަމެއް ތީގައި ނެތް؛" މެމްބަރުން ޑްރައިވަރުންނަށް ޔަގީން ކަން ދެއްވިއެވެ.
ބައްދަލުވުމަށް ޑްރައިވަރުން ވެއްދި އިރު އެމީހުންގެ އަތުގައި ހުރި ފޯނު އަތުުލުމުގެ އިތުރުން ރެކޯޑް ކުރެވިދާނެ އެއްވެސް އެއްޗެއް އޮތް ތޯ ވަނީ އަހާފައެވެ.
ޓެކްސީ ޑްރައިވަރުންނާ އެކު ބޭއްވި މި ބައްދަލު ވުމުގައި ޕީޖީ ލީޑަރު ފަލާހު ވިދާޅުވި ކަމަށް ވަނީ 10 ޑިސެމްބަރ 2024 ގައި ޤާނޫނު އަސާސީގެ ދިފާޢުގައި ކަމަށް ބުނެ ބަޔަކު މަގުމައްޗަށް ނިކުންނަށް އުޅެނީ، އެއްވެސް އަސާސެއްގެ މައްޗަށް ބިނާކޮށް ނޫން ކަމަށާއި، "ކޮންމެ ގޮތެއް ވިޔަސް އަހަރަމެން ހަނިކުރީ އަހަރަމެންގެ އަމިއްލަ ޙައްޤެއް؛" ކަމަށް އޭނާ ވިދާޅުވި ކަމަށް ވެއެވެ.
ފާލާހް އެ އިޝާރާތް ކުރެއްވީ، މެމްބަރުން އިންތިޚާބުވާ ޕާޓީ ބަދަލު ކޮށްފި ނަމަ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުން ރައްޔިތުންނަށް ވާނެ ގެއްލުމެއް ނޯންނާނެ ކަމާއި އެއީ ހަމަ އެކަނި މެމްބަރަށް ހަނިވާ ހައްގެއްގެ މާނާއިގައި ވިދާޅުވި އެއްޗެއް ކަމަށް ބެލެވެއެވެ.
ގާނޫނު އަސާސީ އަށް ކުއްލި ގޮތަކަށް ގެނައި ބޮޑެތި ބަދަލުތަކަކާ ދެކޮޅަށް ރާއްޖޭގެ އެންމެ ބޮޑު ސިޔާސީ އެއް ޕާޓީ ކަމުގައިވާ އެމްޑީޕީ އިން އަންނަނީ ޑިސެމްބަރު 10 ވަނަ ދުވަހު ބޮޑު ޖަލްސާ އެއް ބޭއްވުމަށް ތައްޔާރުވަމުންނެވެ.
