ޓެކްސީ ލައިން ތައާރަފް ކުރުމަށް ޓެކްސީ ޑްރައިވަރުންނާ ސީދާ މަޝްވަރާ ނުކުރައްވާ ކަމަށް މިނިސްޓަރު އެއްބަސްވެވަޑައިގެންފި
ޓެކްސީ ލައިނެއް ތައާރަފް ކުރުމުގެ މަސައްކަތް ކުރިއަށް ގެންދިޔައީ ސިއްރުން ނޫން
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވާހަކަދައްކަވަނީ
ސަރުކާރުގެ ޓެކްސީ ލައިން ތައާރަފް ކުރުމާ ގުޅޭގޮތުން ޓެކްސީ ޑްރައިވަރުންނާ ސީދާ މަޝްވަރާ ނުކުރައްވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން އެއްބަސްވެވަޑައިގެންފިއެވެ.
ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީގެ ނޫސްވެރިޔާ ވަނީ ޓެކްސީ ލައިން ތައާރަފް ކުރުމުގައި ގޮތެއް ނިންމުމުގެ ކުރިން ޓެކްސީ ޑްރައިވަރުންނާ މިނިސްޓަރު އަމީން ބައްދަލު ކުރައްވާނެ ކަމަށް ވިދާޅުވެފައިވާތީ އެކަން ފާހަގަކޮށްފައެވެ. އަދި ޓެކްސީ ޑްރައިވަރުންގެ އެސޯޝިއޭޝަންއާ މަަޝްވަރާ ކުރުމެއްނެތި، ޓެކްސީ ލައިން ތައާރަފް ކުރުމަށް އެމްޓީސީސީއާ ހަވާލުކުރި ސަބަބާ ގުޅޭގޮތުން ސުވާލު ކުރިއެވެ.
މި ސުވާލަށް މިނިސްޓަރު އަމީން ވިދާޅުވީ ޓެކްސީ ލައިނެއް ތައާރަފް ކުރުމުގެ މަސައްކަތް ކުރިއަށް ގެންދިޔައީ ސިއްރުން ނޫން ކަމަށާއި، ހުރިހާ ކަމެއް ހާމަ ކުރަމުން ގެންދިޔަ ކަމަށެވެ. އަދި ކުރިއަށް ގެންދަން ޖެހޭ ހުރިހާ ޕްރޮސަސްއެއް ކުރިއަށް ގެންދިޔަ ކަމަށް މިނިސްޓަރު އަމީން ވިދާޅުވިއެވެ.
މީގެ އިތުރުން މިނިސްޓަރު އަމީން ވިދާޅުވީ ޓެކްސީ ލައިން ތައާރަފް ކުރުމުގައި ވަކި ޚާއްސަ ފަރާތްތަކާ ވާހަކަދައްކައި، ވަކި ބަޔަކު ބޭނުންވާ ގޮތަކަށް އެ ހުއްދަ ހޯދުމަށް މަސައްކަތް ނުކުރާ ކަމަށެވެ.
އަޅުގަނޑުދެން ބަލާލަން ޖެހޭނީ ސީދާ ވަކިގޮތެއް ތި ވެސް ހަމައެއް ސައިޑެއްގައި ވާހަކައަކީ އަޅުގަނޑުމެން ޓެކްސީ ލައިނެއް ހަދާ ވާހަކަ މިއީ ސިއްރިއްޔާތުގައި ހިނގަމުންދިޔަ ކަމެއް ނޫން އެނގޭތޯ. ދެން ކޮންސަލްޓޭޓިވް ޕްރޯސަސް ގެންދަންޖެހޭ ހުރިހާ ފަރާތްތަކާއެކު ގެންދެވިފައި. ދެން ސްޕެސިފިކްކޮށް މިވެނި ބައެއްގެ މިވެނި މީހެއްގެ ހުއްދަ ހޯދިތޯ ނުހޯދިތޯ އެހެނެއް ނޫން އަޅުގަނޑު މިދެންނެވީ. އެކަމަކު މިއީ ކެބިނެޓްގެ ނިންމެވުމެއް މިކަން ކެބިނެޓު އޮފީހުން ވެސް އިއުލާން ކުރައްވާފައި އޮތީ. އަޅުގަނޑުމެންގެ މިނިސްޓްރީން ވެސް އިއުލާން ކުރައްވާފައި އޮތީ. އަދި އަޅުގަނޑުމެން މިކަންތައް މިއީ ރޭވުމުގައި ކޮންސަލްޓޭޓިވް ޕްރޯސަސްގެ ތެރޭގައި މިހިސާބަށް ގެންދިޔައީ. ފުރަތަމަ ވިސްނާ ވަޑައިގަންނަވާ ރާއްޖޭގައި އޮތް ކަމެއް ނޫން މިއީ އިލެކްޓްރިކް ވެހިކަލް ޓެކްސީ ލައިނެއް ތެދެއްތޯ. މީގައި ބޭނުންވާ ހުރިހާ އޭރިޔާ ކޮންސަލްޓޭޓިވް ހުރިހާ ޕްރޯސަސްއެއް އަޅުގަނޑުމެން ކުރިއަށް ގެންގޮސްފައި އޮންނާނީ.ޓްރާންސްޕޯޓް މިނިސްޓަރު މުހައްމަދު އަމީން
ސަރުކާރުން ވަކި ވިޔަފާރިއަކަށް ވަނުމަށް މަސައްކަތް ނުކުރާކަން ފާހަގަކުރައްވައި މިނިސްޓަރު އަމީން ވިދާޅުވީ ޓެކްސީ ޚިދުމަތަކީ ރައްޔިތުންނަށް ފޯރުކޮށްދޭ އަސާސީ ޚިދުމަތެއް ކަމަށާއި، މި ޚިދުމަތް ރައްޔިތުންނަށް ރަނގަޅަށް ނުދެވޭ ކަމަށެވެ.
އެހެންކަމުން އެހެން ގައުމުތަކުގައި ވެސް މިކަން ކުރާ އުސޫލުން ރާއްޖޭގައި ވެސް ޓެކްސީ ޚިދުމަތް ރަނގަޅު ފެންވަރެއްގައި ރައްޔިތުންނަށް ދިނުމަށް ބޭނުންވާ ކަމަށް މިނިސްޓަރު އަމީން ވިދާޅުވިއެވެ.
ސަރުކާރުން ތައާރަފުކުރަން ނިންމާފައިވާ ޓެކްސީ ލައިނުގެ ޚިދުމަތް އަންނަ ޖުލައި މަހުގެ ފުރަތަމަ ހަފުތާގައި ފަށާނެ ކަމަށް ޓްރާންސްޕޯޓް މިނިސްޓްރީން ބުނެއެވެ. އަދި ސަރުކާރުން ޓެކްސީ ލައިންގެ ޚިދުމަތް ފަށާނީ 100 ޓެކްސީ އާއެކުގައެވެ. މިއާއެކު މިހާރު މި ޚިދުމަތް ދެމުންދާ މީހުންނަށް މިކަމުގައި ވަރަށް ބޮޑެތި ގެއްލުންތަކެއް ލިބޭނެ ކަމަށާއި، އާމްދަނީ އަށް ވަރަށް ބޮޑު އަސަރު ކުރާނެ ކަމަށް އެމީހުން ދަނީ ބުނަމުންނެވެ.
ނަމަވެސް މާލޭގެ އެތެރޭގެ ދަތުރުތަކަށް ޓެކްސީ ޚިދުމަތް ނުލިބޭ ކަމުގެ ޝަކުވާ ވަނީ ބޮޑުވެފައެވެ. އެއާ ހިލާފަށް މާލެއިން ހުޅުމާލެއަށް އަދި ހުޅުމާލެއިން މާލެއަށް ވަރަށް ފަސޭހައިން ޓެކްސީ ޚިދުމަތް ލިބޭ ކަމަށް ގިނަ ބަޔަކު ބުނެއެވެ.
