އިނގިރޭސި ޕްރިމިއާ ލީގުގައި ސައުތެމްޓަންއާ ދެކޮޅަށް ކުޅުނު މެޗުން ވެސް މޮޅުވެ، ޗެލްސީން އެ ޓީމުގެ ރަނގަޅު ފޯމު ދަމަހައްޓައި ދެ ވަނައިގައި ހިފަހައްޓައިފި އެވެ.
ސައުތެމްޓަންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ޗެލްސީން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ޗެލްސީން ތިން ލަނޑު ޖެހިއިރު، ސައުތެމްޓަން އިން އެއް ލަނޑު ޖެހި އެވެ. ޗެލްސީގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.
މެޗުގެ ފުރަތަމަ ހާފުގައި ޗެލްސީ އަށް ލީޑު ނަގައިދިނީ އެކްސެލް ޑިސާސީ އެވެ. އޭގެ ފަހުން ޖޯ އަރިބޯ ޖެހި ލަނޑާއެކު ސައުތެމްޓަން އިން ނަތީޖާ ހަމަހަމަ ކުރި އެވެ. ދެ ވަނަ ފަހަރަށް މެޗުގައި ޗެލްސީ އަށް ލީޑު ނަގައިދިނީ ކްރިސްޓޮފް އެންކުންކޫ އެވެ. އަދި މި ހާފުގައި ޗެލްސީގެ ތިން ވަނަ ލަނޑު ޖެހީ ނޯނީ މަޑުއޭކޭ އެވެ. ދެ ވަނަ ހާފުގައި ޗެލްސީގެ ހަތަރު ވަނަ ލަނޑު ކޯލް ޕާމާ ޖެހިއިރު، ފަސް ވަނަ ލަނޑު ޖެހީ ޖޯޑަން ސަންޗޯ އެވެ.
މޮޅާއެކު ޗެލްސީ ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 14 މެޗުން 28 ޕޮއިންޓާ އެކު އެވެ. ލީގުގައި އެންމެ ފަހުން ޗެލްސީ ކުޅުނު ފަސް މެޗުން ވެސް އެ ޓީމު ބަލުވެފައި ނުވެ އެވެ. ލީގުގައި އެންމެ ފަހުން ޗެލްސީ ބަލިވީ އޮކްޓޫބަރު މަހު ނިއުކާސަލް ޔުނައިޓެޑާ ދެކޮޅަށް ކުޅުނު މެޗުންނެވެ.
