ފާއިތުވި ހަފްތާގައި އިދިކޮޅު ހަނގުރާމަވެރިން ސަރުކާރުގެ ބާރުގެ ދަށުގައި އޮތް ބައެއް ސަރަހައްދުތަކަކަށް އަރާފައިވާ މައްސަލަގައި، ސީރިއާގެ ރައީސް ބަޝާރު އަލް-އަސަދަށް އެހީތެރިވުން ކުރިއަށް ގެންދާނެކަމަށް ރަޝިޔާ އިން ހޯމަ ދުވަހު ބުނެފިއެވެ.
ރަޝިޔާ އިން މިހެން ބުނެފައިވާ އިރު، ސީރިއާ ސަރުކާރުގެ ބާރުގެ ދަށުގައިވާ ބައެއް ސަރަހައްދުތަކަށް އިދިކޮޅު ހަނގުރާމަވެރިން ކުއްލި ގޮތަކަށް އެރުމާ ގުޅިގެން ސީރިއާގެ ރައީސް އަސަދު ވަނީ އިދިކޮޅު ފަރާތްތަކާ ކުރިމަތިލުމުގައި އޭނާގެ "އެކުވެރިންގެ މުހިންމުކަން" ފާހަގަކުރައްވާފައެވެ.
ކްރެމްލިންގެ ތަރުޖަމާނު ދިމިޓްރީ ޕެސްކޮވް ނޫސްވެރިންނަށް ވިދާޅުވީ، ރަޝިޔާ އިން އަދިވެސް ބަޝާރު އަލް-އަސަދަށް އެހީތެރިވަމުން ގެންދާނެ ކަމަށާއި އަދި އެކަށީގެންވާ ފެންވަރުތަކުގައި ގުޅުން ބަހައްޓަމުން ގެންދާނެ ކަމަށެވެ. ރަޝިޔާ އިން ބުނީ ހާލަތު ދިރާސާ ކުރަމުން ދާ ކަމަށާއި "ހާލަތު ސްޓެބިލައިޒްކުރުމަށް ކުރަންޖެހޭ ކަންތައްތަކާ ގުޅޭ ގޮތުން ސްޓޭންޑެއް" އެކުލަވާލާނެ ކަމަށެވެ.
ރިޕޯޓުތައް ބުނާ ގޮތުގައި، އާދިއްތަ ދުވަހު ސީރިއާ އަދި ރަޝިއާގެ މަތިންދާބޯޓު ތަކުން ސަރުކާރާ ދެކޮޅު ފަރާތްތަކަށް އަމާޒު ކޮށް ހަމަލާތަކެއް ދީފައިވެއެވެ.
ރަޝިއާއިން 2015 ވަނަ އަހަރު ސީރިއާގެ ހަނގުރާމައިގެ ތެރެއަށް ވަދެފައިވަނީ، އަލް-އަސަދުގެ ސަރުކާރުގެ އެދުމުގެ މަތިން، ސަރުކާރު ސިފައިންނަށް އެހީތެރި ވުމުގެ ގޮތުންނެވެ.
ސީރިއާގެ އަލެޕޯ ޕްރޮވިންސް އިދިކޮޅުގެ ބާރުގެ ދަށުން ސަލާމަތް ކުރުމަށް 2016 ވަނަ އަހަރު ރަޝިޔާގެ އެއަރފޯސް އިން ސީރިއާ ގެ ސިފައިންނަށް އެހީތެރިވެފައިވެއެވެ.
އަލް-އަސަދަކީ ޔުކްރެއިނާއާ ދެކޮޅަށް މޮސްކޯއިން ފަށާފައިވާ ހަނގުރާމައިގައި ހާމަކަން ބޮޑު ގޮތެއްގައި ރަޝިޔާ އަށް ތާއީދުކުރާ މަދު ލީޑަރުންގެ ތެރެއިން އެކެކެވެ.
