މާލެއާއި ހުޅުމާލޭގެ ބޮޑެތި މަގުތަކުގައި ދުވާ މީހުން އިތުރުވެ އާންމުންގެ ކަންބޮޑުވުން

މާލެ އާއި ހުޅުމާލޭގެ ބާރުބޮޑު މަގުތަކުގައި ދުވެ ކަސްރަތުކުރާ މީހުންގެ އަދަދު ފަހަކަށް އައިސް ބޮޑުތަނުން އިތުރުވަމުންދާތީ، އެކަމުގެ ސަބަބުން މަގުމަތީގެ ސަލާމަތާއި ރައްކާތެރިކަމަށް ބޮޑެތި ގޮންޖެހުންތަކެއް ކުރިމަތިވެ އާންމުންގެ ކަންބޮޑުވުން އިންތިހާއަށް އިތުރުވެއްޖެ އެވެ. ޚާއްސަކޮށް އުޅަނދުފަހަރު ގިނަ، ބާރުބޮޑު މަގުތަކުގައި ދުވާ މީހުންގެ ސަބަބުން ދުއްވާ ތަކެއްޗަށް ދަތިވެ، ނުރައްކާތެރި ހާދިސާތަކެއް ހިނގުމުގެ ބިރު މިހާރު ވަނީ ވަރަށް ބޮޑުވެފަ އެވެ.

މިކަމާ ގުޅޭގޮތުން "ރާއްޖެ އެމްވީ" އާ ވާހަކަދެއްކި ބައެއް އާންމުން ބުނި ގޮތުގައި، މާލެއާއި ހުޅުމާލޭގެ ބޮޑެތި މަގުތަކުގައި އުޅަނދުފަހަރު ބާރު ދުވެލީގައި ދުއްވާ ސަރަހައްދުތަކުގައި ދުވާ މީހުން އިތުރުވުމަކީ ދުއްވާ މީހުންނަށާއި ދުވާ މީހުންގެ ފުރާނައަށް ވެސް އޮތް ބޮޑު ނުރައްކަލެކެވެ. މަގުތަކުގައި ދުވާ މީހުންގެ ސަބަބުން އުޅަނދުތަކުގެ ދުވެއްޔަށް ބުރޫއަރައި، ކުއްލި ގޮތަކަށް އުޅަނދުތައް މަޑުކުރަން ޖެހުމާއި، މަގުގެ އަރިމަތިން ޖާގަ ކުޑަވުމުގެ ޝަކުވާތައް ދަނީ އިންތިހާއަށް އިތުރުވަމުންނެވެ.

Advertisement

މާޒީއަށް ބަލާއިރު، މަގުމަތީގައި ދުވެ ކަސްރަތު ކުރަން އުޅުމުގެ ތެރޭގައި ނުރައްކާތެރި ބޮޑެތި އެކްސިޑެންޓްތައް ހިނގައި، ހިތާމަވެރި ހާދިސާތަކެއްގައި މީހުންގެ ފުރާނަ ގޮސްފައިވާކަން ފާހަގަކުރެވެ އެވެ. މިފަދަ ހިތާމަވެރި ހާދިސާތައް ތަކުރާރުވަމުންދާއިރު ވެސް، އަމިއްލަ ސަލާމަތާއި ރައްކާތެރިކަމަށް ބެލުމެއް ނެތި ބާރުބޮޑު މަގުތަކުގައި ދުވުން އާންމުވަމުންދާތީ ގިނަ ބަޔަކު ދަނީ އެކަމާ މެދު ސުވާލު އުފައްދައި ކަންބޮޑުވުން ފާޅުކުރަމުންނެވެ.

ދުވެ ކަސްރަތު ކުރުމަކީ ސިއްހަތަށް ފައިދާހުރި ކަމެއް ނަމަވެސް، އެކަން ކުރުމަށް ޚާއްސަކޮށްފައިވާ ސަރަހައްދުތަކުގައި އެކަން ކުރުމަށް "ރާއްޖެ އެމްވީ" އާ ވާހަކަދެއްކި ގިނަ އާންމު ފަރާތްތަކުން އިރުޝާދުދެ އެވެ. މާލޭ އެކުވެނި ސިންތެޓިކް ޓްރެކާއި، ހުޅުމާލޭގެ ސިންތެޓިކް ޓްރެކް ފަދަ ތަންތަނަކީ ކަސްރަތު ކުރުމަށް ޚާއްސަކޮށްފައިވާ ރައްކާތެރި މާހައުލުތަކެވެ. އެހެންކަމުން، އާންމު ދަތުރުފަތުރަށް ހުރަސްއެޅޭ ގޮތަށް މަގުތަކުގައި ދުވުމުގެ ބަދަލުގައި، އެކަމަށް ކަނޑައެޅިފައިވާ ތަންތަން ބޭނުންކުރުމަކީ އެންމެންގެ ސަލާމަތަށްޓަކައި ކޮންމެހެން މުހިންމު ކަމެކެވެ.

މި މައްސަލަ ދުވަހުން ދުވަހަށް ބޮޑުވަމުންދާއިރު، ސަރުކާރުގެ ކަމާބެހޭ އިދާރާތަކުން މިކަމާ މެދު އެކަށީގެންވާ ފިޔަވަޅެއް ނާޅާތީ ވެސް އާންމުން ދަނީ ފާޑުކިޔަމުންނެވެ. މަގުމަތީގެ ރައްކާތެރިކަން ކަށަވަރުކުރުމަށާއި، މިފަދަ ނުރައްކާތެރި އަމަލުތައް ހުއްޓުވުމަށް އިސްނަގައިގެން މަސައްކަތް ކުރާނެ ވަކި މުއައްސަސާއެއް ނެތީތޯ ގިނަ ބަޔަކު ދަނީ ސުވާލު އުފައްދަމުންނެވެ. ކަމާބެހޭ އިދާރާތަކުން މިކަމަށް އަވަސް ހައްލެއް ހޯދައިދީ، މަގުތަކަކީ އެންމެންނަށް އަމާން އަދި ރައްކާތެރި ތަނަކަށް ހެދުމަށް އާންމު ރައްޔިތުން ދަނީ ގޮވާލަމުންނެވެ.