އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ފައިސަލް އިއުލާނު ކުރައްވައިފި، ރަނިންމޭޓަކަށް މޭޔަރު އާޒިމް
8 އޮކްޓޯބަރު 2026 | ބުރާސްފަތި 03:50ކުރިއަށް އޮތް ރިޔާސީ ޕްރައިމަރީގައި ފައިސަލްގެ ރަނިންމޭޓަކަށް މާލެ ސިޓީގެ މޭޔަރު އާދަމް އާޒިމް ހަމަޖައްސަވާފައިވާއިރު، މި ނިންމެވުމަށް ކުރީގެ ރައީސް އިބްރާހީމް މުހައްމަދު ސޯލިހުގެ ފުރިހަމަ ތާއީދު އޮތްކަން ފައިސަލް ވަނީ ހާމަކުރައްވާފައި. އަދި ގައުމުގެ ކަންބޮޑުވުންތަކަށް ހައްލު ހޯދައިދިނުމަށް ވަރުގަދަ ޓީމަކާއެކު ނުކުންނަވާކަން ފައިސަލް ފާހަގަކުރެއްވި. އާޒިމް ވިދާޅުވީ ފައިސަލްއަކީ ގައުމީ ތަރައްގީގެ މަސައްކަތްތަކުގައި ނަމޫނާ ދެއްކެވި ހީވާގި ލީޑަރެއް ކަމަށް
ރާއްޖެޓީވީގެ ފަށާއިރު ޕްރޮގްރާމްގައި ކުރީގެ ނައިބު ރައީސް ފައިސަލް ނަސީމް އާއި މާލޭގެ މޭޔަރު އާދަމް އާޒިމް ވާހަކަ ދައްކަވަނީ | މާލެ ސިޓީ ކައުންސިލް
ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބަށް އެމްޑީޕީން ބާއްވާ ރިޔާސީ ޕްރައިމަރީގައި ވާދަކުރައްވާނެކަން ކުރީގެ ނައިބު ރައީސް ފައިސަލް ނަސީމް ރަސްމީކޮށް އިއުލާނު ކުރައްވައިފި އެވެ.
އެމަނިކުފާނުގެ ރަނިންމޭޓެއްގެ ގޮތުގައި ހަމަޖައްސަވާފައިވަނީ މާލެ ސިޓީގެ މޭޔަރު އާދަމް އާޒިމް އެވެ.
ބުރާސްފަތި ދުވަހުގެ "ފަށާއިރު" ޕްރޮގްރާމުގައި ވާހަކަފުޅު ދައްކަވަމުން ފައިސަލް ވިދާޅުވީ، ވޭތުވެދިޔަ ދުވަސްތަކުގައި ރާއްޖޭގެ ސިޔާސީ މަސްރަހު ވަރަށް ބޮޑަށް ބައްލަވައި، އެކަމާ ގުޅޭގޮތުން ޕާޓީގެ އިސް ބޭފުޅުންނާއި އާންމު ރައްޔިތުންނާ ފުޅާދާއިރާއެއްގައި މަޝްވަރާ ކުރައްވާފައިވާ ކަމަށެވެ.
އެގޮތުން ކުރިއަށް އޮތް ރިޔާސީ ޕްރައިމަރީގައި ވާދަކުރެއްވުމަށް ނިންމެވީ އެ މަޝްވަރާތަކަށް ފަހު ކަމަށް އެމަނިކުފާނު ވިދާޅުވި އެވެ.
ފައިސަލް ފާހަގަކުރެއްވި ގޮތުގައި މި ނިންމެވުމުގައި ކުރީގެ ރައީސް އިބްރާހީމް މުހައްމަދު ސޯލިހުގެ ފުރިހަމަ އެއްބާރުލެއްވުމާއި ތާއީދު އެބައޮތެވެ. ރައީސް ސޯލިހަކީ ނިމުނު ސަރުކާރުގައި ރައްޔިތުންނަށް ގިނަގުނަ ޚިދުމަތްތަކެއް ކޮށްދެއްވި ބޭފުޅެއްކަން ފާހަގަކުރައްވައި، މި މަސައްކަތަށް ނުކުންނަވަނީ ގައުމުގައި ހުރި ބޮޑެތި ކަންބޮޑުވުންތަކަށް ހައްލު ހޯދައިދިނުމަށް ވަރުގަދަ ޓީމަކާއެކު ކަމަށް ފައިސަލް ވިދާޅުވި އެވެ. އަދި އާދަމް އާޒިމް ފަދަ ހީވާގި ބޭފުޅަކު އަރިހުގައި ހުންނެވުމަކީ ލިބޭ ވަރަށް ބޮޑު ހިތްވަރެއް ކަމަށް ވެސް ވިދާޅުވި އެވެ.
ކުރީގެ ރައީސް އިބްރާހީމް މުހައްމަދު ސޯލިހާ މަޝްވަރާ ކުރެވި ވަރަށް ބޮޑު އެއްބާރުލުމެއް މިކަމުގައި އޮވެގެން މިކަމުގައި އަޅުގަނޑުމެންނަށް ކުރިއަށް މިގެންދެވެނީ. އެއީ އަޅުގަނޑުމެންނަށް ގަބޫލުކުރެވެނީ ވަރަށް މުހިންމު ކަމެއްގެ ގޮތުގައި. އެގޮތަށް އަޅުގަނޑުމެންނަށް ކުރިއަށް ގެންދެވޭ ކަމަށްވަންޏާ އެނގިވަޑައިގަންނަވާނެ ރައީސް ސޯލިހަކީ އެއީ ނިމިގެންދިޔަ އެމްޑީޕީ ސަރުކާރުގައި ރާއްޖޭގެ ރައްޔިތުންނަށް ވަރަށް ގިނަ ޚިދުމަތްތަކެއް ވަރަށް ގިނަ މަސައްކަތްތަކެއް ކުރެއްވި ބޭފުޅެއް. ރާއްޖޭގެ ގިނަ ބަޔަކު ގަބޫލުކުރައްވާ. މިގޮތަށް މިދަތުރު ފެށޭއިރު ވެސް ޚާއްސަކޮށް ޓީމެއްގެ ގޮތުގައި.އަޅުގަނޑުމެން މިނުކުންނަނީ ފަސޭހަ ކަމެއް ކުރާކަށް ނޫން. މިއީ ވަރަށް އުނދަގޫ ކަމެއް. ވަރަށް މުހިންމު ކަންތައްތަކެއް. ރާއްޖޭގެ މަސްރަހުގައި މިއަދު ފޯކަސް އެކި ދިމަދިމާލުގައި ވަރަށް ބޮޑު ކަންބޮޑުވުންތަކެއް އެބަހުރި. އެހެންވީމަ އަޅުގަނޑު ގަބޫލުކުރީ ދަތުރު ފެށުމުގައި ވެސް އަޅުގަނޑުމެންނަށް ވަރުގަދަ ޓީމަކާއެކު އަޅުގަނޑުމެންނާއެކު މަސައްކަތް ކުރާނެ ރެއާދުވާލު ހުއްޓުމެއް ނެތި މަސައްކަތް ކުރެވޭނެ ޓީމެއް އޮތުންފައިސަލް ނަސީމް
ފައިސަލްގެ ރަނިންމޭޓެއްގެ ގޮތުގައި ނުކުންނެވި މޭޔަރު އާދަމް އާޒިމް ވިދާޅުވީ، އެމްޑީޕީގެ ވެރިކަމެއްގައި ރައީސަށާއި ނައިބު ރައީސަށް އެ ޕާޓީގެ ބޭފުޅުން ތިއްބެވުމަކީ މުހިންމު ކަމެއް ކަމަށް ދެކެވަޑައިގަންނަވާ ކަމަށެވެ. އަދި ފައިސަލްއަކީ ނިމިދިޔަ ސަރުކާރުގައި ވެސް ވަރަށް ގާތުން މަސައްކަތް ކުރެއްވި، ރާއްޖޭގެ ތަރައްގީގެ ކަންކަމާއި ޚާއްސަކޮށް އާރްޓީއެލްގެ ޚިދުމަތް ފަދަ މުހިންމު މަޝްރޫއުތައް ކޮންމެ ދުވަހަކު ގާތުން ބައްލަވަމުން ގެންދެވި މުރާލި ލީޑަރެއް ކަމަށް އާޒިމް ފާހަގަކުރެއްވި އެވެ.
ރާއްޖެޓީވީގެ ފަށާއިރު ޕްރޮގްރާމްގައި ކުރީގެ ނައިބު ރައީސް ފައިސަލް ނަސީމް އާއި މާލޭގެ މޭޔަރު އާދަމް އާޒިމް ވާހަކަ ދައްކަވަނީ | މާލެ ސިޓީ ކައުންސިލް
މީގެ އިތުރުން އާޒިމް ވިދާޅުވީ، ފައިސަލް ފަދަ ގައުމަށް ރަނގަޅު ޚިދުމަތްތަކެއް ކޮށްދެއްވާނެ ބޭފުޅަކު ދެއްވި ދައުވަތު ގަބޫލުކުރައްވައި، ނައިބު ރައީސްގެ ގޮތުގައި އެކުގައި މަސައްކަތް ކުރެއްވުމަށް ހުންނެވީ ފުރިހަމައަށް ތައްޔާރަށް ކަމަށެވެ.
ފައިސަލްއަކީ އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެކަން އިއުލާނު ކުރެއްވި 4 ވަނަ ބޭފުޅާ އެވެ. ޕާޓީގެ ކުރީގެ ޗެއަރޕާސަން ފައްޔާޒް އިސްމާއީލް، ޕާޓީގެ ކުރީގެ ރައީސް އަބްދުﷲ ޝާހިދު އަދި ރައްޔިތުން މަޖިލިސް މެންބަރު އަހުމަދު ޝަމްހީދު ވެސް ވަނީ ރިޔާސީ ޕްރައިމަރީގައި ވާދަ ކުރައްވާނެކަން އިއުލާނު ކުރައްވާފަ އެވެ.
