ރައްޔިތުން ނުކުމެ އަސްލު ރައީސް މުއިއްޒު ހޯދައި، ޖަވާބުދަރީ ކުރުވަންޖެހޭ: ވަހީދު
އެކި ދުވަހު ރައްޔިތުންނަށް ދައްކަމުންދަނީ އެކި ކުލަވަރު
ބުދަ ދުވަހުގެ ރޭ ކުރިއަށް ގެންދިޔަ ޖަލްސާގައި ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު ވާހަކަދައްކަވަނީ
ރައްޔިތުން ނުކުމެ އަސްލު ރައީސް ޑރ.މުހައްމަދު މުއިއްޒު ހޯދައި، ޖަވާބުދަރީ ކުރުވަންޖެހޭ ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ބުދަ ދުވަހުގެ ރޭ ދަ ޑިމޮކްރެޓްސްއިން ބޭއްވި ޖަލްސާގައި ވަހީދު ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެ ވާހަކަދައްކަވާފައެވެ. ވަހީދު ވިދާޅުވީ އަސްލު ރައީސް މުއިއްޒު މިހާރު އޮޅިއްޖެ ކަމަށާއި، އެކި ދުވަހު ރައްޔިތުންނަށް ދައްކަމުންދަނީ އެކި ކުލަވަރު ކަމަށެވެ. ރާއްޖެއަށް އެއް ޝަހުސިއްޔަތެއް ގެންގުޅޭ ރައީސްއެއް ބޭނުންވާ ކަމަށް ވަހީދު ވިދާޅުވިއެވެ.
ރައީސް މުއިއްޒު ޖަވާބުދާރީ ކުރުވަންޖެހޭކަން ފާހަގަކުރައްވައި ވަހީދު ވިދާޅުވީ އެ މަސައްކަތް ނުކޮށް އަމާންކަމާއެކު ނިދަން ތިބެވެން ނެތް ކަމަށެވެ. އަދި މިގައުމު މިގެންދަނީ ރަނގަޅު މިސްރާބަށްތޯ ބަލައި، ކަށަވަރުކުރަންޖެހޭ ކަމަށް ވަހީދު ވިދާޅުވިއެވެ.
ވަހީދު ވިދާޅުވީ ޖަވާބުދާރީ ކުރުވުމަށް ކުރަންޖެހޭ ހުރިހާ މަސައްކަތެއް ކުރާނެ ކަމަށާއި، ފަހަތަށް ނުޖެއްސޭނެ ކަމަށެވެ. އަދި ވިދާޅުވީ ބިރު ދެއްކުމަށް މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، ދާނީ ބާރަށް ކުރިއަށް ކަމަށެވެ.
