މުއިއްޒުގެ ސަރުކާރުން ޔަހޫދީ ވަނީ ވެސް، ޔާހޫދީންވެސް ހައިރާންވާ ވަރަށެވެ

އިޒްރޭލްގެ ޕާސްޕޯޓް މަނާ ކުރުމުގެ ބިލުގެ މައްސަލައަކީ އަރަތެކެވެ. ސިޔާސީ ގޮތުން ސަރުކާރުން ޖަހާ ސަކާރާތެކެވެ. ދިވެހި ރައްޔިތުން މޮޔަހައްދަން ކުޅޭ ސިޔާސީ ޑްރާމާއެކެވެ.

މިއީ ގިނަ ރައްޔިތުން މި މައްސަލައިގައި ގަބޫލުކުރާ ގޮތެވެ.

އިޒްރޭލްގެ ޕާސްޕޯޓް މަނާކުރަން އެންމެ ފުރަތަމަ ނިންމީ ރައީސް މުއިއްޒުގެ ކެބިނެޓުންނެވެ. އެކަން އިއުލާން ކުރީ ސަރުކާރުން ކެބިނެޓް ވަޒީރުން ނޫސްވެރިންގެ ކުރިމަތީގައެވެ. އެއާއި އެކު ދުނިޔޭގެ މީޑިއާތަކުގެ ފަލަސުރުޚީތަކަށް މި ޚަބަރު އެރިއެވެ. ސަރުކާރަށް ރައްޔިތުންގެ ތައުރީފް އޮހުނެވެ. އެއާއި އެކު ސަރުކާރުން ބުނީ މިކަން ގާނޫނީ ގޮތުން ކުރުމަށްޓަކައި ބިލެއް ޑްރާފްޓް ކުރަނީ ކަމަށެވެ. އެހާ ހިސާބުން އިދިކޮޅު އެމްޑީޕީން ސަރުކާރުން ކުޅެން އުޅުނު ގޭމް ދެނެގަނެ ޖެހިގެން އައި ދުވަހު މަޖިލީހަށް ބިލެއް ހުށަހެޅި އެވެ. އިޒްރޭލްގެ ޕާސްޕޯޓް މަނާކުރާ ބިލުގެ ނަމުގައެވެ.

ސަރުކާރާ ސަރުކާރުގެ މެމްބަރުންނަށް ބިލް ބޭރުކުރަން ނުކެރި ކޮމިޓީއަށް ފޮނުވަން ފާސްކުރިއެވެ. އެދުވަހުން ފެށިގެން މިއަދާ ހަމައަށް އެބިލް އޮތީ މަޖިލީހުގެ ކޮމިޓީގައެވެ. އަށެއްކަ މަސް ފާއިތުވެގެން ހިނގައްޖެއެވެ. ސަރުކާރުގެ ހަގީގީ ބޭނުމަކީ އިޒްރޭލްގެ ޕާސްޕޯޓް މަނާކުރުން ނޫންކަން ރައްޔިތުންނަށް އިނގެން ފެށީ މިހާ ހިސާބުންނެވެ. ބިލު އޮތީ ސަރުކާރުގެ ސުޕަރމެޖޯރިޓީ އޮތް މަޖިލީހުގެ ކޮމިޓީއެއްގައެވެ. ކޮމިޓީގެ މެޖޯރިޓީވެސް ސަރުކާރުގެ އަތުގައެވެ. ސަރުކާރުން ބޭނުންވާ ކޮންމެ ކަމެއް އޯވާ ނައިޓަކުން މަޖިލިސްތެރެއިން ކުރަމުން ގެންދެއެވެ. މި ބިލްގެ މަސައްކަތް ނޫން އެހެން ހުރިހާ ކަމެއް ކޮށް ނިންމައިފިއެވެ. މިބިލާ ބެހޭގޮތުން އެންމެ ފަހުން މި އިވުނީ މަޖާ ވާހަކަ އެކެވެ. ބިލް ފާސްކުރުމުގެ ކުރިން ބޮޑެތި ގައުމުތަކާ މަޝްވަރާ ކުރަންޖެހޭ ވާހަކައެވެ. މިއީ ރައްޔިތުންގެ މަޖިލީހުގެ ދިގު ތާރީޚުގައި ބިލަކާ ބެހޭ ގޮތުން ދުނިޔޭގެ ގައުމުތަކުގެ ލަފާ ހޯދަން ޖެހުނު ފުރަތަމަ ބިލެވެ. ފަހަރުގައި ދުނިޔޭގައިވެސް ހިނގާ މިފަދަ ފުރަތަމަ ކަމަކަށް މިކަން ވެދާނެއެވެ. ދުނިޔޭގެ އެއްވެސް ގައުމަކުން އެގައުމުގެ ގާނޫނު ހަދާ މަޖިލީހުން ބިލެއް ފާސްކުރަން ދުނިޔޭގެ އެހެން ގައުމުތަކުގެ ރައުޔު ހޯދިކަން އަޑެއް ނާހަމަވެ. އެ ބުނަނީ ބިލު ފާސްކުރަން ފަލަސްތީނު ރައްޔިތުންނާ ވާހަކަ ދައްކަންޖެހޭ ވާހަކައެވެ. އިޒްރޭލް ދެކޭ ގޮތެއް ވެސް ބަލާލަން ޖެހޭ ވާހަކައެވެ. މީހަކު ހައިރާނެއް ނުވާނެތޯއެވެ. އެއްދުވަސް ތެރޭގައި ޓީޖީއެސްޓީއާއި ގްރީން ޓެކްސް ބޮޑުކޮށްފިއެވެ. ފަތުރުވެރިކަމުގެ އިންޑަސްޓްރީގެ މީހުންނާ މަޝްވަރާއެއް ނުކުރެއެވެ. އެއަރޕޯޓް ޑިވެލޮޕްމަންޓް ޗާޖް ބޮޑުކޮށްފިއެވެ. ޓްރެވެލް އެޖެންޓުންނަކާ މަޝްވަރާ ނުކުރެއެވެ. ކޮންމެ ޓުއަރިސްޓެއްގެ ބޮލަށް 500 ޑޮލަރު ބޭންކަށް މާރުކުރާ ގަވައިދެއް ހަދައިފިއެވެ. ފަތުރުވެރިކަމުގެ އިންޑަސްޓްރީގެ ބޭފުޅުންނާ މަޝްވަރާއެއް ނުކުރެއެވެ.

ވެރިކަމުގެ މުޅި ނިޒާމް ގަޑުބަޑުވެ ޚުދުމުހުތާރު ވެރިކަމަކަށް ނިޒާމް ބަދަލުވާވަރުގެ އިސްލާހެއް 8 ގަޑިއިރުގެ ތެރޭގައި ގާނޫނު އަސާސީއަށް ގެނެސްފިއެވެ. ސިޔާސީ ޕާޓީތަކަކަށް ރައްޔިތުންނަކަށް މަޝްވަރާއެއް ނުކުރެއެވެ. މިނޫނަސް ކިތައްމެ ކަމެއް ސަރުކާރުން ބޭނުންވާ ގޮތަށް ކުޑަހިނދުކޮޅެއްގެ ތެރޭގައި މަޖިލިސް ތެރެއިން ކޮށް ނިންމައިފިއެވެ. އެކަމަކު 8 މަސް ފަހުންވެސް މުޅި ދުނިޔޭގެ މަޝްވަރާ ހޯދައިގެން ނޫނީ ނުކުރެވޭ ކަމަކަށްވީ އިޒްރޭލްގެ ޕާސްޕޯޓް މަނާކުރާ ބިލަށް ގޮތެއް ނިންމުމުގެ މައްސަލައެވެ. މީހުން ބުނަނީ ރަނގަޅަށެވެ. މުއިއްޒުގެ ސަރުކާރުން ޔަހޫދީ ވަނީ ވެސް، ޔާހޫދީންވެސް ހައިރާންވާ ވަރަށެވެ. މުނާފިގު ވަނީ ވެސް، މުނާފިގުންވެސް ކޮސްވާ ވަރަށެވެ. ކެރިވަޑައިނުގަންނަވާ ނަމަ ނުވަތަ ކުރައްވަން ބޭފުޅުނުވާނަމަ ކަން އޮތްގޮތަށް ވިދާޅުވެ ނިންމަވާލެއްވުން މާ ރަނގަޅުވެފަ ބޮލަށް ފަސޭހަވާނެ ނޫންތޯއެވެ.