ފިންލޭންޑްގައި ވަޅިން ދިން ހަމަލާއެއްގައި ބަޔަކު ޒަޚަމްވެ، މީހަކު މަރުވެއްޖެ

ފިންލޭންޑްގެ ހުޅަނގުދެކުނުގައިވާ ތުރްކޫގައި ވަޅިން ދިން ހަމަލާއެއްގައި ބަޔަކު ޒަޚަމްވެ އެކަކު މަރުވެއްޖެއެވެ.

ހުކުރު ދުވަހުގެ މެންދުރު ފަހު މި ހަމަލާދިން މީހާ މިހާރު ވަނީ ހައްޔަރު ކޮށްފައެވެ.

ތުރްކޫގެ ޕުތޯރީ މާކެޓްގައި ދިން މި ހަމަލާގައި އެކަކު މަރުވެފައިވާކަން މިހާތަނަށް ވަނީ ކަށަވަރު ކުރެވިފައެވެ. ހަމަލާގައި އިތުރު ދެމީހަކު ޒަޚަމްވެފައިވާ ކަމަށް ފިންލޭންޑްގެ ސްޓޭޓް މީޑިއާއިން ހާމަކޮށްފައިވާއިރު، އެ ޤައުމުގެ ބައެއް މީޑިއާތަކުން ހާމަކޮށްފައިވާ ގޮތުގައި މި ހަމަލާގައި ފަސް އަންހެނަކާއި އިތުރު ފިރިހެނަކު ހިމެނޭގޮތަށް ޖުމްލަ 6 މީހަކު ވަނީ ޒަޚަމްވެފައެވެ.

ރިޕޯޓްތައް ބުނާގޮތުގައި ހަމަލާ ދިން މީހާ ހައްޔަރު ކޮށްފައި ވަނީ، ހަމަލާ ދިނުމަށް ފަހު ފުލުހުންނަށް ފިލުމަށް މަސައްކަތްކުރަނިކޮށް، އޭނާގެ ފަޔަށް ބަޑިޖަހައި އޭނާ ހުއްޓުވައިގެންނެވެ.

ހަމަލާ ދިން މީހާ އާއި ގުޅޭ އެއްވެސް މައުލޫމާތެއް ފުލުހުން އަދި ހާމަކޮށްފައެއް ނުވެއެވެ.

ހަމަލާ އާއި ގުޅިގެން ހަމަލާދިން ސަރަޙައްދަށް އާންމުން ނުދިއުމަށް ފުލުހުން ވަނީ އިލްތިމާސް ކޮށްފައެވެ.