ޣައްޒާގެ ހޮސްޕިޓަލެއް އިޒްރޭލުގެ ހިޞާރުގެ ދަށުގައި، ލުބުނާނުގެ ހަނގުރާމަ ހުއްޓުވުމުގެ މަޝްވަރާ 'ކުރިއަށް'

ޣައްޒާގެ އުތުރުގައިވާ ކަމާލް އަދުވާން ހޮސްޕިޓަލް އިޒްރޭލު ސިފައިން ހިސާރުކޮށްފައިވާ ކަމަށް ރިޕޯޓުތައް ބުނެފިއެވެ.

އެ ހޮސްޕިޓަލުގެ ޑިރެކްޓަރ ޖެނެރަލް ޑރ. ހުސާމް އަބޫ ސާފި އާ ހަވާލާދީ އަލް ޖަޒީރާ އިން ބުނެފައިވަނީ، ހޮސްޕިޓަލަށް އެއްވެސް އެއްޗެއް ވެއްދުން މަނާ ކޮށްފައިވާ ކަމަށާއި، ބޭސް، ސިއްހީ އޮފިޝަލުން، ކާބޯތަކެތި، އެމްބިއުލާންސް އަދި ސިވިލް ޑިފެންސްގެ ޚިދުމަތްތެރިންނަށްވެސް ހޮސްޕިޓަލަށް ވަނުން އިޒްރޭލު ސިފައިން މަނާކޮށްފައިވާ ކަމަށެވެ.

ހޮސްޕިޓަލުން ބުނެފައިވަނީ އިޒްރޭލުގެ ހަމަލާތަކުގައި ޒަޚަމްވެގެން އެހީ ހޯދުމަށް ގުޅުމުން ވެސް ކޮށްދެވޭ ކަމެއް ނެތް ކަމަށް ބުނާ ކަމަށެވެ.

"ދިރި ތިބި މީހުން ދިރި ތިބީ، މަރުވާ މީހުން މަރުވަނީ،" ހޮސްޕިޓަލުގެ ޑިރެކްޓަރ ޖެނެރަލް ވިދާޅުވިއެވެ.

ހޮސްޕިޓަލުގެ އިންޓެންސިވް ކެއަރގައި ވަރަށް ނާޒުކު ހާލަތެއްގައި ތިބި 6 މީހުން އެބަތިބި ކަމަށާއި، އަދި ކާންބޯން ނުލިބުމުގެ ސަބަބުން އަނަރޫފަ ވެފައިވާ 17 ކުއްޖަކު އިމަޖެންސީ ރޫމަށް ގެނެސްފައިވާ ކަމަށްވެސް ހޮސްޕިޓަލުން ބުނެއެވެ. އެހެން ނަމަވެސް ހަރުކަށި ހިސޯރުގެ ސަބަބުން އެއްވެސް ފަރުވާ އެއް ދެވޭނެ ގޮތެއް ނެތް ކަމަށް ހޮސްޕިޓަލުން ވަނީ ބުނެފައެވެ.

އަނެއްކޮޅުން ލުބުނާނުގައި އިޒްރޭލުން ހިންގަމުންދާ ހަނގުރާމަ ހުއްޓުމަކަށް ގެނެވޭތޯ އެމެރިކާގެ ސަފީރު އެމޯސް ހޮކްސްޓައިން ބެއިރޫތުގައި ދެ ދުވަސް ވަންދެން ހުންނެވުމަށްފަހު، މިރޭ އިޒްރޭލަށް ދަތުރުކުރައްވާނެ ކަމަށް ރިޕޯޓުތައް ބުނެއެވެ.

ލުބުނާނުގައި އޭނާ ވަނީ ގާނޫނު ހަދާ މަޖިލީހުގެ ރައީސް ނަބީހް ބެރީ އާ ބައްދަލު ކުރައްވާފައެވެ. އެ ބައްދަލުވުމަށްފަހު، ހޮކްސްޓައިން ވިދާޅުވީ، ހަނގުރާމަ ހުއްޓާލުމާ ބެހޭ މަޝްވަރާތަކުގެ ތަފްސީލު ހާމަ ނުކުރައްވާނެ ކަމަށެވެ.

ހިޒްބުﷲގެ ލީޑަރު ނައީމް ޤާސިމް ހަނގުރާމަ ހުއްޓުވުމުގެ މަޝްވަރާތަކާ ގުޅޭގޮތުން ބަޔާނެއް ދެއްވާނެ ކަމަށް ބެލެވެއެވެ.

އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ޣައްޒާ ގައި ހުންނަވާ ވާހަކަ ދައްކަވަމުން ހަމާސް އިން ދެން ޣައްޒާ ހިންގުމުގެ ކަންކަން ނުބަލަހައްޓާނެ ކަމަށާއި، އަދި ޣައްޒާގައި ރަހީނު ކޮށްފައިވާ އިޒްރޭލުގެ މީހުން ހޯދައިދީފި ނަމަ 5 މިލިއަން ޑޮލަރުގެ އިނާމެއް ދެއްވާނެ ކަމަށް ވަނީ އިއުލާނު ކުރައްވާފައެވެ.

އަނެއްކޮޅުން އިޒްރޭލުގެ ބާރުތަކުން ލުބުނާނުގެ ދެކުނުގައި ލުބުނާނުގެ ތިން ސިފައިން މަރާލައިފިއެވެ. އަދި އެ ޤައުމުގައި ހުންނަ އދ. ގެ ސުލްހަ ބެލެހެއްޓުމުގެ މިޝަން (ޔުނިފިލް) އިން ބުނެފައިވާ ގޮތުގައި ދެކުނު ލުބުނާނުގައި ސުލްހަ ބަލަހައްޓާ ފައުޖުގައި ހިމެނޭ ގާނާ އަށް ނިސްބަތްވާ ހަތަރު ސިފައިން ރޮކެޓް ހަމަލާއެއްގައި ޒަޚަމްވެފައިވެއެވެ.

އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 43,985 ފަލަސްތީނު މީހުން މިހާތަނަށް ވަނީ ޝަހީދުވެފައެވެ. އޭގެ އިތުރުން 104,092 މީހުން ޒަޚަމްވެފައިވެއެވެ.

ލުބުނާނުގައި، ޣައްޒާގެ ހަނގުރާމަ ފެށުނީއްސުރެ އިޒްރޭލުގެ ހަމަލާތަކުގައިކުގައި މަދުވެގެން 3,544 މީހުން މަރުވެ، 15,036 މީހުން ޒަޚަމްވެފައިވެއެވެ.