އިނގިރޭސި ޕްރިމިއާ ލީގުގައި ސައުތެމްޓަންއާ ދެކޮޅަށް ކުޅުނު މެޗުން މޮޅުވެ، ލިވަޕޫލުން އެއް ވަނައިގައި ބޮޑު ލީޑެއް ނަގައިފި އެވެ.

ސައުތެމްޓަންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ލިވަޕޫލް އިން ކާމިޔާބު ކުރީ 3-2ންނެވެ. މެޗުގައި ލިވަޕޫލުން ލަނޑު ޖަހައި ލީޑު ނަގާފައި ވަނިކޮށް، ސައުތެމްޓަން އިން ވަނީ ފަހަތުން އަރައި ނަތީޖާ ހަމަހަމަކޮށް، ލީޑު ވެސް ނަގައިފަ އެވެ. ނަަަމަވެސް އޭގެ ފަހުން ލިވަޕޫލުން އަނެއްކާ އިތުރު ދެ ލަނޑު ޖަހައިގެން ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ލިވަޕޫލުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑޮމިނިކް ސޮބޮސްލާއި އެވެ. ނަމަވެސް މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ލިބުނު ޕެނަލްޓީ ކާމިޔާބުކޮށް ސައުތެމްޓަން އަށް ނަތީޖާ ހަމަހަމަ ކޮށްދިނީ ސްޓުއާޓް އާމްސްޓްރޯންގް އެވެ.

ދެ ވަނަ ހާފު ފަށައިގެން 11 ވަނަ މިނެޓުގައި ސައުތެމްޓަން އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އާމްސްޓްރޯންގް ތަނަވަސްކޮށްދިން ފުރުސަތެއްގައި ސައުތެމްޓަން އަށް ލީޑު ނަގައިދިނީ މަތެއުސް ފެނާންޑޭޒް އެވެ. ނަމަވެސް އޭގެ ނުވަ މިނެޓު ފަހުން، މިޞްރުގެ ފޯވާޑު މުޙައްމަދު ޞަލާޙު ވަނީ ލަނޑު ޖަހައި ލިވަޕޫލަށް ނަތީޖާ ހަމަހަމަ ކޮށްދީފަ އެވެ. އަދި މެޗުން ލިވަޕޫލް މޮޅުވީ 83 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް ޞަލާޙު ޖެހި ލަނޑުންނެވެ.

މޮޅާއެކު ލިވަޕޫލް އިން ވަނީ އެއް ވަަނައިގައި އަށް ޕޮއިންޓުގެ ލީޑެެއް ނަގައިފަ އެވެ. މިހާތަަނަށް ކުޅުނު 12 މެޗުން ލިވަޕޫލަށް ލިބެނީ 31 ޕޮއިންޓެވެ. 10 މެޗުން ލިވަޕޫލް މޮޅުވެފައިވާއިރު، އެއް މެޗުން ބަލިވެ އަދި އަނެއް މެޗު ވަނީ އެއްވަރުވެފަ އެވެ. ލިވަޕޫލަށް އެއް ވަނައިގައި އަށް ޕޮއިންޓުގެ ލީޑެއް ލިބުނީ، އެންމެ ފަހުން މެންޗެސްޓަރ ސިޓީ ކުޅުނު މެޗުން އެ ޓީމު ބަލިވެފައި އޮތުމުންނެވެ. އާން ސްލޮޓްގެ އިރުޝާދުގެ ދަށުން ރަނގަޅު ނަތީޖާތަކެއް ނެރެމުން އަންނަ ލިވަޕޫލް އިން ވަނީ ފުރުސަތުގެ ބޭނުން ހިފައި ލީޑު ފުޅާ ކޮށްފަ އެވެ.