އިންޑިއާ އިން ރާއްޖެ އަށް ހަކުރު އެކްސްޕޯޓު ކުރުން ހުއްޓާލައިފި

ޚާއްޞަ އެއްބަސްވުމެއްގެ ދަށުން ދިވެހިރާއްޖެ އަށް އެކްސްޕޯޓު ކުރި 70 ޓަނުގެ ހަކުރު ސްރީލަންކާ އަށް ވަގަށް އެތެރެކުރި ކަމަށް ތުހުމަތުކުރެވޭ މައްސަލަ ތަޙުޤީޤު ކުރަމުންދާތީ ރާއްޖެއަށް އިންޑިއާ އިން ހަކުރު އެކްސްޕޯޓު ކުރުން ހުއްޓާލައިފިއެވެ.

އިންޑިއާގެ ނޫސްތަކުން ހޮނިހިރު ދުވަހު ރިޕޯޓުކޮށްފައިވާ ގޮތުގައި، އިންޑިއާގެ އިޤްތިޞާދީ ކަންކަމާބެހޭ މިނިސްޓްރީގެ ދަށުން ހިންގާ ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން މި ތަޙުޤީޤު ވަނީ ފަށާފައެވެ.

އޮކްޓޯބަރު 25 ގައި ރިޕޯޓުކުރެވުނު ގޮތުގައި، އިންޑިއާގެ ބައެއް އެކްސްޕޯޓަރުން ވަނީ ދެ ޤައުމުގެ ދެމެދުގައި ވެފައިވާ އެއްބަސްވުމެއްގެ ދަށުން ދިވެހިރާއްޖެއަށް އެކްސްޕޯޓް ކުރުމަށް އިންޑިއާ ސަރުކާރުން ހުއްދަދިން 64,494.33 ޓަނުގެ ހަކުރުގެ ބައެއް ނަހަމަ ގޮތުގައި ބޭނުން ކޮށްފައިވާ ކަމަށް ތުހުމަތު ކުރެވިފައެވެ.

އިންޑިއާގެ ބައެއް މީޑީއާ ތަކުން ބުނެފައިވާ ގޮތުގައި ދިވެހިރާއްޖެ އަށް އެކްސްޕޯޓް ކުރުމަށް ހަމަޖެހިފައިވާ މަދުވެގެން 7 ކޮންޓޭނަރުގެ ހަކުރު އެހެން ތަނަކަށް ގެންދަން މަސައްކަތް ކޮށްފައިވާ ކަމުގެ ތުހުމަތުގައި ނަވާ ޝޭވާ ބަނދަރުގައި ވަނީ ހިފަހައްޓާފައެވެ.

އަނެއްކޮޅުން، އިންޑިއާގެ ހަކުރު ކޮޅުނބަށް އެތެރެކުރި ކަމުގެ އިންޒާރަކާ ގުޅިގެން ސްރީލަންކާގެ ކަސްޓަމްސް އޮފިޝަލުން ގާތްގަނޑަކަށް 70 ކޮންޓެއިނަރުގެ ހަކުރު ހިފަހައްޓާފައިވާ ކަމަށް ރިޕޯޓެއްގައި ބުނެފައިވެއެވެ.

ދިވެހިރާއްޖެ އާއެކު ވެފައިވާ އެއްބަސްވުމެއްގެ ދަށުން އޭޕްރިލް 5، 2024 ގައި، ޑީޖީއެފްޓީން ވަނީ ހަނޑޫ، ފުށް، މުގު، ހަކުރު، ބިސް، އަލުވި އަދި ލޮނުމެދު، އަދި ހިލަ އާއި ހިލަވެލި ރާއްޖެ އަށް އެކްސްޕޯޓް ކުރުމަށް ހުއްދަދީ އިޢުލާނެއް އާންމު ކޮށްފައެވެ.

2023-24 ސީޒަންގައި (ސެޕްޓެމްބަރު-އޮކްޓޯބަރު) ހަކުރު އުފެއްދުންތެރިކަން ދަށްވުމާ ގުޅިގެން އިންޑިއާ އިން ވަނީ އެ ގައުމުން ހަކުރު އެކްސްޕޯޓްކުރުން މަނާ ކޮށްފައެވެ. އެހެން ނަމަވެސް، ދިވެހިރާއްޖެ ފަދަ މަދު ޤައުމުތަކަކަށް މަދު އަދަދަކަށް ހަކުރު އެކްސްޕޯޓު ކުރުމަށް އިންޑިއާ ސަރުކާރުން އޮތީ ނިންމާފައެވެ.

އޭގެ ފަހުން އޭޕްރިލް 15، 2024 ގައި، ޑީޖީއެފްޓީން ބުނީ ދެ ޤައުމުގެ ދެމެދުގައިވާ އެއްބަސްވުމުގެ ދަށުން ހުއްދަ ދީފައިވާ މުދާ އެކްސްޕޯޓު ކުރެވޭނީ ކަނޑައެޅިފައިވާ ބަނދަރުތައް މެދުވެރިކޮށް އެކަނި ކަމުގައެވެ.

ރާއްޖެ އަށް އަންނަން ޖެހޭ ޝިޕްމެންޓެއް އެހެން ދިމާލަކަށް ދިއުމާ ގުޅޭ ތަޙުޤީޤު ފެށުމާ ގުޅިގެން، ދިވެހިރާއްޖެއަށް ހަކުރު އެކްސްޕޯޓްކުރުން ގާތްގަނޑަކަށް މުޅިންހެން ހުއްޓިފައިވާ ކަމަށް އިންޑިއާގެ މީޑިއާ އިން ބުނެފައިވެއެވެ. ވިޔަފާރީގެ މަޞްދަރުތަކާ ހަވާލާދީ ރިޕޯޓުތައް ބުނާ ގޮތުގައި ސްރީލަންކާގެ އޮފިޝަލުން ވަނީ ހަކުރު ޝިޕްމަންޓަށް ކްލިއަރަންސް ދިނުން ހުއްޓާލާފައިވެއެވެ. އޭގެ އިތުރުން އެތެރެ ކުރަން އުޅުނު ހަކުރު ގަންނަން އުޅުނު ފަރާތްތައް ހޯދާ ލަންކާގެ އޮފިޝަލުން ވަނީ ތަހުގީގު ފަށާފައެވެ.

ރިޕޯޓުތައް ބުނާ ގޮތުގައި އޮކްޓޯބަރު މެދާ ހަމައަށް، ދިވެހިރާއްޖެއަށް އެކްސްޕޯޓް ކުރުމަށް ހުއްދަ ދެވިފައިވާ 80 އަށްވުރެ ގިނަ ކޮންޓެއިނަރުގެ ހަކުރު ސްރީލަންކާގެ ކޮޅުނބަށް ގެންގޮސްފައިވެއެވެ.

އިންޑިއާގެ ބިޒްނަސްލައިން އިން ހާމަ ކޮށްފައިވާ ގޮތުގައި އެ ނޫހަށް ލިބިފައިވާ ސެޕްޓެމްބަރު 30، 2024 ގެ ތާރީޚުގެ ބިލް އޮފް ލޭޑިންގގެ ކޮޕީ އަކުން ހާމަވާ ގޮތުން، 270 ޓަނުގެ މުދާ ނަވާ ޝޭވާ ބަނދަރުން ފޮނުވާފައިވަނީ ކޮޅުނބަށެވެ.