ވެރިކަމާއި ހަވާލުވި އިރު އިގްތިސާދު އޮތީ ޑިފޯލްޓް ކުރުމަށް ޑިޒައިން ކޮށްފައި: ރައީސް މުއިއްޒު

ވެރިކަމާއި ހަވާލުވި އިރުގައި އޮތީ ފުން އަނދަވަޅަކަށް ވަށްޓައިލާފައިވާ، ޑިފޯލްޓް ކުރުމަށް ޑިޒައިން ކޮށްފައި އޮތް އިގްތިސާދެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ބިޑަކާއި ނުލާ 206 މަޝްރޫއު ޕީއެންސީގެ މެންބަރުންނާއި ގުޅުން އޮންނަ ކުންފުނިތަކަށް ބަހާލި ހަފްލާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ރާއްޖޭގެ އިގްތިސާދު ވަރަށް ރަނގަޅު މިސްރާބަކަށް ގެންދެވިފައިވާ ކަމަށެވެ. އަދި އެމަނިކުފަނު ވެރިކަމާއި ހަވާލުވީއިރުގައި އިގްތިސާދު އޮތީ ފުން އަނދަވަޅަކަށް ވަށްޓައިލާ، ޑިފޯލްޓް ކުރުމަށް ޑިޒައިން ކޮށްފައި ކަމަށެވެ.

Advertisement

ރައީސް މުއިއްޒު ވިދާޅުވީ އިގްތިސާދު ކޮޅަށް ނަގައި، ކޮޅަށްޖަހައި، ވަރަށް ގިނަ ފަރާތްތަކެއްގެ އެއްބާރުލުމާއެކު، ސަރުކާރުގެ ތެރެއިން އެންމެންވެގެން ކުރެވުނު މަސައްކަތުގެ ނަތީޖާއެއްގެ ގޮތުން، 206 މަޝްރޫއުގައި ސޮއިކުރުމާ ހަމައަށް ދެވުނު ކަމަށެވެ.

އެއީ، އިޤްތިޞާދުގައި މި ބުންވަރު ނެތްނަމަ، މި ދުވަހެއް ނާންނާނެ. އިޤްތިޞާދާ މެދުގައި، ސަރުކާރާ މެދުގައި، ޕްރައިވެޓް ސެކްޓަރގެ އިތުބާރު ނެތްނަމަ، މި ހިސާބަކަށް ނުގެނެވޭނެ. އެހެންވީމާ، މިކުރެވުނު މަސައްކަތުގެ ނަތީޖާއަކީ އެއީ. މިއަދު، މި ޖަލްސާގައި ސޮއިކުރެވިގެން މިދިޔަ 206 މަޝްރޫޢަށް، އިއްޔެއާއި، އޭގެ ކުރީދުވަހު، މި މަސައްކަތުގެ ތެރެއިން ސޮއިކުރެވިގެންދިޔަ މަޝްރޫޢުތަކާއެކު، 216 މަޝްރޫޢު ސޮއިކުރެވިގެން މިދިޔައީ. މިގޮތުން ކުރެވުނު މަސައްކަތުގެ ތެރެއިން. އާދެ، ހުރިހާ އަތޮޅެއްގައި، 123 ރަށުގައި މަސައްކަތްތައް ކުރުމަށް، މިދިޔަ ދެ ދުވަސް ހިމެނޭގޮތުން، މިއަދާއެކު، މި ތިން ދުވަހުން މި ހަވާލުކުރެވުނީ، 123 ރަށުގައި މަސައްކަތްކުރަން. މިއީ، އަޅުގަނޑު ހިތުން އެއްފަހަރާ، އެއް ދުވަހެއްގައި، އަދި އަމުދުން، ހަމައެކަނި ދިވެހި ޕްރައިވެޓް ސެކްޓަރ ކުންފުނިތަކާ މަސައްކަތް ހަވާލުކުރެވި، މަސައްކަތް ފެށޭ ދުވަސް. އާދެ، ތަފާތު 53 ކުންފުންޏެއް މިވަނީ މަސައްކަތްތަކާ ހަވާލުވެފައި.

ރައީސް ޑރ. މުހައްމަދު މުއިއްޒު

ރައީސް ވިދާޅުވީ ސޮއިކުރި މަޝްރޫއުތަކާ އެކީ ދިވެހިރާއްޖޭގެ އިޤްތިޞާދު ފުޅާވެގެންދާނެ ކަމަށެވެ. ކޮންސްޓްރަކްޝަން އިންޑަސްޓްރީ ކުރިއަރައިގެންދާނެ ކަމަށައި، އެ މަޝްރޫއުތަކުގައި އެއްވެސް ކަހަލަ ޕޭމެންޓެއްގެ ނުވަތަ ފައިސާ ލިބުމުގެ އެއްވެސް ތާށިކަމެއް ނާންނާނެ ކަމަށެވެ.

ރައީސް ވިދާޅުވީ ސަރުކާރުގެ ތެރެއިން ފައިސާ ދޫކުރުމުގައި އެ ހުންނަ ދަތިތަކުގެ ތެރެއިން، އެ އަންނަ ޑިލޭތައް އެއްވެސް ވަރަކަށް ނާންނާނެ ގޮތުގައި، މަސައްކަތްތައް ބަރާބަރަށް، އެގްރީމަންޓްގައި ވާގޮތަށް ކުންފުނިތަކުން ކުރަމުން ގެންދާނެ ކަމަށެވެ. އަދި ކުރުމަށް މަޖުބޫރު ވާނެ ކަމަށެވެ.