ބަޔާން މޮޅުވީ ކޭންގެ ހެޓްރިކުން

ޖަރުމަނު ލީގުގައި އޮގްސްބާގާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން އެއް ވަަނައިގައި ލީޑު ފުޅާ ކޮށްފި އެވެ.

ބައިނަލްއަޤުވާމީ ބްރޭކަށްފަހު، ޖަރުމަނު ލީގުގައި ހުކުރު ދުވަހުގެ ރޭ އޮގްސްބާގާ ދެކޮޅަށް ކުޅުނު މެޗު ބަޔާނުން ކާމިޔާބު ކުރީ 3-0ންނެވެ. މެޗުގައި ބަޔާނުން އެ ޓީމުގެ ތިން ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ބަޔާނަށް ވަނީ ލަނޑު ޖަހާނެ ފުރުސަތު ލިބިފަ އެވެ. އެގޮތުން ބަޔާނަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އަށް ވަނީ ފުރަތަމަ ހާފުގައި ލަނޑު ޖަހާނެ ފުރުސަތު ލިބިފަ އެވެ. އޭނާގެ އިތުރުން ޖަރުމަނުގެ ޖަމާލް މުސިއާލާ އަށް ލަނޑު ޖަހާނެ ފުރުސަތު ލިބުނުއިރު، ކިންގްސްލީ ކޯމަން އަށް ވެސް ވަނީ ފުރުސަތެއް ލިބިފަ އެވެ.

މެޗުގެ ދެ ވަނަ ހާފުގައި ބަޔާނަށް ލީޑު ނަގައިދިނީ ކޭން އެވެ. އެގޮތުން މެޗުގެ 63 ވަނަ މިނެޓުގައި ބަޔާނަށް ލިބުނު ޕެނަލްޓީ ކާމިޔާބުކޮށް ކޭން ލީޑު ނަގައިދިންއިރު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ކޭން ދެ ވަނަ ލަނޑެއް ޖެހީ ވެސް ޕެނަލްޓީ އަކުންނެވެ. އޭގެ އިރުކޮޅެއް ފަހުން މެޗުގައި ކޭން ވަނީ ތިން ވަނަ ލަނޑެއް ވެސް ޖަހައި ހެޓްރިކް ހަމަކޮށްފަ އެވެ. އެ ލަނޑު އޭނާ ޖެހީ ލިއޯން ގޮރެޓްޒްކާ ތަނަވަސްކޮށްދިން ފުރުސަތެއްގަ އެވެ.

މިއާއެކު މި ސީޒަންގައި ކޭން ބަޔާނަށް ޖަހައިދިން ލަނޑުގެ އަދަދު ވަނީ 20 އަށް އަރައިފަ އެވެ. އޭގެ ތެރެއިން ޖަރުމަނު ލީގުގައި އޭނާ ވަނީ 14 ލަނޑު ޖަހައިފަ އެވެ. މި ސީޒަންގެ ޖަރުމަނު ލީގުގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ އެއް ވަނައިގައި އޮތީ ވެސް ކޭން އެވެ.

މޮޅާއެކު ބަޔާން އެއް ވަނައިގައި އޮތީ މިހާތަނަށް ކުޅުނު 11 މެޗުން 29 ޕޮއިންޓު ހޯދައިގެންނެވެ. ނުވަ މެޗުން ބަޔާން މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ބަޔާންގެ ފަހަތުން ދެ ވަނައިގައި އޮތް އާރްބީ ލައިޕްޒިގަށް 10 މެޗުން ލިބެނީ 21 ޕޮއިންޓެވެ.