އިންފްލޭޝަން މައްޗަށް ގޮސް އަންނަ އަހަރު ތަކެތީގެ އަގު ބޮޑުތަނުން އުފުލޭނެ

2025 ވަނަ އަހަރު ރާއްޖޭގެ އިންފްލޭޝަން ރޭޓް 3.9 އިންސައްތައަށް އުފުލޭނެ ކަމަށް ފިނޭންސް މިނިސްޓްރީން ލަފާކުރުމާއެކު ތަކެތީގެ އަގު ބޮޑުތަނުން މައްޗަށް ދާނެ ކަމަށް ބެލެވެން ފަށައިފިއެވެ.

އަންނަ އަހަރު މީން ޒަމާނަކު އިންފްލޭޝަން މައްޗަށް ނުދާ ވަރަށް އުފުލޭނެ ކަމަށް ބެލެވެނީ މިނިސްޓްރީ އޮފް ފިނޭންސްއިން 2025 ވަނަ އަހަރުގެ އޭޕްރީލް މަހުން ފެށިގެން ސަބްސިޑީ އަށް ގެންނަ ބަދަލުތަކާ ގުޅިގެންނެވެ.

ސަރުކާރުން ބުނެފައިވަނީ މިހާތަނަށް މުޅި ރައްޔިތުންނަށް ކާބޯތަކެއްޗާއި ބޭސް ފަރުވާ އާއި ތެލަށް ދެމުން އައި ސަބްސިޑީ "ޓޭގެޓެޑް ސަބްސިޑީ" ނުވަތަ ހޮވާލޭ ބަޔަކަށް އެކަނި ދޭ ސަބްސިޑީ އަކަށް ބަދަލު ކުރާނެ ކަމަށެވެ. 

އަންނަ އަހަރު ރާއްޖޭގެ އިންފްލޭޝަން ބޮޑުތަނުން މައްޗަށް ދާނެ ކަމަށް ބެލޭއިރު، 2024 ވަނަ އަހަރުގެ ސެޕްޓެމްބަރު މަހު ދިވެހިރާއްޖޭގެ އިންފްލޭޝަން ރޭޓް ހުރީ 1.1 އިންސައްތައިގައެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 2.6 އިންސައްތައިގެ ދަށްވުމެކެވެ.

ރާއްޖޭގެ އިންފްލޭޝަން ދާދި އެއްވަރެއްގައި ހިފެހެއްޓިފައި ހުންނަ މައިގަނޑު ސަބަބެއްގެ ގޮތުގައި ބެލެވިފައި އޮންނަނީ، ތެލާއި، އަސާސީ ކާބޯތަކެއްޗާއި، ކަރަންޓާއި ނަރުދަމާ ހިމެނޭގޮތަށް، އަސާސީ މުދަލާއި ޚިދުމަތްތަކަށް، ސަބްސިޑީ ދީ، އަގު ކޮންޓްރޯލް ކުރުމުގެ ސަބަބުންނެވެ.

އޭގެ ސަބަބުން ދުނިޔޭގެ ބާޒާރުގައި އަގުތަކަށް އަންނަ ބަދަލުތަކުގެ އަސަރު ދިވެހި ރައްޔިތުންނަށް މާ ބޮޑަށް ކުރިޔަ ނުދީ ހިފެހެއްޓުމަށް މަގު ފަހިވެއެވެ. ޚާއްޞަކޮށް ދުނިޔޭގެ ބާޒާރުގައި ތެލުގެ އަގު މައްޗަށް ދިޔަ ނަމަވެސް، ތެލަށް ދޭ ސަބްސިޑީގެ ސަބަބުން ކަރަންޓުގެ އަގު ހިފެހެއްޓިފައި އޮތުމާއެކު، ދުނިޔޭގެ އެހެން ގައުމުތަކުގައި ދިމާވާ ގޮތައް ކަރަންޓުގެ އަގު ބޮޑުވުމުން ޚިދުމަތާ ތަކެތީގެ އަގު މައްޗަށްދާ ގޮތައް ރާއްޖޭގައި އެކަން އެހެން ހިނގާފައެއް ނުވެއެވެ.

އަސާސީ ޚިދުމަތާއި ތަކެއްޗަށް ސަބްސިޑީ ދޭން ފެށީއްސުރެ ރާއްޖޭގައި މިކަން ކުރެވުމުން އައީ އެއްވެސް ތަފާތު ކުރުމެއްނެތި މުޅި އާބާދީ އަށް ދޭ އެހީތެރިކަމެއްގެ ގޮތުގައެވެ. ނަމަވެސް މުއިއްޒުގެ ސަރުކާރުން އެކަން ބަދަލުކޮށް، އަންނަ އޭޕްރީލް މަހުން ފެށިގެން، ބަޖެޓުގައި ކަނޑައަޅާފައިވާ 900 މިލިއަން ރުފިޔާގެ ސަބްސިޑީގެ އެހީތެރިކަން ދޭނީ ހަމައެކަނި ސަރުކާރުން ކަނޑައަޅާ ފަރާތްތަކަކަށް އެކަންޏެވެ.

ސަބްސިޑީ އަށް ގެންނަ ބަދަލުތަކާއެކު މުދަލާއި ޚިދުމަތުގެ އަގުތައް މައްޗަށް ދާނެ ކަމަށް ބެލެވިފައިވާއިރު، ސަރުކާރުން އެހީދޭ އާއިލާތައް ކަނޑައަޅާ ގޮތެއް މިހާތަނަށް ހާމަ ކޮށްފައެއް ނުވެއެވެ. އެހީތެރިކަން އެންމެ ބޭނުންވާ އާއިލާތައް ކަނޑައަޅާނެ މިންގަނޑުތައް ބަޖެޓް މަޝްވަރާ ކުރި މަރުހަލާގައިވެސް ސަރުކާރުން ހާމަ ކޮށްފައެއް ނުވެއެވެ.

އިންފްލޭޝަން މައްޗަށް ދާނެ ކަމަށް މިހާރުވެސް ލަފާ ކުރެވިފައިވާއިރު، ތަކެއްޗާއި ޚިދުމަތުގެ އަގަށް އަންނަ ބަދަލުތަކުން ރައްޔިތުންނަށް ކުރިމަތިވާނެ ދަތިތަކުގެ އަސަރު ކުޑަ ކުރާނެ ޕްލޭނެއް މިހާތަނަށް ހާމަ ކޮށްފައެއް ނުވެއެވެ. އިންސާފުވެރިކަމާއެކު އެހީ ދޭނެ ގޮތެއް ބުނެދެވިފައެއް ވެސް ނުވެއެވެ.