ލުބުނާނުގެ ވެރިރަށް ބެއިރޫތުގެ މެދުތެރެއަށް އިޒްރޭލުން ހޯމަ ދުވަހު އަނެއްކާވެސް ބޮން އެޅުމުގެ ސަބަބުން ފަސް މީހުން މަރުވެއްޖެއެވެ.

މި ހަމަލާ ދީފައި މިވަނީ ލުބުނާނުން އިޒްރޭލަށް ދިން ރޮކެޓް ހަމަލާއެއްގައި އެކަކު މަރުވެ، އެތަށް ބަޔަކު ޒަޚަމްވެފައި ވަނިކޮށެވެ.

އިޒްރޭލުން ބެއިރޫތުގެ މެދުތެރެއަށް އަނެއްކާވެސް ހަމަލާއެއް ދީފައިވާއިރު، އާދީއްތަ ދުވަހު އިޒްރޭލުން ވަނީ ބެއިރޫތުގެ މެދުތެރޭގައި ހުރި އިމާރާތަކަށް އެއްވެސް އިންޒާރެއް ދިނުމަކާ ނުލާ ވަރުގަދަ ހަމަލާއެއްދީ ހިޒްބުﷲގެ ތަރުޖަމާނު މުޙައްމަދު އަފީފްގެ އިތުރުން 5 މީޑިއާ އޮޝަލުން މަރާލާ، އެތަށް ބަޔަކު ޒަޚަމްކޮށްލާފައެވެ. ވޭތުވެދިޔަ ހަފްތާތަކުގައި އިޒްރޭލުގެ ވައިގެ ހަމަލާތައް އަމާޒުވެފައިވަނީ ބެއިރޫތުގެ ދެކުނު ސަރަހައްދުގައިވާ ހިޒްބުﷲގެ މައި މަރުކަޒުތަކަށެވެ.

އަނެއްކޮޅުން، ހޯމަދުވަހު ރެސްކިއު ޓީމު ތަކުން މައުލޫމާތު ދޭގޮތުގައި އުތުރު ޣައްޒާއަށް އިޒްރޭލުން ދިން ހަމަލާއެއްގައި މަދުވެގެން 34 މީހުން މަރުވެ، އެތައް ބަޔަކު ވަނީ ވީނުވީއެއް ނޭނގި ގެއްލިފައެވެ. އަދި ހަމަލާ އަމާޒުވި ސަރަހައްދުން އަދިވެސް ދިރިހުރި މީހުން ހޯދުމަށް މަސައްކަތްކުރަމުންދާ ކަމަށެވެ.

ހަމައެއާއެކު، ލުބުނާނުގެ ސަރުކާރުގެ މީޑިއާ ކަމުގައިވާ ނޭޝަނަލް ނިއުސް އޭޖެންސީ (އެންއެންއޭ) އިން ބުނެފައިވާ ގޮތުގައި ޝިޔާ މުސްލިމުންގެ އަޅުކަން ކުރާ ތަނަކާ ކައިރި އެޕާޓްމަންޓަކަށް ވެސް އިޒްރޭލުން ހަމަލާދީ، މިކަމުގެ ސަބަބުން "ވަރަށް ބޮޑު ގެއްލުމެއް" ވަނީ ލިބިފައެވެ.

މީގެ އިތުރުން، އާދިއްތަ ދުވަހު މި ސަރަހައްދުން ގާތްގަނޑަކަށް ސަތޭކަ މީޓަރު ދުރުގައިވާ ސަރަހައްދަކަށް ވެސް އިޒްރޭލުން ހަމަލާދީ ތިން މީހުން މަރުވެފައިވާކަމަށް ލުބުނާނުގެ ޞިއްޙީ ވުޒާރާއިން ބުނެފައިވެއެވެ. އަދި މީގެ ކުރިން ބެއިރޫތުގެ މެދުތެރެއަށް ދިން އެހެން ހަމަލާއެއްގައި ހަތް މީހުން މަރުވެފައިވާކަމަށްވެސް އެ ވުޒާރާއިން ހާމަކޮށްފައިވެއެވެ.

ލުބުނާނުގެ ސިއްހީ ވުޒާރާގެ ތަފާސް ހިސާބުތައް ދައްކާގޮތުން ލުބުނާނުގައި، އިޒްރޭލުގެ ހަމަލާތަކުގައި މަދުވެގެން 3،287 މީހުން މަރުވެ، 14،222 މީހުން ވަނީ ޒަޚަމްވެފައެވެ.