ލުބުނާނުގެ ވެރިރަށް ބެއިރޫތުގެ މެދުތެރޭގައި ހުރި އިމާރާތަކަށް އިޒްރޭލުން ދިން ހަމަލާއެއްގައި ހިޒްބުﷲގެ ތަރުޖަމާނު މުޙައްމަދު އަފީފް ޝަހީދުވެއްޖެ ކަމަށް އެ ގްރޫޕުގެ އޮފިޝަލުން ބުނެފިއެވެ.

އާދީއްތަ ދުވަހު ހިޒްބުﷲގެ އޮފިޝަލުން ބުނި ގޮތުގައި، މި އިމާރާތަށް ހަމަލާދިނީ އެއްވެސް އިންޒާރެއް ދިނުމަކާ ނުލާ ކަމަށާއި، ބެއިރޫތުގެ އާބާދީ ބޮޑު ސަރަހައްދެއް ކަމުގައިވާ ރަސް އަލް-ނަބާ ސަރަހައްދަށް އިޒްރޭލުން ދިން މި ހަމަލާގައި އަފީފްގެ އިތުރުން 3 މީހަކަށް އެކި ވަރުގެ އަނިޔާތައް ވެފައިވާ ކަމަށެވެ.

ހަމަލާއާ ގުޅިގެން އިޒްރޭލު ސިފައިން އެކްސްގައި ކުރި ޕޯސްޓެއްގައި ބުނެފައިވަނީ، ހަމަލާ ދިނުމުގެ ކުރިން އެ ސަރަހައްދު ހުސްކުރުމަށް އިޒްރޭލު ސިފައިންގެ ފަރާތުން ރަސްމީކޮށް އަމުރެއް ނުކުރާ ކަމަށެވެ.

އަފީފަކީ އެތައް އަހަރެއް ވަންދެން ހިޒްބުﷲގެ އަލް-މަނާރު ޓެލެވިޜަން ސްޓޭޝަން ހިންގި ފަރާތެވެ. އޭގެ ފަހުން އޭނާވަނީ ޔަހޫދީ ސިފައިންނާ ދެކޮޅަށް ޖިހާދު ކުރާ މި ގްރޫޕްގެ މީޑިއާ ރިލޭޝަންސްގެ އެންމެ އިސް އޮފިސަރުގެ މަޤާމު އަދާކޮށްފައެވެ.

ސެޕްޓެމްބަރު މަހުގެ ފަހުކޮޅުން ފެށިގެން އިޒްރޭލުން ވަނީ ލުބުނާނުގެ އެކި ސަރަޙައްދުތަކަށް ދޭ ހަމަލާތައް ވަރުގަދަކޮށް، ހިޒްބުﷲގެ އިސް ފަންތީގެ ލީޑަރުންނަށް އަމާޒުކޮށް ދެމުންދާ މަރުގެ ހަމަލާތައް އިތުރުކޮށްފައެވެ. އެގޮތުން، މީގެ ދެމަސް ކުރިން އިޒްރޭލުން ވަނީ ހިޒްބުﷲ ގެ ލީޑަރު ހަސަން ނަސްރުﷲގެ އިތުރުން އެހެން އިސްވެރިއެއް ކަމަށްވާ ޢަލީ ކަރަކީ އާއި އެހެން ކޮމާންޑަރުންތަކެއްވެސް އަވަހާރަކޮށްލާފައެވެ.