މީޑީއާ ބިލު މަޖިލީހުން ބޭރުކުރާނަން، އަޅުގަނޑަކީ މީޑިއާތައް ކޮންޓްރޯލް ކުރަން އުޅޭ މީހެއް ނޫން: ރައީސް މުއިއްޒު
މިހާރަށް ވުރެ ބޮޑަށް މީޑިއާތަކަށް މިނިވަންކަންދޭނެ
އާދިއްތަ ދުވަހުގެ ރޭ ބޭއްވި ރައްޔިތުންނާއެކު ކުރިއަށް - ހަފްތާ 52 ރަސްމިއްޔާތުގައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ
ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަމަށް ހުރަސް އެޅޭގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލު ބޭރުކުރާނެ ކަމަށާއި، މީޑިއާތައް ކޮންޓްރޯލް ނުކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މި ބިލު މަޖިލީހަށް ހުށަހަޅާފައިވަނީ 13 ނޮވެންބަރު 2024 ގައި ބޭއްވި ޖަލްސާގައި ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރު އެވެ. ބިލު ގާނޫނަކަށް ވުމުން، ބްރޯޑްކާސްޓިން ކޮމިޝަން (ބްރޯޑްކޮމް) އާއި، މޯލްޑިވްސް މީޑިއާ ކައުންސިލް (އެމްއެމްސީ) އުވޭނެއެވެ. ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅައި، ބްރޯޑްކާސްޓިން ދާއިރާވެސް ހިމެނޭހެން މީޑިއާގެ ކަންކަން ތަންފީޒުކުރުމަށް ވަކި މުއައްސަސާ އެއް އުފެއްދުމަކީ މިގާނޫގެ މަގްސަދު ކަމަށް ބުނެފައިވާއިރު، މި ގާނޫނުގެ ދަށުން އުފައްދާ ކޮމިޝަނުން އެކުލަވާލާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ނޫސް މަޖައްލާ ޖޫރިމަނާ ކުރެވޭ އިރު، އަދި ވަކިވަކި ނޫސްވެރިން ވެސް 5،000 ރުފިޔާ އާއި 10،000 ރުފިޔާ އާ ދެމެދުން ޖޫރިމަނާ ކުރެވޭނެއެވެ.
މި ބިލާ ގުޅިގެން ގިނަ ނޫސްވެރިން ކަންބޮޑުވުންފާޅު ކުރަމުންދާ ދަނޑިވަޅެއްގައި އާދިއްތަ ދުވަހުގެ ރޭ ބޭއްވި ރައްޔިތުންނާއެކު ކުރިއަށް - ހަފްތާ 52 ރަސްމިއްޔާތުގައި ރައީސް މުއިއްޒު ވިދާޅުވީ މީޑިއާ ބިލުގައި ގަބޫލުކުރާ ސިޔާސަތުތަކެއް ނެތް ކަމަށާއި، މީޑިއާތައް ކޮންޓްރޯލް ކުރުމަށް މަސައްކަތް ނުކުރާ ކަމަށެވެ. އަދި ނޫސްވެރިން ވަކިން ރައީސް މުއިއްޒާއި ސުވާލުކުރުމުން ވިދާޅުވީ ރައްޔިތުންގެ މަޖިލީހުން އެބިލު ބޭރުކުރާނެ ކަމަށާއި، އެބިލު ބަލައިނުގަންނާނެ ކަމަށެވެ. އިތުރަށް ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ މިހާރަށް ވުރެ ބޮޑަށް މީޑިއާތަކަށް މިނިވަންކަންދޭނެ ކަމަށާއި، މީޑިއާތައް ބާރުވެރި ކުރުވުމަށް މަސައްކަތް ކުރަމުންދާ ކަމަށެވެ.
އެގޮތުން މީޑިއާތަކަށް ފައިސާ ދިނުމަށް ބަޖެޓުގައި ހިމަނާފައިވާ ކަމަށާއި، މީޑީއާތަކަށް އޮފީސް ސްޕޭސް ކުޑަ އަގެއް ލިބޭ ގޮތަށް ހަމަޖައްސައިދޭނެ ކަމަށް އެމަނިކުފާނު ވިދާޅުވިއެވެ. ރައީސް މުއިއްޒު ވިދާޅުވީ ހުޅުމާލޭގައި އެސްޓީއޯއިން ކުރިން އަޅަން ފަށާފައި ހުރި އިމާރާތް ސަރުކާރަށް ނަގާފައިވާ ކަމަށާއި، އެއިމާރާތުގެ ބައެއް ފްލޯތައް މީޑިއާތަކަށް ޚާއްސަކުރާނެ ކަމަށެވެ. އަދި ވިދާޅުވީ އެ އިމާރާތުގެ މަސައްކަތް އެއްކޮށް ނިންމުމަށް އަހަރެއްހާ ދުވަސް ނަގާނެ ކަމަށާއި، އުންމީދު ކުރަނީ 2026 ވަނަ އަހަރު ފެށޭއިރު، ކޮންމެ މީޑީއާއަކަށް އެތަނުން ޖާގަ ދިނުން ކަމަށެވެ.
މީޑިއާތަކުގެ ޒިންމާއެއް އޮތްކަން ފާހަގަކުރައްވައި ރައީސް މުއިއްޒު ވިދާޅުވީ މިއީ އިސްލާމް ގައުމެއް ކަމަށާއި، މީޑިއާތައް ހިންގަމުންދަނީ އިސްލާމުން ކަމަށެވެ. އެހެންކަމުން މީޑިއާތައް ހިންގަމުންދާންވާނީ ތެދު ބަހުން ކަމަށް ރައީސް މުއިއްޒު ވިދާޅުވިއެވެ.
މީގެ އިތުރުން ރައީސް މުއިއްޒު ވިދާޅުވީ މިއީ ދެފުށް ފެންނަ ސަރުކާރެއް ކަމަށާއި، ދުވަހަކު ވެސް ރާއްޖޭގައި މައުލޫމާތު ހާމަނުކުރާ ވަރަށް މައުލޫމާތު ހާމަކުރަމުން ގެންދާ ކަމަށެވެ.
ރައީސް މުއިއްޒު ވިދާޅުވީ ވަރަށް ގިނަ އާރްޓީއައި ހުށަހަޅާފައިވާ ކަމަށާއި، 91 ޕަސެންޓް އާރްޓީއައިތަކަށް ޖަވާބުދީފައިވާ ކަމަށެވެ. އަދި ވިދާޅުވީ ރައްޔިތުންގެ އަޑުގެ ނަމުގައި އުފައްދާފައިވާ ޕޯޓަލަށްއަށް ހުށަހަޅާފައިވާ 819 ސުވާލުގެ ތެރެއިން 773 ސުވާލަށް ޖަވާބު ދީފައިވާ ކަމަށާއި، 52 ހަފްތާ ތެރޭގައި އެކި މިނިސްޓްރީތަކުން 73 ނޫސްވެރިންގެ ބައްދަލުވުންތައް ބާއްވާފައިވާ ކަމަށެވެ. އޭގެ އިތުރުން 791 ފަހަރު މިނިސްޓަރުން އެކި މީޑިއާތަކަށް މައުލޫމާތު ދިނުމަށް ވަޑައިގަންނަވާފައިވާ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ ވާހަކަތައް ދައްކަމުންދަނީ ނަތީޖާއިން ކަމަށާއި، ދެފުށް ފެންނަ ސަރުކާރެއް ހިންގަމުންދާ ކަމަށެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވިއިރު، ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ. ރައީސް މުއިއްޒު ނޫސްވެރިންނާ ބައްދަލުނުރައްވާތާ ގިނަ ދުވަސްތަކެއް ވެފައިވާއިރު، ސަރުކާރުން ހާމަކުރަމުންދަނީ އެބޭފުޅުން ބޭނުންވާ ވަކި މައުލޫމާތުތަކެއް ހަމަ ގިނަ ބަޔަކު ދަނީ ބުނަމުންނެވެ. މީގެ އިތުރުން މިސަރުކާރުގެ ސިޔާސީ މަގާމުތަކުގެ ޖުމްލަ އަދަދު ވަނީ ސިއްރުކޮށްފައެވެ. ތަކުރާރުކޮށް އެސުވާލު ކުރި ނަމަވެސް އެއަދަދު މިހާތަނަށް ހާމަކޮށްފައިނުވެއެވެ. އަދި މިޑީއާ ބިލަށް ތާއީދު ނުކުރާ ކަމަށް ރައީސް މުއިއްޒު ވިދާޅުވެފައިވާއިރު، އެބިލަކީ ވެސް ސަރުކާރުގެ ފަރާތުން އައި ހުށަހެޅުމެއްގެ ދަށުން ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރު ހުށަހެޅުއްވި ބިލެއް ކަމަށް ބައެއް ރައްޔިތުން މަޖިލީހުގެ މެންބަރުން ދަނީ ތުހުމަތު ކުރަމުންނެވެ.
