2024 މާޗުގައި ފަށަން ބުނި ހެލިކޮޕްޓަރުގެ ޚިދުމަތް ދޭން ބޭނުންވާ ޑިޒައިން ކުރާނެ ފަރާތެއް އެއް އަހަރާ 7 މަސް ވީއިރު ވެސް ނުހޯދުނު
އާރްއެފްޕީއައި ޕްރޮސެސް އޮތީ ހުއްޓިފައި ކަމަށް ވިދާޅުވި
އިންޑިޔާ ސަރުކާރުން ހަދިޔާ ކުރި ހެލިކޮޕްޓަރު
ނިމުނު 2024 ވަނަ އަހަރުގެ މާޗު މަހު ހެލިކޮޕްޓަރުގެ ޚިދުމަށް ފަށާނެ ކަމަށް ބުނި ނަމަވެސް އޭގެ އެއް އަހަރާ ހަތް މަސް ފާއިތުވިއިރު އަދި އެ މަސައްކަތް ކުރާނެ ބައެއް ވެސް ނުހޯދޭ ކަމަށް ޓްރާންސްޕޯޓް މިނިސްޓަރު މުހައްމަދު އަމީން އެއްބަސްވެވަޑައިގެންފި އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ވަނީ 2024 ވަނަ އަހަރުގެ މާޗު މަހު ސަރުކާރުން ޚިދުމަތް ދޭން ފަށަން ބުނި ހެލިކޮޕްޓަރުގެ ޚިދުމަތް ނުފެށި ލަސްވަނީ ކީއްވެތޯ މިނިސްޓަރާ ސުވާލު ކުރައްވާފަ އެވެ.
މެންބަރުގެ އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ހެލިކޮޕްޓަރުގެ ހިދުމަތް ފެށުމުގެ ގޮތުން ތައްޔާރުކުރާ ރިލަޔަބިލިޓީ، އެވެއިލަބިލިޓީ، މެއިންޓެއިނަބިލިޓީ އެންޑް ސޭފްޓީ އިންޑިކޭޓާ (އާރްއެފްޕީއައި) ޕްރޮސެސް އޮތީ ހުއްޓިފައި ކަމަށެވެ. މިހާރު ގާނޫނީ ގޮތުން އެކަން ނިމުމަކަށް ވެސް ގެނަސްފައިވާ ކަމަށް ވެސް މިނިސްޓަރު ވިދާޅުވި އެވެ.
އަމީން ވިދާޅުވީ މިއަހަރުގެ ފަހުކޮޅު އެ މަސައްކަތް އަލުން ރީ ޑިޒައިން ކުރުމަށްފަހު އާރްއެފްޕީ އަށް ހުޅުވާލައިގެން އޭގެ އަހަރެއް ހާ ދުވަސް ފަހުން ހެލިކޮޕްޓަރުގެ ޚިދުމަތް ރާއްޖޭގައި ދޭން ފެށޭނެ ކަމަށް އުއްމީދު ކުރައްވާ ކަމަށެވެ.
މިއަހަރުގެ ފަހުކޮޅު މި ފުރަތަމަ އަޅުގަނޑުމެންނަށް މި އެޓެމްޕްޓް ކުރެވުނު ތަޖުރިބާއަށް ބަލާފަ ބަދަލުތަކާއެކީގަ އާރްއެފްޕީ އަށް ހުޅުވާލައިގެން އަޅުގަނޑު އުއްމީދު ކުރަނީ މިކަމަށް ހަމަ ވަރަށް ބޮޑު އުއްމީދެއް އެބައޮތް، ރާއްޖޭގަ މި އޮަޕަރޭޝަންސް ފެށުމަށްޓަކައި،ޓްރާންސްޕޯޓް މިނިސްޓަރު މުހައްމަދު އަމީން
ރާއްޖޭގައި ހެލިކޮޕްޓަރު އޮޕަރޭޓް ކުރާނެ ބަަޔަކު ހޯދާނެ ކަމަށް ސަރުކާރުން ހާމަކުރީ މިދިޔަ އަހަރުގެ ޖެނުއަރީ މަހުގަ އެވެ.
އޭގެ ފަހުން ރާއްޖޭގައި ހެލިކޮޕްޓަރުގެ ހިދުމަތް ފެށުމުގެ ގޮތުން ތައްޔާރުކުރާ ރިލަޔަބިލިޓީ، އެވެއިލަބިލިޓީ، މެއިންޓެއިނަބިލިޓީ އެންޑް ސޭފްޓީ އިންޑިކޭޓާ (އާރްއެފްޕީއައި) އެކުލަވައިލުމުގެ މަސައްކަތް މިހާރު އޮތީ ނިމުމަކާއި ގާތުގައި ކަމަށް މިނިސްޓަރު ވަނީ މިދިޔަ އަހަރުގެ މެއި މަހު ވިދާޅުވެފައެވެ.
އޭރު މިނިސްޓަރު ވިދާޅުވީ އެ އަހަރުގެ ޖޫން މަހުގެ ފުރަތަމަ ހަފްތާގައި އެ މަސައްކަތް ނިމޭނެ ކަމަށް ލަފާކުރެވޭ ކަމަށެވެ. މިނިސްޓަރ ވިދާޅުވީ ރާއްޖޭގައި ހެލިކޮޕްޓަރުގެ ހިދުމަތް ދިނުމާ ގުޅޭ އުސޫލު ގެޒެޓް ކުރުމުން، ހެލިކޮޕްޓަރު އޮޕަރޭޓްކުރާނެ ބަޔަކު ވަރަށް އަވަހަށް ލިބޭނެ ކަަމަށް އުންމީދުކުރެވޭ ކަމަށެވެ.
އެ މަސައްކަތް ލަސްވި ސަބަބާއި ގުޅޭ ގޮތުން ވެސް މިނިސްޓަރު ވަނީ ވާހަކަދައްކަވާފަ އެވެ. އެގޮތުން އާރްއެފްޕީީ ގެ މަސައްކަތް ލަސްވީ އެެކަމަށް ޓަކައި ފިނޭންސް މިނިސްޓްރީން ކުރަން ޖެހޭ މަސައްކަތްތައް ނުނިމި ދިގުލައިގެން ދިއުމުން ކަމަށް މިނިސްޓަރު އަމީން ވަނީ ވިދާޅުވެފަ އެވެ. އެހެން ނަމަވެސް ފިނޭންސް މިނިސްޓްރީން އެ މަސަައްކަތް ކުރަމުން ދާ ކަމަށާއި އެ މަސައްކަތް ކުރިއަށް ދަނީ އެޓަރނީ ޖެެނެރަލް އަހުމަދު އުޝާމްގެ ލަފާގެ މަތިން ކަމަށް މިނިސްޓަރު އޭރު ވިދާޅުވި އެވެ.
