ޤާނޫނީ ޒިންމާ އެއް އަދާ ކުރުމަށް ވަޑައިގެން ޕީއެންސީގެ އެކްޓިވިސްޓެއްގެ ގޮތުގައި ކޯފާވެ މެމްބަރުންނަށް ޖަވާބު ދެއްވުމަކީ ހަޑިހުތުރު އަމަލެއް!
މިނިސްޓަރު ހަގީގަތާ ޚިލާފު މަޢުލޫމާތު ދެއްވައި، ރައްޔިތުންނަށް އޮޅުން އަރާ ގޮތަށް ސުވާލުތަކަށް ޖަވާބު ދެއްވާތި މެންބަރުން ހިތްހަމަނުޖެހި އަޑު އުފުލަން ފެށި
ޑރ.މުހައްމަދު ޝަހީމް އަލީ ސައީދު، މަޖިލީހަށް ހާޒިރުވެވަޑައިގެން މެމްބަރުންގެ ސުވާލުތަކަށް ޖަވާބުދެއްވަނީ - 12.08.2025
ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލަކާ ގުޅިގެން އިސްލާމިކް މިނިސްޓަރު ޑރ. ޝަހީމް އަލީ ސައީދު ވަރަށް ބޮޑަށް ހިންހަމަޖެހިވަޑައިނުގެން، އަޑުހަރުކޮށް ވާހަކަދައްކަވައިފިއެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި އިސްލާމިކް މިނިސްޓަރު ޑރ. ޝަހީމް ބައިވެރިވެވަޑައިގެންފައިވެއެވެ. މި ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ނާޒިލް ވަނީ ހިތަދޫގައި އެމްޑީޕީ ސަރުކާރުން އަޅަން ފަށާފައިވާ އިސްލާމީ މަރުކަޒުގެ މަސައްކަތް ނިމޭނެ ތާރީޚެއް ހާމަކޮށް ދިނުމަށް މިނިސްޓަރު އަރިހުން އެދިވަޑައިގެންފައެވެ.
ނާޒިލް ވިދާޅުވީ އެ މަސައްކަތް ކުރިއަށް ނުދަނީ ކޮންޓްރެކްޓަރަށް ފައިސާ ނުދެވޭތީ ކަމަށް އެ ފަރާތުން މައުލޫމާތު ހާމަކޮށްފައިވާ ކަމަށެވެ. އެހެން ކަމުން އެކަމުގެ ތަފްސީލު ހިއްސާކުރެއްވުމަށް މެންބަރު އެދިވަޑައިގެންނެވިއެވެ.
މި ސުވާލާ ގުޅިގެން މިނިސްޓަރު ޝަހީމް އަލީ ސައީދު ވަނީ ވަރަށް ބޮޑަށް ކޯފާވެ ހަރުކަށިކޮށް ޖަވާބު ދެއްވާފައެވެ.
ހިތަދޫގައި އެމްޑީޕީ ސަރުކާރުން އަޅަންފަށާފައިވާ އިސްލާމީ މަރުކަޒު، މި މަރުކަޒުގަ ގުރުއާން އާ ބެހޭ ބައެއް ވެސް ހިމެނޭ. ޒަކާތު އޮފީހެއް ވެސް ހިމެނޭ. ޖަލްސާކުރާ މާލަމްތަކެއް ވެސް ހިމެނޭ. ހަމަ ދިއްދޫގައި އެމްޑީޕީން ހަވާލުކުރި މޮޑެލްގެ ތަނެއް. މަސައްކަތް ކުރިއަށް ނުދަނީ ކޮންޓްރެކްޓަރަށް ފައިސާ ނުދެވޭތީ ކަމަށް ކޮންޓްރެކްޓަރު އެބަ ބުނޭ. މީ ކިހިނެއް ހިނގާ ކަމެއްތޯ އަދި މި މިސްކިތް ނިމޭނެތޯ ކުރިއަށް އޮތް ދެތިން އަހަރުތެރޭގަ.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލްގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މެންބަރު ހިއްސާކުރެއްވި ހުރިހާ މައުލޫމާތަކީ ވެސް ދޮގު މައުލޫމާތުތަކެއް ކަމަށެވެ. އަދި ކޮންޓްރެކްޓަރަށް މިނިސްޓްރީގެ ފަރާތުން ދައްކަން ޖެހޭ ފައިސާގެ އެއްވެސް މިންވަރެއް ނުދައްކާ ނޯންނާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ޝަހީމް ވިދާޅުވީ އެ މަސައްކަތް ކުރިއަށް ނުދަނީ އެކަން ހަވާލުކޮށްފައިވާ ކުންފުންޏަކީ އެކަމަށް ނާގާބިލު ކުންފުންޏަކަށް ވުމުން ކަމަށެވެ. އަދި ހުރިހާ ފައިސާއެއް ދައްކަވާފައިވާ ކަމަށާ މެންބަރު ހިއްސާކުރެއްވީ ދޮގު މައުލޫމާތެއް ކަމަށް ތަކުރާރުކޮށް ވިދާޅުވިއެވެ.
ހުރިހާ ދަރަންޏެއް ދައްކާ ޚަލާސްކުރީ މި ސަރުކާރުން ކަމަށާ އެގޮތުން 170 މިލިއަން ރުފިޔާގެ ދަރަނި އެ މިނިސްޓްރީން ދައްކާފައިވާކަމަށް މިނިސްޓަރު ވިދާޅުވިއެވެ. އަދި ފައިސާ ނުދައްކާ ގައުމު ދަރުވާލީ އެމްޑީޕީ ސަރުކާރުން ކަމަށް މިނިސްޓަރު ވިދާޅުވިއެވެ.
އެއާއެކު މަޖިލީހުގެ ތަޅުމުގައި އަޑުގަދަވެ، ޕީއެންސީ މެންބަރުންނާ އެމްޑީޕީ މެންބަރުންގެ މެދުގައި ބަހުގެ ހަމަލާތަކެއް ބަދަލުކުރިއެވެ. މެންބަރު އަޑުގަދަ ކުރެއްވުމުން ރިޔާސަތުގައި އިންނަވާ މަޖިލީހުގެ ނައިބު ރައީސް އަހުމަދު ނާޒިމް ވަނީ ސުވާލަށް ޖަވާބު ދިނުމުގެ ފުރުސަތު މިނިސްޓަރަށް ދިނުމަށް އެދިފައެވެ. އަދި އަނެއްކާވެސް މިނިސްޓަރު ވާހަކަދެއްކެވުމަށް ފުރުސަތު ދެއްވިއެވެ.
މިނިސްޓަރު ޝަހީމްގެ ވާހަކަ ދެން ވެއްޓެވީ ވަރަށް ބޮޑަށް ހިންހަމަޖެހިވަޑައިނުގެން، ވަރަށް އަޑު ހަރުކޮށެވެ.
ހުރިހާ ދަރަންޏެއް އަޅުގަނޑުމެން އަދާކޮށްފަ އެއޮތީ. 170 މިލިއަން ރުފިޔާ.. އިއްޒަތްތެރި މެންބަރު އަޅުގަނޑުމެން ވާނީ ދައްކާފަ. ދޮގު މައުލޫމާތު ތި ފޯރުކޮށްދެއްވަނީ އަޅުގަނޑުމެންނަށް. އިއްޒަތްތެރި މެންބަރު އަޑުއައްސަވާ. ސުވާލުކުރައްވާފަ ޖަވާބު އަޑުއެހުމުގެ ގާބިލުކަން ތިބޭފުޅޭގެ ހުންނަން ޖެހޭނެ. ޖަވާބު އަޑުއެހުމުގެ ގާބިލުކަން ހުންނަން ޖެހޭނެ. ހުރިހާ ފައިސާއެއް ދެއްކީ އަޅުގަނޑުމެން. 50 މިލިއަން ރުފިޔާއިން އިސްލާމިކް މިނިސްޓްރީން ދަރުވާލާފަ ތިހުރީ. ލަދުގަންނަން ޖެހޭނެ ސުވާލު ކުރަން.އިސްލާމިކް މިނިސްޓަރު ޑރ. ޝަހީމް އަލީ ސައީދު
އެއާއެކު އަނެއްކާވެސް މަޖިލީހުގެ ތަޅުމުގައި އަޑުގަދަވެ، މިނިސްޓަރު އިންނެވި ގޮނޑި ކައިރީގައި ބައެއް މެންބަރުން އަޑު އުފުލަން ފެށުމާއެކު ރިޔާސަތުން ވަނީ ސެކިއުރިޓީ ވެސް ހާޒިރުކޮށްފައެވެ.
ރިޔާސަތުން ތަކުރާރުކޮށް މެންބަރުންނަށް އިށީނދެވަޑައިގަތުމަށް އެންގެވިނަމަވެސް ކެންދޫ ދާއިރާގެ މެންބަރު މައުރޫފް ޒާކިރު އެކަމަށް އިޖާބަ ނުދެއްވުމުން، ނަސޭހަތްތެރިވެ، ނަން އިއްވުމަށްފަހު އެންމެ ފަހުން ވަނީ މަޖިލީހުގެ ތަޅުމުން ބޭރުކޮށްފައެވެ.
މަޖިލީހުގައި މެންބަރުން ހިތްހަމަނުޖެހުން ފާޅުކުރަން ފެށީ، މިނިސްޓަރު ހަގީގަތާ ޚިލާފު މަޢުލޫމާތު ދެއްވައި، ރައްޔިތުންނަށް އޮޅުންއަރާފަދަ ގޮތަކަށް ސުވާލުތަކަށް ޖަވާބު ދެއްވަމުން ގެންދެވުމުގެ ސަބަބުންނެވެ. މީގެއިތުރުން، އެމްޑީޕީއަށް ނިސްބަތްވެވަޑައިގަންނަވާ މެންބަރުންގެ ސުވާލުތަކަށް މިނިސްޓަރު ޖަވާބުދެއްވަމުން ގެންދެވީ ޒާތީ ގޮތެއްގައި، ވަރަށް ބޮޑަށް ކޯފާވެ ހުންނަވައެވެ.
އެހެން ކަމުން މިނިސްޓަރ ޝަހީމް މަގާމުގެ ހައިސިއްޔަތުން ޤާނޫނީ ޒިންމާއެއް އަދާ ކުރުމަށް ވަޑައިގެން ޕީއެންސީގެ އެކްޓިވިސްޓެއްގެ ގޮތުގައި މެމްބަރުންނަށް ޖަވާބު ދެއްވުމަކީ މިނިސްޓަރެއްގެ ހައިސިއްޔަތުން ބަލާނަމަ ހަޑި ހުތުރު ކަމެއް ކަމަށް ހަނިމާދޫ ދާއިރާގެ މެންބަރު ޣަފޫރު ވެސް ވަނީ ވިދާޅުވެފައެވެ.
ބުދަ ދުވަހުގެ ޖަލްސާއަށް މިނިސްޓަރު ޝަހީމް ހާޒިކޮށްފައިވާއިރު ދެ މެންބަރަކު މިނިސްޓަރާ ކުރައްވަން ހުށަހަޅާފައިވާ ދެ ސުވާލު ވަނީ އެޖެންޑާގައި ހިމަނާފައެވެ.
