އެމްޑީޕީ ގެ މެންބަރުން ހުށަހަޅާފައި ހުރި ގިނަ މަސައްކަތްތައް ހިމެނޭ ގޮތަށް އަންގާރަ ދުވަހުގެ މަޖިލީހުގެ އެޖެންޑާ އާންމުކޮށްފި އެވެ.

އަންގާރަ ދުވަހުގެ ޖަލްސާގެ އެޖެންޑާގައި ފުރަތަމަ ހިމަނާފައިވަނީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް، މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރ ސްޓްރަކްޗަރ ޑރ. އަބްދުﷲ މުއްތަލިބު ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލެވެ. އެ ސުވާލުގައި ވަނީ އއ. ބޮޑުފޮޅުދޫ ރައްޔިތުން އެދިފައިވާ ގޮތަށް އެ ރަށުގެ ބަނދަރުގެ މަސައްކަތް ފެއްޓޭވަރުވާނީ ކޮންދުވަހަކުންތޯ އަދި، މަސައްކަތް ނިމޭނެ ކަމަށް ލަފާ ކުރާ މުއްދަތަކީ ކޮބައިތޯ އެވެ.

މީގެ އިތުރުން ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް، މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތާރިޤު އިބްރާހީމްއާ ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލު ދެވަނައަށް އެޖެންޑާ ކޮށްފައިވެއެވެ. މިނިސްޓަރާއި ކުރެއްވި ސުވާލަކީ ޖުލައި 1، 2023ން ފެށިގެން ޖުލައި 30، 2025 ގެ ނިޔަލަށް ޓޫރިޒަމްގެ ބޭނުމަށް ދޫކުރި ރަށްތަކާއި ފަޅުތަކުގެ އެކުއިޒިޝަން ކޮސްޓްތަކަކީ ކޮބައިތޯއެވެ.

މީގެ އިތުރުން އެޖެންޑާގެ 3 ވަނައިގައި ހިމެނެނީ ވެސް އެމްޑީޕީގެ މާވަށު ދާއިރާގެ މެންބަރު އަހުމަދު ޝާކިރު ފޮރިން މިނިސްޓަރު ޑރ. އަބްދުﷲ ހަލީލު އާއި ލިޔުމުން ޖަވާބު ހޯދުމަށް ކުރައްވާފައިވާ ސުވާލެކެވެ. އެ ސުވާލުގައި ވަނީ ސެޕްޓެމްބަރު 2، 2025 ގައި ރާއްޖެއާއި ޗައިނާ އާ ދެމެދު ސޮއިކުރެވުނު 11 ފަހުމުނާމާގެ ކޮޕީތައް ލިބޭނެ ގޮތް ހައްދަވައިދެއްވުން އެދޭ ކަމަށެވެ.

މީގެ އިތުރުން ކެންދޫ ދާއިރާގެ މެންބަރު މައުރޫފް ޒާކިރު ހުށަހަޅުއްވާފައިވާ 4000 ފުލެޓު ހަވާލުކުރުން ލަސްވާ މައްސަލައިގެ ހަރާރުގެ ބަހުސް ކުރިއަށް ގެންދިއުމަށް ހިމަނާފައިވެއެވެ.

އަންގާރަ ދުވަހުގެ އެޖެންޑާގައި ސަރުކާރުގެ ފަރާތުން އޮތީ އެންމެ މަސައްކަތެކެވެ. އެއީ ސަރުކާރުގެ ފަރާތުން ހުށަހަޅާ ހެއްކާ ބެހޭ ގާނޫނަށް އިސްލާހު ގެނައުމުގެ ބިލެވެ.