އޭޕްރިލް 18، ގައި ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގަށް އުފެއްދެވި ރިޔާސީ ކޮމިޝަނުން ނެރުނު ރިޕޯޓުގައި ހުރި ފިޔަވަޅުތައް އަޅަމުންދޭތޯ ބެލުމަށް ހޯމް މިނިސްޓަރު އަލީ އިހުސާން ގެ ފަރާތުން ޖަވާބެއް ހޯދުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވިތާ 2 މަސް ފަހުން، މިނިސްޓަރު އިހުސާންގެ ޖަވާބު ބުދަ ދުވަހުގެ މަޖްލިސް ޖަލްސާގައި އިއްވަން އެޖެންޑާކޮށްފިއެވެ.

ޔުމްނު ވެއްޓުނު މައްސަލާގައި ރައީސް މުއިއްޒު އުފެއްދެވި ރިޔާސީ ކޮމިޝަނުން ނެރުނު ރިޕޯޓުގައި، ފުލުހުންގެ އިހުމާލުތަކެއް ހުރިކަމަށް ފާހަގަކޮށް އެކަންކަމަށް ފިޔަވަޅުއަޅަން ލަފާދީފައިވާއިރު އެކަމާ ގުޅިގެން ފުލުހުންގެ އެއްވެސް ފަރާތަކަށް ފިޔަވަޅު އަޅާފައިވޭތޯ މެމްބަރު މުހައްމަދު އިބްރާހިމް ސުވާލު ކުރައްވާފައިވެއެވެ.

މީގެ އިތުރުން ކޮމިޝަނުގެ ރިޕޯޓުގައި ޖިނާއީ ތަހުގީގު ހިންގަންޖެހޭކަމަށް ކަނޑައަޅާފައިވާ ފަރާތްތަކުގެ މައްޗަށް ފުލުހުން ތަހުގީގު ހިންގަމުންދޭތޯވެސް މެމްބަރު މުހައްމަދު އިބްރާހިމް ސުވާލު ކުރައްވާފައިވެއެވެ.

ޔުމްނު ވެއްޓުނު ހާދިސާއާއި ގުޅިގެން ރިޔާސީ ކޮމިޝަނުން އެކުލަވާލި ރިޕޯޓުގައި ފުލުހުންނާ ގުޅޭގޮތުން ފާހަގަކުރި ކަންކަން ދެވަނަ ފަހަރަށް ތަކުރާރު ވިޔަނުދިނުމަށް ރައީސް މުއިއްޒު ވަނީ ފުލުހުންގެ އެސްއޯޕީތައް ރިވައިސްކޮށް، މުވައްޒަފުން އަހުލުވެރިކޮށް، ތަމްރީނު ދިނުމަށާއި، ޔުމްނު ވެއްޓުނު ހާދިސާގައި ފަރުވާކުޑަކުރި މުވައްޒަފުންގެ މައްސަލަ ބަލައި، އެ މުވައްޒަފުންނާމެދުގައި އިސްލާހީ ފިޔަވަޅު އެޅުމަށް އަންގަވައިފައެވެ.

އަދި މައްސަލައިގައި ހިމެނޭ ރައުދު އަހުމަދު ޒިލާލްގެ ބޭބެ ދާއޫދު އަހުމަދު ފުލުހުންނަށް ދިން ބަޔާނާއި ރިޔާސީ ކޮމިޝަނަށް ދިން ބަޔާނުގައި ތަފާތުތަކެއް ހުރި މައްސަލަ ވެސް ބެލުމަށްވެސް ރައީސް ވަނީ އަންގަވައިފަ އެވެ.

ރިޕޯޓާއި ގުޅިގެން ފާހަގަވި ކަންކަމާއި ގުޅިގެން ފިޔަވަޅު އަޅަން އެންގެވި ނަމަވެސް މިހާތަނަށް އެކަމާއި ގުޅިގެން އެޅި އެއްވެސް ފިޔަވަޅެއް ސަރުކާރުން ހާމަކޮށްފައެއް ނުވެއެވެ.

ކޮމިޝަނުގެ ތަހުގީގު ރިޕޯޓު އާއްމުކޮށްފައިވަނީ 17 ޖޫން 2025 ގައެވެ. އަދި ކޮމިޝަންގެ ރިޕޯޓުގައި ފާހަގަކޮށްފައިވާ ކަންކަން ތަންފީޒުކޮށް އަޅަންޖެހޭ ފިޔަވަޅުތައް އެޅުމަށް ރައީސް މުއިއްޒު އަންގަވާފައިވާ ކަަމަށް ރައީސް އޮފީހުން ބުނެއެވެ.