ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއަށް ބަދަލުކުރެއްވީ ރައީސް މުއިއްޒު ކަމަށް އެ މަނިކުފާނު ވިދާޅުވި ނަމަވެސް ކުރީގެ ރައީސް ޔާމީން ވެސް އެކަން ދޮގުކުރައްވާކަން ފާހަގަކޮށްލެވޭ
ރައީސް މުޢިއްޒު އާއި ކުރީގެ ރައީސް ޞާލިޙު އެކުގައި ނަންގަވާފައިވާ ފޮޓޯ އެއް
ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއަށް ބަދަލުކުރީ ރައީސް ޑރ.މުހައްމަދު މުއިއްޒު އާއި މަޖިލީހުގެ މިހާރުގެ ރައީސް އަބްދުއްރަހީމް އަބްދުﷲ އެދިވަޑައިގެން ނޫން ކަމަށާއި، އިންތިޚާބުގެ ކެމްޕެއިންގެ ދުވަސްވަރުވެސް އަދި އިންތިޚާބުވެ ވަޑައިގަތުމަށް ފަހުވެސް ރައީސް މުއިއްޒު އެފަދަ ކަމަކަށް އެދިވަޑައިގެންފައިވެސް ނުވާ ކަަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
ރައީސް ޑރ.މުހައްމަދު މުއިއްޒު ވަނީ ވަރަށް ގިނަ ފަހަރު ކުރީގެ ރައީސް އަބްދުﷲ ޔާމީން ޖަލުން ދޫކޮށްދެއްވުން އެދިވަޑައިގެން ކުރީގެ ރައީސް ޞާލިހުގެ އަރިހުގައި ދަންނަވާފައިވާނެ ކަަމަށް ވިދާޅުވެފައެވެ. އަދި ތަކުރާރުކޮށް ރައީސް ޞާލިހާއި ބައްދަލުކޮށް ރައީސް ޔާމީން ދޫކޮށްދެއްވުން އެދި ދަންނަވާފައިވާނެ ކަމަށް ވެސް ރައީސް މުއިއްޒު ވަނީ ވިދާޅުވެފައެވެ. ރައީސް ޞާލިހުގެ ފޯނުގައި ވެސް އެކަމާއި ގުޅޭގޮތުން ރައީސް މުއިއްޒު ކުރައްވާފައިވާ މެސެޖުތައް ހުންނާނެ ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފައެވެ. އަދި މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ ގަޑިއެއްހާއިރު ވަންދެން އެކަމާއި ގުޅޭގޮތުން ރައީސް ޞާލިހާއި ބައްދަލުކުރައްވާ ރައީސް މުއިއްޒު އާއި ދެ ބޭފުޅުން ވާހަކަދައްކަވާފައިވާ ކަމަށް ވިދާޅުވެފައެވެ. އެހެންނަމަވެސް ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ދާދިފަހުން ކުރީގެ ރައީސް ޔާމީން ވަނީ އެ މަނިކުފާނު ޖަލުން ދޫކޮށްލެއްވީ ރައީސް މުއިއްޒު ނޫން ކަމަށާއި އެކަން ކުރެއްވީ ކުރީގެ ރައީސް ޞާލިހު ކަމަށް ވިދާޅުވެފައެވެ.
އެކަމާއި ގުޅޭ ހަގީގަތްތައް ހާމަކުރައްވަމުން ކުރީގެ ރައީސް ޞާލިހު ވިދާޅުވީ ރައީސް މުއިއްޒު އިންތިޚާބު ކާމިޔާބު ކުރެއްވި ދުވަހުގެ ރޭ އެ މަނިކުފާނަށް ގުޅުއްވާފައިވާނެ ކަމަށެވެ. އެހެންނަމަވެސް އެ ކޯލްގައި ރައީސް ޔާމީން ދޫކޮށްލުމުގެ ވާހަކަ އެއްވެސް މިންވަރަކަށް ރައީސް މުއިއްޒު ފާހަގަ ނުކުރައްވާ ކަމަށް ރައީސް ޞާލިހު ވަނީ ވިދާޅުވެފައެވެ. އޭގެ ފަހުން ރައީސް މުއިއްޒު އާއި ބައްދަލުކުރައްވާފައިވާނެ ކަމަށް ފާހަގަކުރައްވާ ރައީސް ޞާލިހު ވަނީ އެކަމުގެ ތަފްސީލްތައް ހިއްސާކުރައްވާފައެވެ.
ރައީސް ޔާމީން ވަޑައިގަންނަވާ އިރު ރައީސް މުއިއްޒު އާއި އަބްދުއްރަހީމް ވެސް އެ ތަނުގައި ތިއްބަވަން ބޭނުންފުޅުވާނެ ކަމަށް ޤަބޫލުކުރައްވާތީ، ރައީސް އޮފީހުގައި އޮތް ބައްދަލުވުން ކުރުކޮށްލުމަށް ފަހު ރައީސް ޔާމީން މާލެ ގެންނަ ތަނަށް ވަޑައިގަންނަވަން ފެނިވަޑައިގަންނަވާ ކަމަށް އެ ދެ ބޭފުޅުންނަށް އެ ދުވަހު ދަންނަވާފައިވާނެ ކަމަށް ވެސް ރައީސް ޞާލިހު ވަނީ ވިދާޅުވެފައެވެ. އެ ދުވަހު ކަން ހިނާ ދިޔަ ގޮތުގެ އިތުރު ތަފްސީލްތައް ހިއްސާކުރައްވަމުން ރައީސް ޞާލިހު ވިދާޅުވީ ރައީސް ޔާމީން މިނިވަންކުރާ ވާހަކަ ބުނުމާއި އެކު ރައީސް މުއިއްޒު އާއި އަބްދުއްރަހީމާއި ދެ ބޭފުޅުންނަށް ވެސް ލިބިވަޑައިގަތީ ހައިރާންކަން ކަމަށެވެ. އެ ހިސާބުން އެ ދެބޭފުޅުންނަށް ރައީސް ޔާމީން މިނިވަން ކުރާކަން ނޭނގޭކަން ހާމަވިކަމަށް އެ މަނިކުފާނު ވިދާޅުވިއެވެ.
ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއަށް ބަދަލުކުރީ ރައީސް މުއިއްޒު ކަމަށް އެ މަނިކުފާނު ވިދާޅުވި ނަމަވެސް ކުރީގެ ރައީސް ޔާމީން ވެސް އެކަން ދޮގުކުރައްވާކަން ފާހަގަކޮށްލެވެއެވެ.
