ބާސާއަށް ޑްރެކްސްލާ ނުވިއްކާނެ

ޕީއެސްޖީއަށް ކުޅެމުން އަންނަ ޖަރުމަނުގެ މިޑްފީލްޑާ ޖޫލިއަން ޑްރެކްސްލާ ބާސެލޯނާއަށް ވިއްކާނުލާނެ ކަމަށް ރިޕޯރޓުތައް ބުނެފިއެވެ.

ބާސެލޯނާއިން އަންނަނީ މި ސީޒަނުގައި އެޓީމުގެ މެދުތެރެ ވަރުގަދަ ކުރުމަށް ކުޅުންތެރިން ހޯދަމުންނެވެ. އެހެން ނަމަވެސް މަޝްހޫރު ފުޓުބޯޅަ ވެބްސައިޓް ގޯލް ޑޮޓް ކޮމްއިން ރިޕޯޓުކޮށްފައިވާ ގޮތުގައި ޕީއެސްޖީން މި ސީޒަނުގައި ޑްރެކްސްލާ ދޫކޮށެއްނުލާނެއެވެ. އަދި މި ސީޒަނުގައި ގަވާއިދުން ފުރަތަމަ އެގާރައިގައި ކުޅުމުގެ ފުރުސަތު ޕީއެސްޖީއިން އޭނާއަށް ދޭނެއެވެ.

ޑްރެކްސްލާގެ އޭޖެންޓް ރޯޖާ ވިޓްމަން ވެސް ވަނީ އޭނާ މި ސީޒަނުގައި ޕީއެސްޖިގައި މަޑުކުރާނެ ކަމަށް ބުނެފައެވެ. އަދި އެއްވެސް ޓީމަކުން ހުށަހެޅުމެއް ލިބުނު ކަމުގައި ވިޔަސް އޭނާ އެ ހުށަހެޅުންތަކަށް ފުރަގަސް ދޭނެކަމަށް ބުނެފައި ވެއެވެ. މީގެ އިތުރުން މި ސީޒަނުގައި ޕީއެސްޖީގެ ކޯޗު އެމެރީގެ ރޭވުންތަކުގައި އޭނާ ހިމެނޭ ކަމަށް ވެސް ޑްރެކްސްލާގެ އޭޖެންޓު ބުނެފައި ވެއެވެ.

ބާސާއިން ޑްރެކްސްލާ ހޯދަން މަސައްކަތްކުރަމުން އަންނަ އިރު އެ ޓީމުން ދަނީ ލިވަޕޫލްގެ ފިލިޕޭ ކޫޓީނިއޯގެ ސޮއި ވެސް ލިބޭތޯ މަސައްކަތްކުރަމުންނެވެ. އަދި އެ ޓީމުން ވަނީ ބްރެޒިލްގެ މިޑްފީލްޑާ ޕައުލީނިއޯ ވެސް ގެނެސްފައެވެ.

ޕީއެސްޖީ ދޫކޮށް ޑްރެކްސްލާ ދިޔުމުގެ އަޑު ފެތުރިފައި ވަނީ ދުނިޔޭގެ ރިކޯޑު ޓްރާންސްފާ ފީއެއް ކަމަށްވާ 220 މިލިއަން ޔޫރޯއަށް، ބްރެޒިލްގެ ތަރި ނޭމާ އެ ޓީމާ ގުޅުނު ފަހުންނެވެ.

މިދިޔަ ކޮންފެޑެރޭޝަން ކަޕްގެ އެންމެ މޮޅު ކުޅުންތެރިޔާގެ މަގާމް ހޯދި ޑްރެކްސްލާ ވަނީ، ޕީއެސްޖީ އާއި ޖެނުއަރީ މަހު ގުޅުނު ފަހުން އެ ޓީމަށް ކުޅެދިން 24 މެޗުގައި 10 ގޯލު ކާމިޔާބުކޮށްދީފައެވެ.