ޑެމްބެލޭ ބާސާއަށް ސޮއިކޮށްފި

ޖަރުމަނުގެ ބޮރޫޝިއާ ޑޯޓްމަންޑަށް ކުޅެމުން ދިޔަ ފްރާންސްގެ ވިންގާ އުސްމާން ޑެމްބެލޭ ބާސެލޯނާއަށް ސޮއިކޮށްފިއެވެ.

ޑެމްބެލޭ ބާސާއަށް ސޮއިކޮށްފައި ވަނީ 105 މިލިއަން ޔޫރޯއަށެވެ. ބާސާއިން ވަނީ މި ފީގެ އިތުރުން އެކިއެކި ބޯނަސްގެ ގޮތުގައި 42 މިލިއަން ޔޫރޯ ޑޯޓްމަންޑަށް ހުށަހަޅާފައެވެ. ޑެމްބެލޭގެ ރިލީސް ފީއެއްގެ ގޮތުގައި ބާސާއިން ހަމަޖައްސާފައި ވަނީ 400 މިލިއަން ޔޫރޯ އެވެ.

މި ޓްރާންސްފާއާއި އެކު ޑެމްބެލޭ ވެގެން ދާނީ ދުނިޔޭގެ ދެވަނަ އަށް އެންމެ އަގު ބޮޑު ކުޅުންތެރިޔާ އަށެވެ. ދުނިޔޭގެ އެންމެ އަގުބޮޑު ކުޅުންތެރިޔަކީ މިހާރު ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާއެވެ.

ބާސާގެ ރަސްމީ ވެބްސައިޓުގައި ވާ ގޮތުން ޑެމްބެލޭ އާދިއްތަ ދުވަހުގެ ވަގުތެއްގައި ބާސެލޯނާގައި އޭނާގެ މެޑިކަލް ފުރިހަމަ ކުރާނެއެވެ. އަދި ބާސާގެ ކުޅުންތެރިޔެއްގެ ގޮތުގައި އޭނާ ދައްކާލާނީ ހޯމަ ދުވަހުއެވެ.

ޑެމްބެލޭއަކީ ދުނިޔޭގައި އެންމެ ފާހަގަ ކޮށްލެވޭ ޒުވާން ކުޅުންތެރިންގެ ތެރޭގައި ހިމެނޭ ކުޅުންތެރިޔެކެވެ. އޭނާއަކީ ދުވެލި ބާރު އަދި ދެފައިން އެއްވަރަކަށް ކުޅުމުގެ ހުނަރު ލިބިފައިވާ ކުޅުންތެރިޔެކެވެ. ޑޯޓްމަންޑަށް ކުޅުމުގެ ކުރިން ޑެމްބެލޭ ވަނީ ފްރާންސްގެ ރެނޭސްއަށްވެސް ކުޅެފައެވެ.

އޭނާގެ އުމުރުން 20 އަހަރުވީ އިރު އޭނާ ވަނީ ޖުމްލަ ހަތް ފަހަރަކު ފްރާންސްގެ ގައުމީ ޓީމަށް ކުޅެފައެވެ. އަދި މިދިޔަ ސީޒަނުގައި ޑޯޓްމަންޑަށް ކުޅުނު 49 މެޗުގައި އޭނާ ވަނީ 10 ލަނޑު ޖަހާފައެވެ.

މިއީ މި ޓްރާންސްފާ މާކެޓުގައި ބާސެލޯނާއިން ގެނައި ފަސް ވަނަ ކުޅުންތެރިޔާއެވެ. އެގޮތުން މީގެ ކުރިން ބާސާއިން ވަނީ ޑިފެންޑަރުން ކަމަށްވާ ނެލްސަން ސެމޭޑޯއާއި މާލޮން ސަންޓޯސްގެ އިތުރުން ޕައުލީނިއޯއާއި ޖެރާޑް ޑެއުލޮފޫ ގެނެސްފައެވެ.