ޕޯޗުގަލްގެ ބެންފީކާއަށް ކުލެމުން އައި ޑިފެންޑަރު ނެލްސަން ސެމޭޑޯ ބާސެލޯނާ އާއި ގުޅިއްޖެއެވެ.

ފަސް އަހަރު ދުވަހު އެއްބަސްވުމެއްގެ ދަށުން 30 މިލިއަން ޔޫރޯއަށް ސެމޭޑޯ ބާސާއަށް ބަދަލުވެފައި ވާއިރު އޭނާ ވަނީ ހޮނިހިރު ދުވަހު ބާސާގެ ފަރިއަކުރުންތަކުގައި ބައިވެރިވެފައެވެ. އުމުރުން 23 އަހަރުގެ ސެމޭޑޯ އަކީ ބާސާއަށް މިފަހަރުގެ ޓްރާންސްފާގައި ގެނައި 3 ވަނަ ކުޅުންތެރިޔާއެވެ.

ފާއިތުވި ސީޒާން ނިމުމާއިއެކު ބާސާއިން ވަނީ ޑިފެންޑަރެއް ހޯދުމުގެ މަސައްކަތް ފަސާފައެވެ. އެގޮތުން އެކުލަބުން އެންމެ ފުރަތަމަ ހޯދަން މަސައްކަތް ކޮށްފައިވަނީ އާސެނަލްއަށް ކުޅެމުން އަންނަ ހެކްޓާ ބެލެރިން އެވެ. ނަމަވެސް ބާސާއިން ދެފަހަރެއްގެ މަތުން ބިޑް ކުރުމުންވެސް އާސެނަލްއިން ވަނީ ހުޝައެޅުން ރިޖެކްޓް ކޮށްލާފައެވެ.

މިފަހަރުގެ ޓްރާސްފާގައި ބާސާއަށް މަދުވެގެން 3 ކުޅުންތެރިން ގުޅޭނެކަމަށް ފާއިތުވި ހަފްތާގެ ތެރޭގައި އެކުލަބުގެ ރައީސް މާރިއޯ ބާޓެމެއޫ ވިދާޅޫވެފައި ވާއިރު، އެކުލަބުގެ އާ ކޯޗް އާނެސްޓޯ ވަލްވޭޑޭ ކުލަބާއި ހަވާލުވިފަހުން އެކުލަބުން ވަނީ ޖެރާޑް ޑޫލެޕެއު އަދި މާލޮސް އެޓީމަށް ގެނެސްފައެވެ.

ރިޕޯޓްތަށް ބުނާގޮތުން އެކުލަބުން އަންނަނީ ސްޕެއިންގެ އެންޑާ ހެރޭރާ އަދި ބްރެޒިލްގެ މިޑްފިލްޑާ ޕައުލީނިއޯ އަށްވެސް ޝައުގުވެރިކަން ފާޅުކޮށްފައެވެ.