ބާސެލޯނާއާ އަލަށް ގުޅުނު ފްރާންސްގެ ފޯވާޑް އުސްމާން ޑެމްބެލޭއަކީ މިވަގުތު ބާސާއަށް އެންމެ މުހިންމު ކުޅުންތެރިޔާ ކަމަށް އެ ޓީމުގެ ކޯޗު ވަލްވާޑޭ ބުނެފިއެވެ.
ޑެމްބެލޭ ވަނީ ހުކުރު ދުވަހު ބާސާއަށް ސޮއިކޮށްފައެވެ. އޭނާ ބާސާއަށް ސޮއިކޮށްފައި ވަނީ 105 މިލިއަން ޔޫރޯ އަށެވެ. އޭނާ ބާސާއާ އެކު ސޮއި ކުރާނީ ފަސް އަހަރު ދުވަހުގެ އެއްބަސްވުމެއްގައެވެ.
ޑެމްބެލޭ ބާސާއަށް ސޮއި ކުރުމާ ގުޅޭ ގޮތުން ބާސާގެ ކޯޗު ވަލްވާޑޭ ބުނެފައި ވަނީ އޭނާއަކީ ބާސާގެ އެޓޭކަށް މިހާރު ދިމާވެފައިވާ މައްސަލަތަކަށް ހައްލު ހޯދައިދޭނެ ކުޅުންތެރިޔެއް ކަމަށާއި މިވަގުތު ބާސާއަށް އެންމެ މުހިންމު ކުޅުންތެރިޔަކީ އޭނާ ކަމަށެވެ.
ހަމަ އެހެންމެ ވަލްވާޑޭ ވަނީ ޑެމްބެލޭއަކީ އެޓޭކުގެ ކޮންމެ މަގާމަކަށް ވެސް ކުޅުމުގެ ހުނަރު ހުރި ކުޅުންތެރިޔެއްކަން ފާހަގަކޮށް އޭނާއާ އެކު މަސައްކަތް ފެށުމަށް ތައްޔާރަށް ހުރި ކަމަށް ބުނެފައެވެ. އަދި މިދިޔަ ސީޒަނުގައި އޭނާ ޑޯޓްމަންޑުގައި ދައްކާފައި ވަނީ މޮޅު ކުޅުމެއް ކަމަށާއި އޭނާގެ ފަރާތުން ބާސާގައި މިއަށްވުރެ މޮޅު ކުޅުމެއް ފެނިގެންދާނެ ކަމަށް އުއްމީދު ކުރާ ކަމަށެވެ.
ޑެމްބެލޭ ވަނީ ބާސާއަށް ބަދަލުވުމުގެ ގޮތުން ޑޯޓްމަންޑުގެ ޕްރެކްޓިސްތަކުގައި ބައިވެރި ނުވެ އޭނާގެ އަމިއްލަ ގައުމު ފްރާންސަށް ގޮސްފައެވެ. ބާސާއިން ޑެމްބެލޭ ގެނެސްފައި ވަނީ އެ ޓީމުގެ އެންމެ މުހިންމު އެއް ކުޅުންތެރިޔާ ކަމަށްވާ ނޭމާ ނެތްތަން ފޫ ބެއްދުމަށެވެ. ނޭމާވަނީ ދުނިޔޭގެ ރިކޯޑު ފީއަކަށް ފްރާންސްގެ ޕީއެސްޖީއަށް ބަދަލުވެފައެވެ.
ޑެމްބެލޭގެ އުމުރުން 20 އަހަރުވީ އިރު އޭނާ ވަނީ ޖުމްލަ ހަތް ފަހަރަކު ފްރާންސްގެ ގައުމީ ޓީމަށް ކުޅެފައެވެ. އަދި މިދިޔަ ސީޒަނުގައި ޑޯޓްމަންޑަށް ކުޅުނު 49 މެޗުގައި އޭނާ ވަނީ 10 ލަނޑު ޖަހާފައެވެ.
