އެމްއެމްޕީއާރްސީގެ ހިޔާނާތާ ގުޅިގެން ކުރީގެ ރައީސް އަބްދުﷲ ޔާމީން ހައްދަވަނީ އިތުރުފުޅު: ޔައުގޫބް
16 ނޮވެމްބަރު 2024 | ހޮނިހިރު 10:16ހިޔާނާތް ހުއްޓުވުމަށް ފިޔަަވަޅު އެޅުއްވުމުގެ ބަދަލުގައި، އޮޑިޓަރ ޖެނަރަލް މަގާމުން ވަކިކުރެއްވި
ކުރީގެ ރައީސް އަބްދުﷲ ޔާމީން
އެމްއެމްޕީއާރްސީގެ ހިޔާނާތާއި ގުޅިގެން ކުރީގެ ރައީސް އަބްދުﷲ ޔާމީން ހައްދަވަނީ އިތުރުފުޅު ކަމަށާއި، މިސަރުކާރާއި ފެޔަށް ޖެހިވަޑައިގެންނެވީ އެމަނިކުފާނު ބޭނުންފުޅުވާ ގޮތަށް ސިޔާސީ މަގާމުތައް އަތުރާނުލެވުމުން ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޔައުގޫބު ވިދާޅުވީ އެމްއެމްޕީއާރްސީގެ ހިޔާނާތާއި ގުޅޭގޮތުން ޔާމީން ވަރަށް ގިނަ ވާހަކަތައް ދައްކަވާ ކަމަށާއި، އެހިޔާނާތް ހިންގާފައިވާއިރު، އެކަން އެނގިވަޑައިނުގަންނަވާ ކަމަށް އެމަނިކުފާނު ތަކުރާރުކޮށް ވިދާޅުވަމުން ގެންދަވާ ކަމަށެވެ. ނަމަވެސް އެއީ ޔާމީން ހައްދަވާ އިތުރުފުޅެއް ކަމަށާއި، އެ ހިޔާނާތް ހިނގަމުންދިޔައިރު، އެކަން އޭރުގެ އޮޑިޓަރ ޖެނަރަލް ޔާމީންގެ ސަމާލުކަމަށް ގެންނެވި ކަމަށެވެ. ނަމަވެސް ނަތީޖާއެއް ގޮތުން ހިޔާނާތް ހުއްޓުވުމަށް ފިޔަަވަޅު އެޅުއްވުމުގެ ބަދަލުގައި، އޮޑިޓަރ ޖެނަރަލް ނިޔާޒު އިބްރާހިމް މަގާމުން ވަކިކުރެއްވީ ކަމަށް ޔައުގޫބް ވިދާޅުވިއެވެ.
ޔައުގޫބް ވިދާޅުވީ އެ ހިޔާނާތް ހިންގާފައިވަނީ ވަރަށް ބޮޑަށް ޕްލޭން ކުރެވިގެން ކަމަށާއި، މިއަދު އެކަން އެނގިވަޑައިނުގަންނަވާ ކަމަށް ޔާމީން ވިދާޅުވި ނަމަވެސް އެކަން ގަބޫލުކުރާނެ ރައްޔިތެއް ނުހުންނާނެ ކަމަށެވެ.
މިސަރުކާރަށް އިޝާރާތް ކުރައްވާ ޔައުގޫބް ވިދާޅުވީ އެމްއެމްޕީއާރްސީ ހިޔާނާތުގައި ހިމެނޭ ގިނަ ބޭފުޅުން މިސަރުކާރުގައި ހިމެނޭ ކަމަށެވެ. އަދި ވިދާޅުވީ މިސަރުކާރާއި، ޔާމީންގެ ސަރުކާރަކީ އެއް ޕާޓީއެއް ކަމަށެވެ.
މީގެ އިތުރުން ޔައުގޫބް ވިދާޅުވީ މިސަރުކާރާއި ޔާމީން ފެޔަށް ޖެހިވަޑައިގެންނެވީ ސަރުކާރު ގޯސްވެގެން ނޫން ކަމަށާއި، އެމަނިކުފާނު ބޭނުންފުޅުވާ ގޮތަށް ސަރުކާރުގެ ސިޔާސީ މަގާމުތައް އަތުރާލައި، ފުލް ކޮންޓްރޯލް ނުލިބުމުން ކަމަށެވެ.
ރާއްޖޭގެ ހާލަތަށް އިޝާރާތް ކުރައްވާ ޔައުގޫބު ވިދާޅުވީ މިއަދު މިސަރުކާރުގެ ސަބަބުން ގައުމު އިނދަޖެހި، ރައްޔިތުން ހަލާކުވެގެންދާއިރު، އެކަމުގެ ފުރިހަމަ ޒިންމާ ނަންގަވަންޖެހޭ އެއްބޭފުޅަކީ ޔާމީން ކަމަށެވެ.
