ބާސެލޯނާގައި ދިން ހަމަލާއަށް ފަހު ކެމްބްރިލްސްގައި ހަމަލާ ދޭން އުޅެފި
18 އޯގަސްޓު 2017 | ހުކުރު 06:15އޮފިޝަލުން ބުނެފައި ވަނީ ބާސެލޯނާގައި ދިން ހަމަލާ އާއި ކެމްބްރިލްސްގައި ދޭން އުޅުނު ހަމަލާއާ ގުޅުމެއް ވާކަމަށް
ބާސެލޯނާގައި ދިން ހަމަލާއަށް ފަހު އޮފިޝަލުން ހަރަކާތްތެރި ވަނީ
ސްޕެއިންގެ ޓައުނެއް ކަމަށްވާ ކެމްބްރިލްސްގައި ވޭނެއް ބޭނުންކޮށްގެން ދޭން އުޅުނު ހަމަލާއެއް ހުއްޓުވުމަށްޓަކައި ސްޕެއިންގެ ފުލުހުން ފަސް މީހަކު މަރާލާފައިވާ ކަމަށް، ފުލުހުން ބުނެފިއެވެ.
ފުލުހުން ބުނެފައި ވަނީ ކެމްބްރިލްސްގައި ވޭނެއް ގޮއްވާލައިގެން ހަމަލާ ދޭން އުޅުނު މީހުން ތިބީ އެކްސްޕްލޮސިވް ބެލްޓް ވެސް އަޅައިގެން ކަމަށެވެ. އަދި މިހާދިސާގައި ހަ މީހަކަށް ހާނިއްކަވި ކަމަށް ރިޕޯޓުތައް ބުނެއެވެ.
ކެމްބްރިލްސްގައި ވޭނެއް ބޭނުންކޮށްގެން ހަމަލާ ދޭން އުޅުނު އިރު ބުރާސްފަތި ދުވަހު ސްޕެއިންގެ މަޝްހޫރު ސިޓީއެއް ކަމަށްވާ ބާސެލޯނާގެ ލަސް ރަމްބްލަސް ސަރަހައްދުގައި ވޭނެއް ބާރަށް ދުއްވާފައި ގޮސް ހިނގާފައި ދިޔަ މީހުންގެ ގައިގައި ވަނީ ޖައްސާފައެވެ. މި ހާދިސާ ގައި 13މީހަކު މަރުވިއިރު އެތައް ބަޔަކު ޒަޚަމްވިއެވެ. ވޭން ދުއްވަން އިން ޑްރައިވަރު ވަނީ ފިލައިފައެވެ.
ސްޕެއިންގެ ބޮޑު ވަޒީރު މާރިއާނޯ ރަޖޯއި ވިދާޅުވެފައި ވަނީ ބާސެލޯނާގައި ދިން ހަމަލާ އަކީ "ޖިހާދީންގެ ހަަަމަލާއެއް" ކަމަށެވެ.
ބާސެލޯނާގައި ދިން ހަމަލާއާ ގުޅިގެން ދެ މީހަކު ހައްޔަރުކޮށްފައިވާ އިރު އިސްލާމިކް ސްޓޭޓް (އައިއެސް) އިން ވަނީ އެ ހަމަލާގެ ޒިންމާ ނަގާ ކަމަށް ބުނެފައެވެ.
