މީޑިއާ ކޮމިޝަންގެ ބިލަކީ ހުރިހާ އުސޫލުތައް މުގުރިގެން ދާނޭ ފަދަ ނޫސްވެރިކަމާއި މީޑިއާއަށް އޮތް ނުރައްކަލެއް: އެމްޖޭއޭ

ރައްޔިތުންގެ މަޖިލީހަށް ހުށަހަޅާފައިވާ މީޑިއާ އެންޑް ބްރޯޑްކާސްޓިން ކޮމިޝަންގެ ބިލަކީ މިނިވަން ނޫސްވެރިކަމަށް އޮތް ނުރައްކަލެއް ކަމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ބުނެފިއެވެ.

މަޖިލީހަށް އަމިއްލަ ޓިކެޓްގައި އިންތިޚާބުވި، ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރު ހުށަހެޅުއްވި މި ބިލުން މީޑިއާތަކާއި ވަކިވަކި ނޫސްވެރިން ޖޫރިމަނާކޮށް، ލައިސަންސް ބާތިލް ކުރުމުގެ ބާރު ކޮމިޝަނަށް ލިބިދޭކަމަށް އެމްޖޭއޭއިން ފާހަގަކޮށްފައިވެއެވެ.

އެމްޖޭއޭއިން ނެރުނު ބަޔާނުގައި ބުނެފައިވަނީ މި ބިލުގެ ސަބަބުން ނޫސްވެރިކަމުގެ މިނިވަންކަމުގެ ހައްގު ވަރަށް ބޮޑަށް ހަނިވެގެން ދާނެ ކަމަށެވެ. އަދި މީޑިއާ ރެގިއުލޭޓް ކުރުމުގެ އިހްތިޔާރު އޮންނަން ވާނީ ސެލްފް ރެގިއުލޭޓްރީ ނިޒާމަކަށް ބުރަވާ ގޮތަށް ކަމަށް އެ ޖަމިއްޔާއިން އަބަދުވެސް ގަބޫލުކުރާކަމަށް ބުނެފައިވެއެވެ.

"މިނިވަން މެމްބަރެއްގެ ގޮތުގައި ހުންނެވި ތުޅާދޫ ދާއިރާގެ މެމްބަރު އަބްދުލް ހަންނާން އަބޫބަކުރު ހުށަހެޅުއްވި މި ބިލަކީ މި ހުރިހާ އުސޫލުތައް މުގުރިގެންދާނޭ ފަދަ މިނިވަން ނޫސްވެރިކަމާއި މީޑިއާއަށް އޮތް ނުރައްކަލެކެވެ،" އެމްޖޭއޭ އިން ބުންޏެވެ.

އެމްޖޭއޭއިން ފާހަގަކުރި ގޮތުގައި ބިލް ހުށަހެޅި މެމްބަރާއި ސަރުކާރުގެ ފަރާތުން ވެސް އެ ބިލް އެކުލަވާލުމުގައި އެމްޖޭއޭ އަދި މީޑިއާގެ އިސް ފަރާތްތަކުގެ ލަފާ އެއްވެސް ވަރަކަށް ހޯދާފައިނުވެއެވެ. އަދި މި ބިލްގެ ސަބަބުން ނޫސްވެރިންގެ މަސައްކަތަށް ބޮޑެތި ހުރަސްތައް އެޅޭނެކަމަށާއި، ސެލްފް ރެގިއުލޭޓް ކުރުމަށް މިހާރު އޮތް ބާރު ގެއްލިގެން ގޮސް ސަރުކާރުގެ ނުފޫޒާއި ބާރު މީޑިއާގެ ތެރެއަށް ވަރަށް ބޮޑަށް ވަދެ، މީޑިއާގެ މިނިވަންކަން އެތައް އަހަރެއް ފަހަތަށް ދާނެ ކަމަށް އެމްޖޭއޭއިން ވަނީ ބުނެފައެވެ.

އެމްޖޭއޭއިން ބުނީ މީޑިއާތައް ރެގިއުލޭޓް ކުރަން އުފައްދާ އާ ކޮމިޝަންގެ ތިންބައިކުޅަ ދެ ބައި އޮންނަން ވާނީ މީޑިއާތަކުގެ އެޑިޓަރުންނާއި ސީނިއާ އަދި ޖޫނިއާ ނޫސްވެރިންނާއި މީޑިއާތައް އަދި މަދަނީ ޖަމިއްޔާތައް ތަމްސީލުވާ ގޮތެއްގެ މަތިން ކަމަށެވެ.

ނޫސްވެރިން ޖޫރިމަނާ ކުރެވޭ ގޮތަށް ރައްޔިތުންގެ މަޖިލީހަށް ބިލެއް ހުށަހަޅައިފައި ވަނިކޮށް ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މީޑިއާ އަށް ނުފޫޒު ފޯރުވުމަކީ އެމަނިކުފާނު ކުރައްވާނެ ކަމެއް ނޫން ކަމަށާއި އިސްލާމްދީނާއި ރާއްޖޭގެ ގާނޫނު އަސާސީއާ ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަހައްދުގައި ކޮންމެ ދިވެއްސަކަށް ވެސް އެމީހެއްގެ އަމިއްލަ މިނިވަންކަމާއެކު އެމީހަކު ބޭނުންކަމެއްކޮށް އުޅުމުގެ ހައްގު އޮންނާނެ ކަމަށެވެ.

ރައީސް މިހެން ވިދާޅުވިއިރު، އަލަށް އުފައްދާ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ލިބެނީ ރައީސުލްޖުމްހޫރިއްޔާ އަށެވެ. އަދި ކޮމިޝަންގައި ހިމެނޭ، 7 މެމްބަރުންގެ ތެރެއިން 4 މެމްބަރުން އައްޔަން ކުރުމުގެ ބާރުވެސް އޮންނަނީ ރައީސުލްޖުމްހޫރިއްޔާ އަށެވެ.

މި ބިލް ފާސްކޮށްފިނަމަ މޯލްޑިވްސް މީޑިއާ ކައުންސިލާއި، މޯލްޑިވްސް ބްރޯޑްކާސްޓިން ކޮމިޝަން އުވޭނެއެވެ.