ހެލިކޮޕްޓަރާ ޑޯނިއާގެ ހަގީގަތް: ފުރަތަމަ ހެލިކަޕްޓަރުގެ މަޝްވަރާކުރީ މައުމޫން ސަރުކާރުގައި، ދެވަނަ ހެލިކޮޕްޓަރު ޔާމީންގެ އެދިވަޑައިގަތުމަށް ގެނައީ އެމަނިކުފާނުގެ ސަރުކާރުގައި

ޑޯނިއާ އާއި ހެލިކޮޕްޓަރތަކުގެ ތެރެެއިން ދެވަނަ ހެލިކަޕްޓަރު ގެނެސްފައި ވަނީ ކުރީގެ ރައީސް އަބްދުﷲ ޔާމީންގެ އެދިވަޑައިގަތުމަށް އެ މަނިކުފާނުގެ ސަރުކާރުގައި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ޝާހިދު އެފަދައިން ވިދާޅުވީ އެމްޑީޕީން ބެއްވި "ފުދިއްޖެ ފުނޑިއްޖެ" ޖަލްސާގައި ޑޯނިއާ ހެލިކޮޕްޓަރތަކާއި ގުޅޭގޮތުން ވާހަކަދައްކަވަމުންނެވެ.

ޝާހިދު ވަނީ ނިމިދިޔަ ސަރުކާރުގައި އޭރުގެ އިިދިކޮޅު ފަރާތްތަކުން އިންޑިއާ އައުޓްގެ ނަމުގައި ނުކުމެ މުޒާހަރާކުރިކަން ފާހަގަކުރައްވާފައެވެ. އެ ހަރަކާތަށް ނުކުންނެވީ ރާއްޖެ އަށް އިންޑިއާ އިން ފޯރުކޮށްދިން ދެ ހެލިކޮޕްޓަރާއި ޑޯނިޔާ އެއްގެ މައްސަލައިގައި ކަމަށް ޝާހިދު ވަނީ ވިދާޅުވެފައެވެ. ޝާހިދު ވިދާޅުވި ގޮތުގައި އޭގެ ތެރެއިން ފުރަތަމަ ހެލިކޮޕްޓަރު ގެނައުމުގެ މަޝްވަރާކުރީ ކުރީގެ ރައީސް މައުމޫން އަބްދުލް ޤައްޔޫމުގެ ސަރުކާރުގައެވެ. 2008 ވަނަ އަހަރު އިންޑިއާ އަށް ކުރެއްވި ދަތުރުފުޅެއްގެ ތެރެއިން އެމްއެންޑީއެފްގައި އެއަރ ވިންގެއް އުފެއްދުމުގެ މަސައްކަތް ކުރުމުގެ މަޝްވަރާތައް ކުރި ކަމަށާއި، ރާއްޖެ އަށް ހެލިކޮޕްޓަރެއް ގެނައުމުގެ ވާހަކަ ދެކެވުނީ އެ މަޝްވަރާގެ ތެރެއިން ކަމަށް ޝާހިދު ވިދާޅުވިއެވެ. އެހެންނަމަވެސް 2008ގެ އިންތިޚާބު ކާމިޔާބު ކުރެއްވީ ރައީސް މުހައްމަދު ނަޝީދު ކަމަށާއި ކުރީގެ ރައީސް މައުމޫން އެދިވަޑައިގަތް ހެލިކޮޕްޓަރ ލިބުނީ ރައީސް ނަޝީދުގެ ވެރިކަމުގެ ތެރޭގައި ކަމަށް ޝާހިދު ވަނީ ވިދާޅުވެފައެވެ.

އޭގެ ފަހުން ކުރީގެ ރައީސް އަބްދުﷲ ޔާމީންގެ ސަރުކާރުގައި 2015 ވަނަ އަހަރު ބޭއްވި ޑިފެންސް ޓޯކްސްގެ ތެރެއިން އެއް ހެލިކޮޕްޓަރުން ނުފުދޭ ކަމަށް ފާހަގަކުރައްވާ އިތުރު ހެލިކޮޕްޓަރެއް ގެނަމަށް ޔާމީންގެ ސަރުކާރުން އެދުނު ކަމަށް ޝާހިދު ވިދާޅުވިއެވެ.

އެ ހެލިކޮޕްޓަރ ލިބުނީ 2016 ވަނަ އަހަރު ކަމަށް ޝާހިދު ވިދާޅުވިއެވެ. އެހެން ކަމުން އެއީ ވެސް އެމްޑީޕީ ސަރުކާރުން އެދިގެން ގެނައި ހެލިކޮޕްޓަރެއް ނޫން ކަމަށް ޝާހިދު ވިދާޅުވިއެވެ. ޝާހިދު ވަނީ އެ ހެލިކޮޕްޓަރ ބާއްވާފައި ވަނީ ހަނިމާދޫގައި ކަމަށް ވެސް ވިދާޅުވެފައެވެ. މީގެ އިތުރުން 2016 ވަނަ އަހަރު ބޭއްވި ޑިފެންސް ޓޯކްސްގައި ޑޯނިޔާ އަކަށް އެދިވަޑައިގަތީ ވެސް އޭރުގެ ރައީސް ޔާމީންގެ ސަރުކާރުން ކަމަށް ޝާހދިު ވިދާޅުވިއެވެ. އެގޮތުގެ މަތިން އެދިވަޑައިގަތް ހެލިކޮޕްޓަރ ގެނެސްފައި ވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ކަމަށް ޝާހިދު ވަނީ ވިދާޅުވެފައެވެ.

އެކަމުން ރާއްޖޭގެ ސަރުކާރުތައް ބަދަލުވި ނަމަވެސް ދިފާއީ ބޭނުންތަކަށް އެދެމުންދިޔަ ކަންކަން އިންޑިއާއިން ކޮށްދިންކަން އެނގޭ ކަމަށް ޝާހިދު ވިދާޅުވިއެވެ. އަދި މިހާރު އިންޑިއާ ސިފައިން ބާލާފައިވާ ކަަމަށް ބުނެ މި ސަރުކާރުން އޮޅުވާލަން ވާހަކަދައްކާ ކަމަށް ޝާހިދު ވިދާޅުވިއެވެ. ޝާހިދު މިފަދައިން ވިދާޅުވި އިރު، ރައީސް ސާލިހުގެ ވެރިކަމުގެ ދުވަސްވަރު ޑޯނިއާ ދުއްވަން އިންޑިއާ ސިފައިން ރާއްޖޭގައި ތިބޭ ކަމަށް ބުނެ އިންޑިއާ އައުޓްގެ ނަމުގައި ޕީޕީއެމް ޕީއެންސީން ވަނީ މުޒާހަރާކޮށްފައެވެ. މީގެ އިތުރުން ދާދިފަހުން ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ކުރީގެ ރައީސް ޔާމީން ވަނީ އެމަނިކުފާނުގެ ވެރިކަމުގައި ހެލިކޮޕްޓަރތައް ގެނެސްފައި ނުވާ ކަމަށާއި އެ އެއްޗެހި އައީ އޭގެ މާ ކުރިން ކަމަށް ވިދާޅުވެފައެވެ.