އަނިޔާވެރި ހުދުމުހުތާރު ޑިކްޓޭޓަރަކަށް ވެރިކަން ދީގެން ދިވެހިރައްޔިތުން ނުތިބޭނެ - ޞާލިހު
ހުދުމުހުތާރު ވެރިކަމުގައި ހެޔޮފުޅުކަމުން ކަންކޮށްދޭކަމަށް ދައްކާނެ
'ފުދިއްޖެ-ފުނޑިއްޖެ' އެމްޑީޕީ ޖަލްސާގައި ރައިސް ޞާލިހު ވާހަކަފުޅުދައްކަވަނީ
އަނިޔާވެރި ހުދުމުހުތާރު ޑިކްޓޭޓަރަކަށް ވެރިކަން ދީގެން ދިވެހިރައްޔިތުން ނުތިބޭނެ ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
'ފުދިއްޖެ، ފުނޑިއްޖެ' ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހިމް މުހައްމަދު ޞާލިހް އަދި އެމްޑީޕީގެ އިސް އެޑްވައިޒަރު ވިދާޅުވީ ޖުމްހޫރީ ވެރިކަމަކީ ކޮބައިކަން ދިވެހިރައްޔިތުންނަށް ވަރަށް ސާފުކޮށް އެނގޭނެ ކަމަށެވެ. އެއީ ރައްޔިތުން އިންތިހާބުކުރާ ވެރިއެއްހުރެ ރައްޔިތުންގެ އަތްމަތީގައި ބާރު އޮންނަ ވެރިކަމެއް ކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ މިއަދު ފެންނަމުންދަނީ ޖުމްހޫރީ ވެރިކަން އަނެއްކާވެސް ބިރުވެރި ހުދުމުހުތާރު ވެރިކަމަށް ބަދަލުވަމުންދާތަން ކަމަށެވެ. ދިވެހިން ވިރާސީ ވެރިކަމަށްދާން ބޭނުން ނުވާނެ ކަމަށާއި، އަނިޔާވެރި ހުދުމުހުތާރު ޑިކްޓޭޓަރަކަށް ވެރިކަން ދީގެން ނުތިބޭނެ ކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ މަޖިލީހަށް ބަޖެޓް ހުށަހެޅުމުގައި ގާނޫނުގައިވާ އުސޫލެއް ހަމައެއް ހިފެހެއްޓުމެއް ނެތް ކަމަށެވެ. ހަމައެކަނި ލިބޭ އާމްދަނީއާއި ހަރަދު ހުށަހަޅާފައިވާ ކަމަށާއި، މިއީ މިހާތަނަށް ރާއްޖޭގެ ތާރީހުގައި ތަފްސީލެއް ނެތި ބަޖެޓެއް ހުށަހެޅި ފުރަތަމަ ފަހަރުކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ ހުރިހާ އެއްޗެއް ހާމަކުރާނެކަމަށް ބުނެ ވެރިކަމަށް އައިސް ކަންކުރާގޮތް ފެންނަމުންދާ ކަމަށެވެ.
ރައީސް ޞާލިހު ވިދާޅުވީ ބާރުތައް ޖަމާކުރުމުގެ އިތުރަށް ގާނޫނުގައި ކަނޑައެޅިގެން ދޭން އޮތް ބަޖެޓް ނުދީ ހިފަހައްޓާފައިވާ ކަމަށެވެ. އާމްދަނީގެ 5 އިންސައްތަ ކައުންސިލްތަކަށް ކަނޑައަޅަންޖެހޭ ކަމަށް ބުނެފައިވީނަމަވެސް 1 ބިލިއަން މަދުން ދޭން ނިންމާފައިވާކަމަށެވެ. އަދި އެކަން ކޮށްދެއްވާނެކަމަށް ވިދާޅުވާއިރު، އެއީ ވިރާސީ ވެރިކަމާއި، ހުދުމުހުތާރު ވެރިކަމުގައި ހެޔޮފުޅުކަމުން ކަންކޮށްދޭކަމަށް ދެއްކުން ކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ ޖުމްހޫރީ ވެރިކަމަކަށް ބަދަލުވީ ގާނޫނުގެ ތެރެއިން ކަންކަން ކުރުމަށް ކަމަށާއި، މިހާރު އެކަންކުރާގޮތް ބަލަން ތިބެގެން ވާކަށް ނެތްކަމަށެވެ.
