މުއިއްޒު ބޫޓާންގެ ބޮޑުވަޒީރާ ބައްދަލުކުރައްވައިފި
12 ނޮވެމްބަރު 2024 | އަންގާރަ 09:07އިންވެސްޓްމަންޓްގެ ދާއިރާގައި އިތުރަށް އެއްބާރުލުން ދިނުމުގެ ފުރުޞަތުތަކާއި ދެ ޤައުމުގެ ގުޅުން އިތުރަށް ވަރުގަދަކުރުމާ ބެހޭގޮތުން މަޝްވަރާކުރެއްވި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބޫޓާންގެ ބޮޑުވަޒީރު ޝެރިންގ ތޮބްގޭއާ ބައްދަލުކުރެއްވުމުގެ ތެރެއިން
އދގެ ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫ.އެން.އެފް.ސީ.ސީ.ސީ)ގެ ދަށުން ބާއްވާ 29 ވަނަ ކޮންފަރަންސް އޮފް ދަ ޕާޓީޒް (ކޮޕް29)ގެ ސައިޑްލައިން އިވެންޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބޫޓާންގެ ބޮޑުވަޒީރު ޝެރިންގ ތޮބްގޭއާ ބައްދަލުކުރައްވައިފިއެވެ.
މި ބައްދަލުވުމުގައި ފަންނީ މަޢުލޫމާތާއި، ކާމިޔާބު ތަޖުރިބާތައް ހިއްސާކުރުމަށާއި، މޫސުމީ ވިލުންތެރިކަން އިތުރުކުރުމުގައި ދެ ޤައުމުގެ އެއްބާރުލުން އިތުރުކުރުމަށް އެއްބަސްވުމާއި، އިންވެސްޓްމަންޓްގެ ދާއިރާގައި އިތުރަށް އެއްބާރުލުން ދިނުމުގެ ފުރުޞަތުތަކާއި ދެ ޤައުމުގެ ގުޅުން އިތުރަށް ވަރުގަދަކުރުމާ ބެހޭގޮތުން މަޝްވަރާކުރައްވާފައިވާ ކަަމަށް ރައީސް އޮފީހުން ބުނެފައިވެއެވެ.
އެގޮތުން، ރައީސް ޑރ މުއިއްޒު ވަނީ ދިވެހިރާއްޖެއާއި ބޫޓާނާ ދެމެދު ހުރި ޖިއޮގްރަފީގެ ތަފާތުތަކާ އެކުވެސް، ދެ ޤައުމުގެ ދެމެހެއްޓެނިވި ގުޅުމަށް އަލިއަޅުއްވާލައްވާފައެވެ. އަދި މޫސުމަށް އަންނަ ބަދަލުތަކުގެ ސަބަބުން ދެ ޤައުމަށްވެސް ކުރިމަތިވާ އާންމު ނުރައްކާތަކުގެ ތެރޭގައި، ގްލޭޝިއަލް މެލްޓިން އާއި ކަނޑުގެ ލޮނުގަނޑު އުފުލުން ފަދަ ހިރާސްތައް ހިމެނޭކަން ފާހަގަކުރެއްވާފައެވެ. ރައީސް ޑރ މުއިއްޒުވަނީ ދުނިޔޭގެ ފުރަތަމަ ކާބަން-ނެގަޓިވް ޤައުމަކީ ބޫޓާންކަމުގައިވާތީ އެކަން ފާހަގަކުރައްވައި ބޮޑުވަޒީރަށް ތަހުނިޔާ ދަންނަވާފައެވެ. މީގެއިތުރުން މޫސުމަށް އަންނަ ބަދަލުތަކުގެ އަސަރުތަކާ ކުރިމަތިލުމަށް ބޫޓާނުން އައު ގޮތްތައް ގެންގުޅޭކަންވެސް ރައީސް ޑރ މުއިއްޒު މި ބައްދަލުވުމުގައި ފާހަގަކުރެއްވިއެވެ.
ހަމައެއާއެކު، ބޮޑުވަޒީރު ތޮބްގޭ ވެސް ވަނީ ރާއްޖެއާ ގުޅިގެން މަސައްކަތްކުރުމާމެދު ޝައުޤުވެރިކަން ފާޅުކުރައްވާފައެވެ. ތޮބްގޭ ވަނީ ބޫޓާނުގެ ކާމިޔާބު މަޝްރޫޢުތަކުގެ މަޢުލޫމާތު ހިއްސާކުރައްވައި، މޫސުމަށް އަންނަ ބަދަލުތަކުގެ އަސަރުތަކާމެދު ޤައުމުތަކުން އިތުރު ޒިންމާ ނެގުމުގެ މުހިންމުކަން ފާހަގަކުރައްވާފައެވެ. އޭނާ ވަނީ މޫސުމީ މައްސަލަތަކުގައި ބޮޑެތި، މުއްސަނދި ޤައުމުތަކުން އަޅާ ފިޔަވަޅުތައް ހަރުދަނާކުރުމަށްޓަކައި، މޫސުމީ ބަދަލުތަކުގެ ނުރައްކަލަށް ހުށަހެޅިފައިވާ ޤައުމުތަކުން އެކުގައި މަސައްކަތްކުރުމުގެ މުހިންމުކަމަށް ވެސް އަލިއަޅުއްވާލައްވާފައެވެ.
ނޮވެމްބަރު 11ން 22ށް ބޭއްވުމަށް ހަމަޖެހިފައިވާ ކޮޕް29 ސަމިޓުގައި ބައިވެރިވެވަޑައިގަތުމަށް ރައީސް މުއިއްޒު އަޒަރްބައިޖާނަށް ވަޑައިގެންނެވީ އަންގާރަ ދުވަހުއެވެ.
