މިސް ޔުނިވާސްގައި ބޮޑީ އެކްސްޕޯސްވާތީ ދީނާ ޚިލާފް، ބޮޑީ ބިލްޑިންގ ބިކިނީގައި ރާއްޖޭގައި ބޭއްވުން މުއިއްޒު ސަރުކާރަށް އޯކޭ

ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ޤައުމަށް ލިބޭނެ ޙަޤީޤީ ރީތިނަމެއް، އުފަލެއް، ކާމިޔާބީއެއް ނެތް!  

މިއީ ރައީސް ޑރ މުޙައްމަދު މުޢިއްޒު 2024 ވަނަ އަހަރުގެ އޮކްޓޯބަރު މަހުގެ 30 ވަނަ ދުވަހުގައި އެކްސްގައި ކުރައްވާފައިވާ ޕޯސްޓެއްގެ އެއްބައެވެ. މި ޕޯސްޓްގެ އަނެއް ބައިގައި ހިމަނުއްވާފައިވަނީ ކީރިތި ޤުރުއާނުގެ މޫރިތި އާޔަތަކާއި އެ އަޔާތުގެ މާނައެވެ. ޕޯސްޓުގައި ހިމަނުއްވާފައިވާ އާޔަތުގެ މާނާގައި އޮންނަނީ:

"އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާޠިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާޠިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ." މިހެންނެވެ.

މިއީ ނޮވެމްބަރު މަހުގެ 14 ގައި މެކްސިކޯގައި އޮންނަ މިސް ޔުނިވާސް 2024 ގައި ދިވެހި އަންހެން ކުއްޖަކު ރާއްޖޭގެ ނަމުގައި ބައިވެރިވާކަން އިއުލާން ކުރުމާއި ގުޅިގެން އަމާޒުވި ފާޑުކިޔުންތަކާއެކު އެކަމާ ސަރުކާރުން ދެކޮޅު ހަދާ މިންވަރު އަންގައިދީ، އެކަމާ ސަރުކާރާ އެއްވެސް ގުޅުމެއް ނެތް ކަމަށް ހާމަކުރެއްވުމަށްފަހު، ރައީސް ކުރެއްވި ޕޯސްޓެއް ކަމަށް ފެނެއެވެ. އެހެން ނުވާންވީ ސަބަބެއްވެސް ނެތްތާއެވެ. ރައީސް މުއިއްޒު ވެރިކަމަށް ވަޑައިގަތުމަށް ކުރެއްވި ކެމްޕެއިންގައި އާއި ވެރިކަމަށް ވަޑައިގަތުމަށްފަހު ދައްކަވަމުން ގެންދެވި ވާހަކަފުޅުތަކުގައި އެމަނިކުފާނު އަމިއްލަފުޅަށާއި އަދި ސަރުކާރުންނާއި އެމަނިކުފާނު ނިސްބަތްވެވަޑައިގަންނަވާ ޕާޓީންނާއި އެ މަނިކުފާނުގެ ސަޕޯޓަރުންވެސް އެމަނިކުފާނު ޕްރޮމޯޓް ކުރަމުން ގޮސްފައިވަނީ މާ ދީނަށް ލޯބިކުރައްވާ ބޭފުޅެއްގެ ގޮތުގައެވެ. ދީން ދެކެ އެހެން މީހުންނަށް ވުރެ ބޮޑަށް ލޯބިފުޅުވާ ދީނީ ކަންކަމަށް މާބޮޑަށް ސަމާލުކަން ދެއްވާ ބޮޑު ދީންވެރިއެއްގެ ގޮތުގައެވެ. ސޯޝަލް މީޑިއާގައި އާއްމު ކުރަމުން ދިއައީ ފަތިސް ނަމާދަށް ވަޑައިގަންނަވާ ތަނެވެ. ދެ ހަރަމްފުޅުގައި ނަމާދު ކުރައްވާ ތަނެވެ. ދައްކަވަމުން ގެންދެވީ ދީނީ ވާހަކަތަކެވެ. ހައްދަވާ އިތުރުފުޅުތަކާއި ބަސްފުޅާއި، އަމަލުފުޅާއި ދިމާނުވުމާއި، ހިންގަވާ ކަމަށް ތުހުމަތު ކުރެވޭ ކަރަޕްޝަންގެ އަމަލުތައްވެސް އޮންނަނީ ދީނީ ތާކިހަލުގެ ހިޔަނީގައި ފޮރުވިފައެވެ. ކޮންމެ އަކަސް މަންޒަރު ދައްކަމުން ދިޔަ ގޮތާ ވާހަކަ ދައްކަމުން ދިޔަ ގޮތުން ރާއްޖޭގެ ވެރިކަމަށް ވަޑައިގެންނެވި ބޭބޭފުޅުންގެ ތެރެއިން ރައީސް މުއިއްޒު ނޫނީ ދަމު ނަމާދެއް ކޮށްލި ފަތިސް ނަމާދެއްގެ ޖަމާއަތަށް އަރާލި ދެ ހަރަމްފުޅުގައި ނަމާދެއްކޮށްލި ވެރިއަކު ނެތޭ ދިވެހިންނަށް ހީވާވަރުވިއެވެ.

މިސް ޔުނިވާސްގައި ދިވެއްސަކު ބައިވެރިވާކަމުގެ ހަބަރާއެކު ސަރުކާރު އެޔާ ދެކޮޅަށް ދެއްކި މަންޒަރަކީ ރައީސް މުއިއްޒުގެ ސަރުކާރަކީ މިކަހަލަ ކަންކަމަށް ދުވަހަކު ވެސް ތާއީދު ނުކުރާނެ، ޖާގަ ނުދޭނެ ސަރުކާރެއް ކަމެވެ. އެޔާއެކު ސަރުކާރުގެ ސިޔާސީ މަގާމުތަކުގައި ތިއްބެވި ބޭބޭފުޅުންނާ ސަރުކާރު ޕްރޮމޯޓްކުރާ ސޯޝަލް މީޑިއާ އެކްޓިވިސްޓުން ރައީސްގެ ދީންވެރި ކަމުގެ ވާހަކަ ދައްކާ ތައުރީފް ކުރަން ފެށީ ސުމާރެއް ބަލާފައެއް ނޫނެވެ. ނަމަވެސް ރައީސް އެކްސްގައި ޕޯސްޓް ކުރެއްވިތާ ބަރާބަރު 5 ދުވަސް ފަހުން ދިވެހިރާއްޖޭގައި ފެށި 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕްގެ މަންޒަރުތައް ސޯޝަލް މީޑިއާގައި ދައުރުވާން ފަށައިފިއެވެ. ރާއްޖޭގައި ބާއްވާތީ މުބާރާތް ފެށީ ކީރިތި ޤުރުއާނުގެ ބަރަކާތުންނެވެ. ފަހަތުގެ ބެކްޑްރޮޕް ގައި ދައުލަތުގެ ނިޝާން ފާޅުކޮށް ފެންނާން ހުއްޓެވެ. ރަސްމީ ހެދުންކޮޅުގައި ވަޑައިގެން ސަރުކާރުން މިކަމަށް ތަރުހީބުދޭލެއް ބޮޑު ކަމުން މުބާރާތް އިފްތިތާހު ކޮށްދެއްވީ މުއިއްޒުގެ ސްޕޯޓްސް މިނިސްޓަރެވެ.

މުބާރާތުގެ މަންޒަރުތައް ހުރިގޮތުން މިއީ ހަމަ ހަގީގަތުގައި ވެސް ރައީސް މުއިއްޒުފަދަ "ދީނީ" ބޭފުޅަކު އަދި ރައީސް މުއިއްޒު ސަރުކާރު ފަދަ "ދީނީ ސަރުކާރު" އަކުން އެއްބާރުލުން ދީގެން ބޭއްވި މުބާރާތެއް ބާވައޭ ހިތަށް އެރިއެވެ. "ޓޫ ޕީސް" ގައި ތިބި އަންހެން، ފިރިހެން، ދެ ޖިންސުގެ ބައިވެރިންގެ މަންޒަރުތަކުން ސޯޝަލް މީޑިއާ ފުރާލިއިރު ރައީސްގެ ކެބިނެޓްގައި ހިމެނިވަޑައިގަންނަވާ ވަޒީރު ބޭފުޅަކު އިފްތިތާހު ކޮށްދެއްވި މުބާރާތް ރާއްޖެ ފަދަ ސައްތައިން ސައްތަ އިސްލާމީ ގައުމެއްގައި ބާއްވަން ރައީސް މުއިއްޒަށް އޯކޭވެފައި މިސް ޔުނިވާސް ގައި ދިވެއްސަކު ބައިވެރިވުން އޯކޭ ނުވީ ދީނީ ކޮން ހަމައަކުން ބާވައޭ ހިތައް އެރިއެވެ. އެދުވަހު ސަރުކާރަށް ބައިއަތު ހިފައިގެން ތިބި ދީނީ އިލްމުވެރިން ދިވެހި އަންހެން ކުއްޖަކު ނަރަކަވަންތަ ވެރިއަކަށް ހެދި އިރު ސަރުކާރުން ފުރިހަމަ އަށް ބައިވެރިވެގެން ހިންގި މި މުބާރާތް ފައްތާނީ ކޮން ގޮޅިއަކަށްބާވައޭ ހިތައް އެރިއެވެ.

މިކަމުގައި ވާނީ ދެ ގޮތެކެވެ. އެއް ގޮތަކީ ރައީސަށް ރާއްޖޭގައި މިކަން ބާއްވާ ކަމާއި، މުބާރާތުގެ ބައިވެރިން ލައިގެން ތިބޭ އެއްޗެހި އެނގިވަޑައިނުގަންނަވަނީ އެވެ. އެކަމަކު ތަނެއްގެ ޗީފް ގެސްޓަކަށް މީހަކު ހަމަޖެއްސިޔަސް އެއީ ކޮން ފަރާތެއްކަން ރައީސަށް އެނގިވަޑައިގަންނަވަން ޖެހެއެވެ. އެވަރަށް ކަންކަން ކޮންޓްރޯލް ކޮށްގެން ކަންކަން ގެންދާ ސަރުކާރަކަށް މިއީ ނޭނގި ހިނގާނެ ކަމެއް ކަމުގައި ދަންނަވަން ދައްޗެވެ. އަނެއް ގޮތަކީ މީހުން އެބުނާގޮތަށް ދީންވެރި ބޭފުޅެއްކަން އަމިއްލަފުޅަށް ދައްކަވައިގެން އެއާ ދިމާ އިދިކޮޅަށް އަމަލުފުޅު ކުރައްވަނީ އެވެ. އެކަމަށްޓަކައި އެކްސް ގައި ޕޯސްޓް ކުރައްވަން ޖެހޭ އާޔަތެއް އޮތް ނަމަ އެކަން ވެސް ކުރައްވަނީ އެވެ. އެއީ ކޮންމެހެން ހަގީގީ މާނައިގައި ކުރައްވާ ކަންކަމެއް ނޫނެވެ. މުނާފިގުންގެ ސިފަތައް ތިނެކެވެ. އެ ސިފަތަކަށްވެސް އަޅުގަނޑުމެން ނުހަނު ފަރިތައެވެ. ތަކުރާރު ކުރަން ދަންނަވާކަށް ނެތީމެވެ.