އަޒަރުބައިޖާން އެއަރލައިންސް (އޭޒަލް) އިން ބާކޫ އާއި ދިވެހިރާއްޖެއާ ދެމެދު ޑައިރެކްޓް ފްލައިޓްގެ ދަތުރުތައް ފަށައިފިއެވެ.

މިގޮތުން ފުރަތަމަ ދަތުރު އާދިއްތަ ދުވަހު ހެނދުނު 9:45 ގައި ވެލާނާ އިންޓަރނޭޝަނަލް އެއަރޕޯޓަށް ޖައްސާފައިވެއެވެ. މި ދަތުރު ފެށުމުގެ ގޮތުން ބޭއްވުނު ރަސްމިއްޔާތުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެނޭޖިންގ ޑިރެކްޓަރ އަދި ސީއީއޯ އިބްރާހިމް ޝަރީފް މުޙައްމަދު ބައިވެރިވެވަޑައިގެންނެވިއެވެ.

އަޒަރުބައިޖާން އެއަރލައިންސްއިން ވެރިރަށް ބާކޫ އާއި ދިވެހިރާއްޖެއާ ދެމެދު ހަފްތާއަކު ދެ ދަތުރު ކުރާނެއެވެ. އެއީ ހުކުރު ދުވަހާއި އާދީއްތަ ދުވަހުއެވެ.

މިއީ އަޒަރުބައިޖާނާއި ދިވެހިރާއްޖެއާ ދެމެދު ފުރަތަމަ ފަހަރަށް ގާއިމުކުރެވުނު ސީދާ ވައިގެ ގުޅުމެވެ. މި ދަތުރުތަކުގެ މަޤްޞަދަކީ ދިވެހިރާއްޖެއަށް ޒިޔާރަތްކުރަން ބޭނުންވާ އަޒަރުބައިޖާނުގެ ފަތުރުވެރިންނަށް ފަސޭހަ ދަތުރު އޮޕްޝަނެއް ފޯރުކޮށްދިނުމެވެ.

އެމްއޭސީއެލްގެ ޗީފް ކޮމާޝަލް އޮފިސަރ މުޙައްމަދު މިހާދު ވިދާޅުވި ގޮތުގައި މިކަމުގެ ސަބަބުން ދަތުރުފަތުރުގެ ގުޅުންތައް ހަރުދަނާވެ، ޒިޔާރަތްކުރާ ފަރާތްތަކަށް ދަތުރުގެ ތަޖުރިބާ ރަނގަޅުވެގެންދާނެއެވެ.

އަޒަރުބައިޖާން އެއަރލައިންސްގެ ޗީފް ކޮމާޝަލް އޮފިސަރ ވިދާޅުވި ގޮތުގައި މި ދަތުރުތައް ފަށާފައިވަނީ ފިނި މޫސުމާ ދިމާކޮށް ކަމުން މިއީ އަޒަރުބައިޖާނުގެ ދަތުރުވެރިން ހޫނު ޤައުމުތަކަށް ދަތުރުކުރަން އެންމެ ގިނައިން އެދޭ މޫސުމެވެ.

އޭނާ އިތުރަށް ވިދާޅުވި ގޮތުގައި މި ގުޅުން ޤާއިމުކުރެވިފައިވަނީ ދިވެހިރާއްޖެއަށް ދަތުރުކުރުމަށް އޮންނަ ޝައުޤުވެރިކަން އިތުރުވަމުންދާތީ އެކަމަށް އެހީތެރިވުމުގެ ގޮތުންނެވެ. މި ފްލައިޓްތަކުގެ ޓިކެޓުތައް އަޒަރުބައިޖާން އެއަރލައިންސްގެ ވެބްސައިޓުންނާއި، މޯބައިލް އެޕުން އަދި އޭޒަލްގެ ޓިކެޓު އޮފީސްތަކުން ލިބެން ހުންނާނެއެވެ.

މި ޑައިރެކްޓް ފްލައިޓުތައް ފެށުމުގެ ސަބަބުން ދިވެހިރާއްޖެއަށް ދަތުރުކުރާ ފަރާތްތަކަށް މަޑުކުރަންޖެހޭ ހުއްޓުންތައް ނައްތާލެވި ވަގުތު ސަލާމަތް ކުރެވޭނެއެވެ.